រដ្ឋសភាកូរ៉េខាងត្បូងបានបោះឆ្នោតដើម្បីកាត់ទោសលោកស្រីប្រធានាធិបតី Park Geun-hye។ សមាជិកសភា២៣៤នាក់នៅថ្ងៃសុក្រនេះ បានបោះឆ្នោតគាំទ្រការកាត់ទោស នៅក្នុងសភាដែលមានអាសនៈ៣០០។ ការបោះឆ្នោតនេះបានទទួលសំឡេងច្រើនលើស២ភាគ៣ដែលត្រូវការ។
ការដួលរលំភ្លាមៗ និងយ៉ាងគួរឲ្យភ្ញាក់ផ្អើលរបស់លោកស្រីប្រធានាធិបតី Park បានកើតឡើងដោយសារការចោទប្រកាន់កាលពីពេលថ្មីៗទាក់ទងនឹងរឿងអាស្រូវដែលពាក់ព័ន្ធនឹងប្រាក់រាប់លានដុល្លារ នៅក្នុងវិមានខៀវ។
ក្រោយពីការបោះឆ្នោត ប្រធានសភា Chung Se-kyun បានអំពាវនាវឲ្យរដ្ឋាភិបាលផ្សះផ្សាការបែកបាក់ និងភាពវឹកវរនយោបាយ ដែលបានធ្វើឲ្យរដ្ឋាភិបាលមិនអាចដំណើរការបានដោយសាររឿងអាស្រូវនោះ។
ក្រសួងការពារប្រទេសកូរ៉េខាងត្បូងបានបញ្ជាឲ្យយោធាមានការប្រុងប្រយ័ត្នលើសដើម ព្រមទាំងត្រៀមខ្លួនផងខ្លាចក្រែងមានការប៉ុនប៉ងវាយប្រហារពីសំណាក់ប្រទេសកូរ៉េខាងជើង។
ការបោះឆ្នោតកាត់ទោសនេះ មានន័យថាលោកស្រីប្រធានាធិបតី Park ត្រូវបាត់បង់អំណាចភ្លាមៗ។ លោកនាយករដ្ឋមន្ត្រី Hwang Kyo-ahn បានឡើងកាន់តំណែងជាប្រមុខរដ្ឋស្តីទី។
តុលាការធម្មនុញ្ញរបស់កូរ៉េខាងត្បូង មានពេល៦ខែដើម្បីពិនិត្យមើលភាពស្របច្បាប់នៃការបោះឆ្នោតកាត់ទោសនេះ។ បើសិនជាតុលាការនេះយល់ស្រប ការបោះឆ្នោតជ្រើសរើសប្រធានាធិបតីថ្មី នឹងត្រូវរៀបចំធ្វើឡើងក្នុងរយៈពេល២ខែបន្ទាប់មក។
លោកស្រីប្រធានាធិបតី Park បានជួបជាមួយគណៈរដ្ឋមន្ត្រីរបស់លោកស្រី នៅវិមានខៀវ បន្ទាប់ពីការបោះឆ្នោតកាត់ទោសនោះ បន្ទាប់មកលោកស្រីបានថ្លែងសារមួយទៅកាន់អ្នកកាសែត ដោយនិយាយថា លោកស្រីទទួលស្គាល់ឆន្ទៈរបស់សភា និងរបស់ប្រជាពលរដ្ឋ៕