ចាប់ពីខែនេះទៅ នាវានេសាទត្រីរបស់ចិនត្រូវបានអនុញ្ញាតឲ្យនេសាទនៅក្នុងដែនទឹកសូម៉ាលី ក្រោយពីរដ្ឋាភិបាលសូម៉ាលីបានផ្តល់អាជ្ញាប័ណ្ណដល់នាវានេសាទទាំងនោះកាលពីខែមុន។ អាជ្ញាធរសូម៉ាលីបាននិយាយថា អាជ្ញាប័ណ្ណទាំងនោះនឹងកាត់បន្ថយការនេសាទដោយខុសច្បាប់ពីនាវាបរទេស និងជួយធ្វើឲ្យសេដ្ឋកិច្ចប្រសើរឡើង។ ប៉ុន្តែអ្នកនេសាទសូម៉ាលីព្រួយបារម្ភថា ការដែលនាវានេសាទត្រីរបស់ចិនទទួលបានអាជ្ញាប័ណ្ណនឹងធ្វើឲ្យពួកគេនេសាទយ៉ាងច្រើនលើសលប់។
ប្រទេស សូម៉ាលី មានឆ្នេរសមុទ្រប្រវែង ៣៣០០គីឡូម៉ែត្រ ដែលជាឆ្នេរសមុទ្រវែងបំផុតនៅទ្វីបអាហ្វ្រិក។
អស់រយៈពេលរាប់ទសវត្សរ៍មកហើយ ប្រទេសក្រីក្រមួយនេះជួបនឹងការលំបាកក្នុងការពារដែនទឹកដែលសម្បូរទៅដោយធនធានកុំឲ្យមានការនេសាទដោយខុសច្បាប់ពីសំណាក់ជនបរទេស។
នៅក្នុងខែ មករា នេះ ប្រទេស សូម៉ាលី បានចាប់ផ្តើមអនុវត្តដំណោះស្រាយមួយទៅលើនាវានេសាទដែលឈ្លានពាននានា តាមរយៈការផ្តល់អាជ្ញាប័ណ្ណដល់ទូកនេសាទចិនចំនួន៣២គ្រឿង។
លោក Omar Abshirow អនុរដ្ឋមន្ត្រីក្រសួងជលផលនៃប្រទេស សូម៉ាលី បានថ្លែងថា៖«ចាប់តាំងពីមានសកម្មភាពនេសាទពីបរទេសដោយខុសច្បាប់នៅក្នុងដែនទឹករបស់យើងមក យើងបានព្យាយាមដោះស្រាយបញ្ហានេះ តាមរយៈការផ្តល់អាជ្ញាប័ណ្ណស្របច្បាប់ក្នុងការនេសាទ ដើម្បីកុំឲ្យពួកគេបន្តលួចនេសាទដោយខុសច្បាប់តទៅទៀត»។
នាវានេសាទបរទេសបាននេសាទយ៉ាងច្រើនលើសលប់លើដែនទឹកសូម៉ាលីអស់រយៈពេលជាយូរមកហើយ ប៉ុន្តែទូកនេសាទទាំងនោះភាគច្រើនធ្វើការនេសាទដោយខុសច្បាប់ ឬប្រើប្រាស់អាជ្ញាប័ណ្ណក្លែងក្លាយដែលលក់ដោយក្រុមមន្ត្រីពុករលួយ។
លោក Abshirow មានប្រសាសន៍ថា ថវិកាដែលបានមកពីការលក់អាជ្ញាប័ណ្ណដល់ទូកនេសាទរបស់ចិននឹងផ្តល់ជាចំណូលដល់ប្រទេស សូម៉ាលី ជាងពីរលានដុល្លារជារៀងរាល់ឆ្នាំ។
ប៉ុន្តែអ្នកនេសាទក្នុងស្រុកដូចជាលោក Muse Maow វ័យ៤០ឆ្នាំ ព្រួយបារម្ភថា ឥឡូវនេះ ជនជាតិចិនទាំងនោះទទួលបានអាជ្ញាប័ណ្ណដើម្បីនេសាទយ៉ាងច្រើនលើសលប់លើដែនទឹករបស់ខ្លួន។
លោក Muse Maow ដែលជាអ្នកនេសាទជនជាតិសូម៉ាលីបានថ្លែងថា៖
«យើងបានរងគ្រោះរួចទៅហើយពីការនេសាទយ៉ាងច្រើនលើសលប់ពីសំណាក់ជនបរទេស។ ហើយឥឡូវនេះ យើងរងគ្រោះបន្ថែមទៀត ដោយសារតែរដ្ឋាភិបាលរបស់យើងផ្តល់អាជ្ញាប័ណ្ណដល់ក្រុមហ៊ុនបរទេស ដែលមានឧបករណ៍នេសាទល្អជាងនិងមានប្រព័ន្ធនេសាទទំនើបជាងអ្វីដែលយើងមាន ដើម្បីប្រជែងជាមួយនឹងយើង»។
អាជ្ញាធរសូម៉ាលីនិយាយថា ពួកគេនឹងការពារអ្នកនេសាទខ្នាតតូចដូចជាលោក Maow តាមរយៈការតាមដានលើអ្វីដែលពួកចិននេសាទបាន និងមិនអនុញ្ញាតឲ្យពួកគេនេសាទត្រីនៅជិតឆ្នេរសមុទ្រពេកនោះទេ។
ប៉ុន្តែប្រធានសមាគមនេសាទសូម៉ាលី លោក Hassan Robleh មានមន្ទិលសង្ស័យចំពោះថាតើរដ្ឋាភិបាលអាចគ្រប់គ្រងលើទូកនេសាទចិនដែរឬយ៉ាងណា។
លោក Hassan Robleh បានថ្លែងថា៖
«គេបានប្រាប់យើងថា នាវានេសាទទាំងនោះនឹងចាប់ត្រីធូណា។ យើងព្រួយបារម្ភថា នាវាទាំងនោះនឹងបំពានទៅលើតំបន់សេដ្ឋកិច្ចផ្តាច់មុខរបស់យើង ដែលនាំឲ្យមានជម្លោះខាងសេដ្ឋកិច្ចដោយផ្ទាល់ជាមួយនឹងសហគមន៍នេសាទរបស់យើង»។
អ្នកនេសាទសូម៉ាលីធ្លាប់មានជម្លោះជាមួយនឹងទូកនេសាទបរទេសកាលពីមួយទសវត្សរ៍មុន រហូតធ្វើឲ្យអ្នកនេសាទសូម៉ាលីមួយចំនួនក្លាយទៅជាចោរសមុទ្រប្លន់នាវានានាដើម្បីទារប្រាក់លោះទៀតផង។
ការប្លន់តាមសមុទ្របានថយចុះ ដោយសារការយាមល្បាតពីទាហានជើងទឹកបរទេស ហើយនាវានានាបំពាក់ប្រព័ន្ធការពារសន្តិសុខបន្ថែមទៀត។ គេរំពឹងថា ទូកនេសាទចិនដែលទើបតែត្រូវបានផ្តល់អាជ្ញាប័ណ្ណថ្មីៗទាំងនោះនឹងមានបំពាក់ដោយអាវុធផងដែរ៕
ប្រែសម្រួលដោយ ហុង ចិន្តា