លោកស្រីប្រធានាធិបតីកូរ៉េខាងត្បូង Park Geun-hye បានស្នើឈ្មោះបេក្ខជនបីនាក់ ដើម្បីជំនួសតំណែងនាយករដ្ឋមន្ត្រី និងមន្ត្រីកំពូលៗពីររូបផ្សេងទៀតនៅថ្ងៃពុធនេះ។ ប៉ុន្តែ អ្នកប្រឆាំងបានសន្យាថា នឹងរារាំងនូវការតែងតាំងនេះ ដោយបានហៅការស្នើឡើងទាំងនេះ ថាជាការព្យាយាមដើម្បីទាញចំណាប់អារម្មណ៍សាធារណជនកុំឲ្យផ្ដោតលើការស៊ើបអង្កេតលើករណីលោកស្រី Choi Soon-sil ដែលជាមិត្តភក្ដិជិតស្និទ្ធរបស់លោកស្រី Park Geun-hye ដែលកំពុងតែបន្តធ្វើនោះ។
លោកស្រី Park បានតែងតាំងលោក Kim Byong-joon ដែលជាសាស្ត្រាចារ្យនៃសាកលវិទ្យាល័យ Kookmin ជានាយករដ្ឋមន្ត្រីថ្មី។ អ្នកនាំពាក្យរបស់លោកស្រី Park ថា លោក Kim Byong-joon ជា«មនុស្សមានសមត្ថភាពពេញលេញ ដែលអាចជម្នះបាននូវស្ថានការណ៍ពិបាកនានា ដែលប្រទេសកំពុងជួបប្រទះនាពេលបច្ចុប្បន្ន និងអាចដឹកនាំគណៈរដ្ឋមន្ត្រីដ៏រឹងមាំសម្រាប់អនាគតប្រទេសកូរ៉េខាងត្បូង»។
លោកស្រី Park ក៏បានតែងតាំងលោក Yim Jong-yong ដែលជាប្រធានគណៈកម្មការសេវាហិរញ្ញវត្ថុនៃប្រទេសកូរ៉េខាងត្បូង ឲ្យធ្វើជារដ្ឋមន្ត្រីក្រសួងហិរញ្ញវត្ថុ និងជាឧបនាយករដ្ឋមន្ត្រី ហើយក៏បានតែងតាំងលោកស្រី Park Seung-joo ឲ្យធ្វើជារដ្ឋមន្ត្រីក្រសួងសុវត្ថិភាព និងសន្តិសុខសាធារណៈ។
ការតែងតាំងទាំងនេះត្រូវបានគេមើលឃើញថា ជាការព្យាយាមដើម្បីបំពេញចិត្តអ្នកប្រឆាំងនឹងលោកស្រី។ លោក Kim Byong-joon និងលោកស្រី Park Seung-joo ធ្លាប់ធ្វើជាមន្ត្រីរដ្ឋាភិបាលនៅក្នុងរដ្ឋបាលរបស់លោកអតីតប្រធានាធិបតី Roh Moo-hyun។
ប៉ុន្តែការព្យាយាមរបស់លោកស្រី Park លើកនេះ ត្រូវបានក្រុមអ្នកប្រឆាំងធ្វើការរិះគន់ភ្លាមៗ ដោយលើកឡើងថា ការតែងតាំងទាំងនេះប្រកាសឡើងដោយមិនសុំការប្រឹក្សាពីរដ្ឋសភាជាតិ និងបានហៅការតែងតាំងទាំងនេះថា ជាការចង់បង្វែរចំណាប់អារម្មណ៍សាធារណជនកុំឲ្យផ្ដោតលើរឿងអាស្រូវនយោបាយ ដែលបានផ្ទុះឡើងក្នុងរយៈពេលប៉ុន្មានថ្ងៃនេះ៕