ក្រុមគ្រួសារដ៏តក់ស្លុតបានទៅទទួលសាកសព ឪពុកម្ដាយព្យាយាមស្វែងរកកូនៗរបស់ខ្លួន ហើយប្រទេសកូរ៉េខាងត្បូងទាំងមូលចង់បានចម្លើយនៅថ្ងៃអាទិត្យនេះ ក្រោយពីមនុស្សយ៉ាងហោចណាស់ ១៥៣ នាក់បានប្រជ្រៀតជាន់គ្នាស្លាប់ក្នុងអំឡុងពេលប្រារព្ធពិធីបុណ្យ Halloween។
ប្រធានាធិបតីកូរ៉េខាងត្បូងលោក Yoon Suk-yeol បានប្រកាសអំពីការកាន់ទុក្ខទូទាំងប្រទេស និងបានចាត់ទុកសង្កាត់ Itaewon នៅក្នុងទីក្រុងសេអ៊ូលថាជាតំបន់គ្រោះមហន្ដរាយ បន្ទាប់ពីមានហេតុការណ៍ប្រជ្រៀតជាន់គ្នាស្លាប់បានកើតឡើងនៅទីនោះកាលពីយប់ថ្ងៃសៅរ៍។
មនុស្សមួយហ្វូងធំដែលប្រារព្ធពិធីបុណ្យ Halloween នៅក្នុងសង្កាត់ Itaewon បាននាំគ្នាប្រជ្រៀតទៅផ្លូវតូចចង្អៀតមួយ ដែលបានបណ្ដាលឱ្យមនុស្សយ៉ាងហោចណាស់ចំនួន ១៥៣ នាក់សង្កត់ជាន់គ្នាស្លាប់ ដែលភាគច្រើនស្ថិតក្នុងវ័យ ២០ ឆ្នាំ ហើយតួលេខអ្នកស្លាប់អាចកើនឡើងខ្ពស់ជាងនេះទៀត។ នេះបើតាមការបញ្ជាក់របស់មន្ត្រីសង្គ្រោះបន្ទាន់។
លោក Choi Sung-beom ប្រធានស្ថានីយពន្លត់អគ្គិភ័យ Yongsan បានថ្លែងនៅក្នុងសន្និសីទសារព័ត៌មានមួយនៅកន្លែងកើតហេតុថា មនុស្សចំនួន ៨២ នាក់បានរងរបួស ដែលក្នុងនោះ ១៩ នាក់រងរបួសធ្ងន់។ លោកបានបញ្ជាក់ថា ក្នុងចំណោមអ្នកស្លាប់ទាំងអស់ក៏មានជនបរទេសចំនួន ២២ នាក់ផងដែរ។
លោកប្រធានាធិបតី Yoon បានសម្ដែងមរណទុក្ខចំពោះជនរងគ្រោះ និងបានជូនពរអ្នករងរបួសនៅក្នុងហេតុការណ៍រត់ជាន់គ្នានេះឱ្យឆាប់ជាសះស្បើយ។ ហេតុការណ៍ប្រជ្រៀតជាន់គ្នានេះគឺជាហេតុការណ៍ដ៏អាក្រក់បំផុតមួយនៅកូរ៉េខាងត្បូង និងជាហេតុការណ៍ប្រជ្រៀតជាន់គ្នាដ៏អាក្រក់បំផុតនៅលើពិភពលោកក្នុងរយៈពេលប៉ុន្មានទសវត្សរ៍ចុងក្រោយនេះ៕