មនុស្សរាប់សែននាក់បានប្រមូលផ្ដុំគ្នានៅក្នុងទីក្រុងសេអ៊ូល ប្រទេសកូរ៉េខាងត្បូង រហូតដល់យប់ថ្ងៃសៅរ៍ម្សិលមិញ ដើម្បីធ្វើការតវ៉ាទម្លាក់លោកស្រីប្រធានាធិបតី Park Geun-hye ចេញពីតំណែង ពាក់ព័ន្ធនឹងរឿងអាស្រូវពុករលួយនយោបាយកន្លងមក។ ការតវ៉ាលើកនេះ ជាការតវ៉ាដ៏ធំបំផុតនៅក្នុងការតវ៉ាទម្លាក់លោកស្រី Park កន្លងមក។
ការតវ៉ាលើកនេះ ជាការតវ៉ាលើកទី ៥ ដែលធ្វើឡើងនៅរៀងរាល់ចុងសប្ដាហ៍កន្លងមកជាប់ៗគ្នា ដោយក្នុងនោះ អ្នកតវ៉ាជាច្រើននាក់បានប្រមូលផ្ដុំនៅលើដងផ្លូវធំៗនៅកណ្ដាលក្រុងសេអ៊ូល។
ប៉ូលិសបាននិយាយថា មានអ្នកតវ៉ាប្រហែល ២ សែន ៧ ម៉ឺននាក់បានចេញមកតវ៉ានៅថ្ងៃសៅរ៍ម្សិលមិញ ប៉ុន្តែអ្នករៀបចំបាតុកម្មនេះបានប៉ាន់ប្រមាណថា អ្នកតវ៉ាមានចំនួនប្រហែល ១ លាន កន្លះ។
មន្ត្រីប៉ូលិសចំនួនប្រហែល ២ ម៉ឺន ៥ ពាន់នាក់ ត្រូវបានដាក់ពង្រាយដើម្បីការពារក្រែងមានអំពើហិង្សាកើតឡើង និងដើម្បីរារាំងអ្នកតវ៉ាកុំឲ្យធ្វើដំណើរជាក្បួនទៅកាន់វិមានប្រធានាធិបតី។
លោកស្រី Park Geun-hye ត្រូវគេសង្ស័យថាបានជួយលោកស្រី Choi Soon-sil ដែលជាមិត្តភក្ដិជិតស្និទ្ធរបស់លោកស្រី។ លោកស្រី Choi Soon-sil ត្រូវគេចោទប្រកាន់ថា បានលូកដៃចូលក្នុងកិច្ចការរដ្ឋាភិបាល និងបានបង្ខំក្រុមហ៊ុនមួយចំនួនបង់ថវិកាលើអង្គការសប្បុរសធម៌ ដែលលោកស្រីបានបង្កើត និងគ្រប់គ្រងដោយខ្លួនឯង និងទាញយកផលចំណេញពីថវិកាទាំងនោះ។
រដ្ឋអាជ្ញាដែលបានធ្វើការស៊ើបអង្កេតសំណុំរឿងលោកស្រី Choi Soon-sil បានចោទប្រកាន់លោកស្រី Choi ជាផ្លូវការ និងនាពេលបច្ចុប្បន្ននេះ កំពុងសាកសួរលោកស្រី Park អំពីតួនាទីរបស់លោកស្រីពាក់ព័ន្ធនៅក្នុងរឿងអាស្រូវនយោបាយនេះ៕
