ប្រទេសអារ៉ាប៊ីសាអូឌីត ប្រទេសបារ៉ែន អេមីរ៉ាតអារ៉ាប់រួម និងប្រទេសអេហ្ស៊ីប បានប្រកាសនៅថ្ងៃច័ន្ទនេះថា ខ្លួននឹងកាត់ផ្ដាច់ចំណងទាក់ទងការទូតជាមួយនឹងប្រទេសកាតា ដោយចោទប្រកាន់ប្រទេសកាតាថា បានគាំទ្រអំពើភេរវកម្ម។
ប្រទេសទាំង ៤ នេះ បានសម្រេចធ្វើដូច្នេះផ្សេងៗគ្នាជាបន្តបន្ទាប់ ដោយបញ្ជាក់ថា ពួកគេនឹងដកបុគ្គលិកការទូតរបស់ពួកគេចេញពីប្រទេសកាតា និងកាត់ផ្ដាច់ការធ្វើចរាចរតាមផ្លូវអាកាស និងផ្លូវទឹកជាមួយនឹងប្រទេសកាតា។
ជើងហោះហើរនៅក្នុងតំបន់ ដែលមានដូចជា Saudi ជើងហោះហើរ Emirates និង Etihad បានបញ្ជាក់ថា ពួកគេនឹងបញ្ឈប់ការហោះហើរទៅកាន់ប្រទេសកាតា។ ចំណែកឯជើងហោះហើរ Qatar Airways វិញ បានប្រកាសថា ខ្លួននឹងឈប់ហោះហើរទៅកាន់ប្រទេសអារ៉ាប៊ីសាអូឌីត។
ក្រោយមក ប្រទេសយេម៉ែនបានសម្រេចកាត់ផ្ដាច់ចំណងទាក់ទងការទូតជាមួយនឹងប្រទេសកាតាដែរ។
ប្រទេសអារ៉ាប៊ីសាអូឌីត ដែលដឹកនាំសម្ព័ន្ធមិត្តវាយប្រយុទ្ធដើម្បីគាំទ្ររដ្ឋាភិបាលប្រទេសយេម៉ែន ក៏បានបញ្ជាក់ផងដែរថា កងកម្លាំងប្រទេសកាតា ក៏នឹងត្រូវដកចេញពីសម្ព័ន្ធមិត្តនេះដែរ។
ទីភ្នាក់ងារព័ត៌មាន SPA ដែលជាទីភ្នាក់ងារព័ត៌មានរដ្ឋរបស់ប្រទេសអារ៉ាប៊ីសាអូឌីត បានរាយការណ៍ថា ប្រទេសកាតា «មានក្រុមភេរវករ និងក្រុមដែលមានគំនិតចង្អៀតចង្អល់ជាច្រើន ដូចជាក្រុម ISIS និងក្រុម al-Qaida ដែលមានគោលបំណងធ្វើឲ្យប៉ះពាល់ដល់ស្ថិរភាពនៅក្នុងតំបន់»។
រដ្ឋមន្ត្រីការបរទេសសហរដ្ឋអាមេរិក លោក Rex Tillerson បាននិយាយថា លោកមិនរំពឹងថា ការសម្រេចចិត្តរបស់ប្រទេសទាំងនេះ អាចប៉ះពាល់ដល់ការប្រយុទ្ធប្រឆាំងនឹងអំពើភេរវកម្មនៅក្នុងតំបន់ ឬនៅក្នុងពិភពលោកនោះទេ៕
