ប្រទេសអារ៉ាប៊ីសាអូឌីតបានចាប់ផ្តើមចេញប័ណ្ណបើកបរជាលើកទីមួយដល់ស្ត្រីជនជាតិអារ៉ាប៊ីសាអូឌីត ខណៈកំពុងលុបចោលបម្រាមមិនឲ្យស្ត្រីបើកបរ ដែលមានតែមួយគត់នៅក្នុងពិភពលោកនៅចុងខែនេះ។
រដ្ឋាភិបាលប្រទេសអារ៉ាប៊ីសាអូឌីតកាលពីថ្ងៃចន្ទបានចេញសេចក្តីថ្លែងការណ៍មួយថា ខ្លួនបានចាប់ផ្តើមចេញប័ណ្ណបើកបរដល់ស្ត្រីដែលមានប័ណ្ណបើកបរពីប្រទេសផ្សេងៗ រួមទាំងចក្រភពអង់គ្លេស លីបង់ និងកាណាដា។ សេចក្តីថ្លែងការណ៍ដដែលនោះបានបញ្ជាក់ថា ស្ត្រីទាំងនោះនឹងធ្វើតេស្តបើកបរមុននឹងទទួលបានប័ណ្ណបើកបរថ្មីដែលចេញដោយរដ្ឋាភិបាលអារ៉ាប៊ីសាអូឌីត។
ប្រទេសអារ៉ាប៊ីសាអូឌីតកំពុងរៀបចំលុបចោលបម្រាមដែលបានដាក់អស់រាប់ទសវត្សរ៍ទៅលើស្ត្រីនៅថ្ងៃទី២៤ខែមិថុនាខាងមុខនេះ។ ចំណាត់ការនេះគឺជាផ្នែកមួយនៃគម្រោងរបស់ព្រះអង្គម្ចាស់ Khaled bin Salman ដើម្បីធ្វើទំនើបកម្មរដ្ឋដែលសម្បូរដោយប្រេងមួយនេះ។ ទោះជាយ៉ាងណាក៏ដោយការបោះជំហានរបស់រដ្ឋាភិបាលក្នុងការលុបចោលបម្រាមលើស្ត្រីនេះធ្វើឡើងនៅមួយសប្តាហ៍បន្ទាប់ពីអាជ្ញាធរអារ៉ាប៊ីសាអូឌីតចាប់ខ្លួនស្ត្រីជាច្រើនដែលបានធ្វើយុទ្ធនាការទាមទារសិទ្ធិបើកបររបស់ពួកគេ ព្រមទាំងយុទ្ធនាការប្រឆាំងនឹងប្រព័ន្ធគ្រប់គ្រងដោយបុរសនៅក្នុងប្រទេសមួយនេះ។ នៅក្នុងប្រទេសអារ៉ាប៊ីសាអូឌីត ស្ត្រីត្រូវសុំការអនុញ្ញាតពីបុរសដែលជាអាណាព្យាបាលដើម្បីអាចធ្វើការសម្រេចចិត្តបានដោយស្របច្បាប់ ទាំងនេះ មានដូចជាចូលរៀន ធ្វើការ រៀបការ ធ្វើដំណើរនិងទៅព្យាបាលជំងឺជាដើម៕