រដ្ឋាភិបាលរុស្ស៊ីមិនទាន់បានធ្វើសហការជាមួយស.រ.អា.ទេក្នុងពេលនេះទាក់ទងនឹងកិច្ចពិភាក្សាអំពីបញ្ហាកូរ៉េខាងជើង។ នេះបើតាមលោក Dmitry Peskov អ្នកនាំពាក្យរបស់វិមានក្រឹមឡាំងដែលបានប្រាប់ទីភ្នាក់ងារព័ត៌មានរុស្ស៊ី RIA ។
លោក Dmitry Peskov និយាយថា មិនមានកិច្ចសហការទេរហូតមកដល់ពេលនេះ។ លោកបន្ថែមថា លោក Vladimir Putin ប្រធានាធិបតីរុស្ស៊ី និងលោក ដូណាល់ ត្រាំ ប្រធានាធិបតីស.រ.អា.ទំនងជានឹងជួបគ្នាអំឡុងវេទិកាសេដ្ឋកិច្ចអាស៊ីនៅសប្តាហ៍ក្រោយ។
លោក Dmitry Peskov និយាយថា បើមេដឹកនាំទាំងពីរជួបគ្នានោះនោះនឹងមានលទ្ធភាពច្រើនដែលពួកគេនឹងពិភាក្សាអំពីស្ថានការណ៍កូរ៉េខាងជើង។ លោកប្រធានាធិបតី ត្រាំ និងលោកប្រធានាធិបតី Putin នឹងទៅប្រទេសហ្វីលីពីនដើម្បីចូលរួមកិច្ចប្រជុំកំពូលអាស៊ីបូព៌ាបន្ថែមពីលើកិច្ចប្រជុំរបស់អាស៊ាន។
នៅមុនទស្សនកិច្ចរបស់លោកប្រធានាធិបតី ត្រាំ មានយន្តហោះលឿនជាងសំឡេងចំនួនពីរគ្រឿងបានធ្វើសមយុទ្ធទម្លាក់គ្រាប់បែកនៅឧបទ្វីបកូរ៉េ ដែលជាការបង្ហាញកម្លាំងប្រាប់កូរ៉េខាងជើង។ យន្តហោះទម្លាក់គ្រាប់បែក B-1B ត្រូវបានអមដំណើរក្នុងការហាត់សមកាលពីថ្ងៃព្រហស្បតិ៍ ដោយយន្តហោះប្រដេញពីរគ្រឿងរបស់កូរ៉េខាងត្បូង។ នេះបើតាមមន្ត្រីយោធារបស់ប្រទេសនេះ។
បណ្តាញទូរទស្សន៍រដ្ឋកូរ៉េខាងជើងបានប្រកាសប្រឆាំងការធ្វើសមយុទ្ធនេះ ដោយនិយាយថា វាជាការហាត់វាយប្រហារដោយនុយក្លេអ៊ែរគួរឲ្យភ្ញាក់ផ្អើល ហើយថា ចក្រពត្តិអាមេរិកដែលដូចជាជនពាលនោះ កំពុងចាប់ផ្តើមបង្កសង្គ្រាមនុយក្លេអ៊ែរ។
ភាពតានតឹងកើនឡើងនៅឧបទ្វីបកូរ៉េ នៅពេលកូរ៉េខាងជើងបានសាកល្បងគ្រាប់បែកនុយក្លេអ៊ែរ និងការបាញ់មីស៊ីល ដែលអាចមកដល់ទឹកដីស.រ.អា. និងបានបាញ់មីស៊ីលច្រើនគ្រាប់រំលងប្រទេសជប៉ុនក្នុងពេលប៉ុន្មានខែថ្មីៗនេះ៕