កងទ័ពរុស្ស៊ីបានធ្វើការវាយប្រហារជាថ្មីកាលពីថ្ងៃចន្ទទៅលើទីក្រុងកំពង់ផែ Odesa ដែលស្ថិតនៅផ្នែកនិរតីនៃប្រទេសអ៊ុយក្រែន ស្របពេលដែលសហភាពអឺរ៉ុបកំពុងរៀបចំការដាក់ទណ្ឌកម្មជុំថ្មីបន្ថែមទៀតលើប្រេងឧស្ម័នរបស់រុស្ស៊ីនោះ។
ក្រុមប្រឹក្សាទីក្រុង Odesa បាននិយាយនៅថ្ងៃចន្ទម្សិលមិញថា ការវាយប្រហាររបស់រុស្ស៊ី បានត្រូវចំអគារលំនៅដ្ឋានមួយកន្លែងនៅក្នុងទីក្រុងដោយបានសម្លាប់ក្មេងប្រុសម្នាក់អាយុ១៥ឆ្នាំ ម្នាក់និងក្មេងស្រីម្នាក់ទៀតរងរបួសកំពុងសម្រាកព្យាបាលក្នុងមន្ទីរពេទ្យ។ អភិបាលតំបន់លោកMaksym Marchenko បាននិយាយថាកាំជ្រួចមីស៊ីលរបស់រុស្ស៊ីក៏បានធ្លាក់ចំស្ពានយុទ្ធសាស្ត្រសំខាន់មួយកន្លែងនៅក្នុងតំបន់នោះផងដែរ។
ទន្ទឹមនឹងនេះដែរ សហភាពអឺរ៉ុប ត្រូវបានគេរំពឹងថានឹងរៀបចំដាក់ការដាក់ទណ្ឌកម្មជាថ្មីមួយទៀតទៅលើប្រទេសរុស្ស៊ីនៅថ្ងៃអង្គារនេះដែលក្នុងនោះក៏រួមមានទាំងការដាក់កម្រិតលើឧស្ម័នរុស្ស៊ីផងដែរ។ មន្ត្រីអាល្លឺម៉ង់មួយចំនួនបានបង្ហាញឲ្យដឹងនៅថ្ងៃចន្ទម្សិលមិញថា ប្រទេសខ្លួនអាចគាំទ្រលើការដាក់ទណ្ឌកម្មប្រេងឧស្ម័នរុស្ស៊ីទាំងស្រុងពីសំណាក់សហភាពអឺរ៉ុប។
រដ្ឋមន្ត្រីក្រសួងសេដ្ឋកិច្ចអាល្លឺម៉ង់លោក Robert Habeck និយាយថា៖ «យើងអាចឈោងទៅដល់ស្ថានភាពមួយដែលអាល្លឺម៉ង់អាចមានលទ្ធភាពក្នុងការដាក់ទណ្ឌកម្មប្រេងទៅលើរុស្ស៊ី»។
ប្រធានាធិបតីអ៊ុយក្រែនលោកVolodymyr Zelenskyy បាននិយាយនៅក្នុងសុន្ទរកថាប្រចាំរាត្រីកាលពីថ្ងៃចន្ទថា៖ «យើងរំពឹងថានឹងមានកម្មវិធីទណ្ឌកម្មថ្មីមួយទៀតពីសហភាពអឺរ៉ុបប្រឆាំងនឹងរុស្ស៊ីក្នុងពេលឆាប់ៗខាងមុខនេះ។ កម្មវិធីទណ្ឌកម្មថ្មីនោះអាចរួមមានការចាត់វិធានការដ៏ជាក់លាក់របស់សហភាពអឺរ៉ុបដើម្បីរាំងខ្ទប់ប្រាក់ចំណូលពីប្រភពថាមពលរបស់រុស្ស៊ី»។
ដោយឡែករដ្ឋមន្ត្រីការបរទេសអ៊ុយក្រែនលោកDmytro Kulebaបាននិយាយកាលពីព្រឹកថ្ងៃចន្ទថា ការជម្លៀសជនភៀសខ្លួនចេញពីទីក្រុងកំពង់ផែ Mariupolដែលកំពុងស្ថិតក្រោមការឡោមព័ទ្ធរបស់រុស្ស៊ីនោះនៅតែស្ថិតក្នុងភាពផុយស្រួយនៅឡើយ បន្ទាប់ពីមានការជម្លៀសមនុស្សមួយក្រុមដំបូងចេញពីរោងចក្រដែកថែបនោះក្តី។
លោក Dmytro Kuleba បានប្រាប់ក្រុមអ្នកសារព័ត៌មានក្នុងរដ្ឋធានីកៀវថា៖ «ស្ថានភាពអាចមានការប្រែប្រួលអាក្រក់គ្រប់ពេលវេលា។ ដូចនេះជាការប្រសើរដែលយើងត្រូវរង់ចាំរហូតដល់ការជម្លៀសប្រជាពលរដ្ឋបានចប់សព្វគ្រប់ចេញពីរោងចក្រនោះសិន»។
អ្នកយកព័ត៌មានរបស់វីអូអេលោក Myroslava Gongadze លោក Jeff Seldin និងអ្នកស្រី Nike Ching បានរួមវិភាគទានសេចក្តីរាយការណ៍នេះ។ ព័ត៌មានខ្លះនៃសេចក្តីរាយការណ៍នេះដកស្រង់ពីទីភ្នាក់ងារព័ត៌មាន AP, AFP និង Reuters។