កាលពីពេលមុនប្រទេសសិង្ហបុរី បានដាក់ទណ្ឌកម្មជាឯកតោភាគីប្រឆាំងនឹងប្រទេសមួយទៀតកាលពី៤៤ឆ្នាំមុន។ ការដាក់ទណ្ឌកម្មនេះគឺនៅពេលដែលខ្លួនបានដាក់ទណ្ឌកម្មវៀតណាមចំពោះការឈ្លានពានកម្ពុជា។
ក៏ប៉ុន្តែ នៅសប្តាហ៍នេះ សិង្ហបុរី បានប្រកាសការដាក់ទណ្ឌកម្មប្រឆាំងនឹងរុស្ស៊ីអំពីការឈ្លានពានរបស់រុស្ស៊ីលើប្រទេសអ៊ុយក្រែន។
រដ្ឋមន្ត្រីការបរទេសសិង្ហបុរីលោក Bivian Balakrishnan បាននិយាយថា បញ្ហានេះ ធ្វើការវាយប្រហារផ្នែកសំខាន់ៗលើប្រទេសតូចៗដូចជា «សិទ្ធិដើម្បីអត្ថិភាពរស់រាននិងរីកចម្រើន»។
លោក Lim Tai Wei បង្រៀននៅឯសាកលវិទ្យាល័យជាតិសិង្ហបុរី។ លោក និយាយថា សិង្ហបុរី ជាប្រទេសតូចមួយនៃប្រទេសតូចៗជាច្រើនដែលគិតថា អាចងាយទទួលគ្រោះថ្នាក់ ប្រសិនបើ សណ្តាប់ធ្នាប់របស់ពិភពលោកនៅពេលបច្ចុប្បន្ននេះ មិនត្រូវបានការពារនោះទេ។ លោកបានថ្លែងថា៖
«សិង្ហបុរី គិតគូរយ៉ាងខ្លាំងអំពីអធិបតេយ្យភាពរបស់ខ្លួន។ ការគិតនោះ គឺថា ប្រសិនបើប្រទេសងាយទទួលរងគ្រោះមួយ អាចត្រូវបានគេឈ្លានពាន ការណ៍នេះ ក៏អាចកើតមានឡើងដល់ប្រទេសតូចៗផ្សេងទៀតដែរ»។
ការដាក់ទណ្ឌកម្មលើរុស្ស៊ីនោះ មិនមែនតែសិង្ហបុរីមួយទេ។ ប្រទេសច្រើនទៀតដែលមានសេដ្ឋកិច្ចធំបំផុតនៅតំបន់អាស៊ីខាងកើត ចាប់តាំងពីប្រទេសជប៉ុនរហូតដល់កូរ៉េខាងត្បូងដល់អូស្ត្រាលី បានប្រកាសការដាក់ទណ្ឌកម្មប្រហាក់ប្រហែលនេះ។
ជប៉ុនជាពិសេស បានថ្កោលទោសយ៉ាងខ្លាំងដល់ប្រទេសរុស្ស៊ី។ លោកនាយករដ្ឋមន្ត្រីជប៉ុនថ្លែងថា៖
«នាយករដ្ឋមន្ត្រីជប៉ុនលោក Fumio Kishida បាននិយាយថា លោកបានប្រាប់លោកប្រធានា ធិបតីអ៊ុយក្រែនថា លោកឈរជាមួយអ៊ុយក្រែន ហើយនិងស្នើសុំជួយផ្តល់ការគាំទ្រដោយស្មោះត្រង់ចំពោះអធិបតេយ្យភាពនិងបូរណភាពទឹកដីរបស់អ៊ុយក្រែន»។
មិនមែនប្រទេសទាំងអស់នៅទ្វីបអាស៊ី សុទ្ធតែប្រឆាំងនឹងប្រទេសរុស្ស៊ីនោះទេ។ ចិននិងកូរ៉េខាងជើង បានការពាររុស្ស៊ី ដោយនិយាយថា មូលហេតុនៃជម្លោះនោះ គឺដោយសារសហរដ្ឋអាមេរិក។ នៅក្នុងតំបន់អាស៊ីអាគ្នេយ៍ រដ្ឋាភិបាលភាគច្រើន បាននៅរក្សាការស្ងាត់ស្ងៀម។
កាលពីសប្តាហ៍មុន សមាគមប្រជាជាតិអាស៊ីអាគ្នេយ៍ឬអាស៊ាន បានចេញសេចក្តីថ្លែងការណ៍ស្តីពីអ៊ុយក្រែនដែលបានទប់មិនពណ៌នាអំពីចំណាត់ការរបស់រុស្ស៊ីថា ជា«ការឈ្លានពាន»។ តាមការពិត សេចក្តីថ្លែងការណ៍នោះ មិនបាននិយាយអំពីប្រទេសរុស្ស៊ីទាល់តែសោះ។
លោក Lim និយាយទៀតថា ពីព្រោះតែប្រទេសជាច្រើននៅទីនោះ មានចំណងទាក់ទងខាងសេដ្ឋកិច្ចនិងយោធាយ៉ាងខ្លាំងជាមួយរុស្ស៊ីតាំងពីសម័យសង្គ្រាមត្រជាក់មក។ លោកបានថ្លែងថា៖
«នៅក្នុងសមាគមអាស៊ាន ប្រទេសខ្លះនៅក្នុងប្រទេសទាំងនោះ មានទំនាក់ទំនងយ៉ាងជិតស្និទ្ធ ជាប្រពៃណីនិងយូរអង្វែងជាមួយរុស្ស៊ី ដូច្នេះ ពួកគេ នឹងមានការប្រុងប្រយ័ត។ ដូច្នេះ នៅក្នុងន័យនេះ សំឡេងរបស់សម្ពន្ធមិត្តសហរដ្ឋអាមេរិក ដូចជាជប៉ុននិងកូរ៉េខាងត្បូងនិងដៃគូយុទ្ធសាស្ត្រផ្សេងៗទៀតដូចជាសិង្ហបុរីប្រហែលជាត្រូវនាំមុខដ៏សំខាន់ចំពោះការដាក់ទណ្ឌកម្មលើប្រទេសរុស្ស៊ី»។
ក៏ប៉ុន្តែ សូម្បីក្នុងចំណោមសម្ពន្ធមិត្តសហរដ្ឋអាមេរិកក៏ដោយ ស្ថានភាពអ៊ុយក្រែន អាចធ្វើឲ្យចំណងទាក់ទងមានការផ្លាស់ប្តូរជាមួយរុស្ស៊ី។ ទាំងប្រទេសកូរ៉េខាងត្បូងនិងជប៉ុន បានស្វះស្វែងធ្វើឲ្យមានទំនាក់ទំនងប្រសើឡើងជាមួយរដ្ឋាភិបាលក្រុងមូស្គូ។ ការខំប្រឹងប្រែងទាំងនេះ ឥឡូវនេះ ហាក់ដូចជាស្ថិតនៅក្នុងភាពគ្រោះថ្នាក់។
ឯកអគ្គរដ្ឋទូតរុស្ស៊ីប្រចាំនៅរដ្ឋធានីសេអ៊ូល បាននិយាយនៅសប្តាហ៍នេះថា ចំណងទាក់ទងរវាងរុស្ស៊ីនិងកូរ៉េខាងត្បូង មានភាពប្រសើឡើងក្នុងរយៈពេល៣០ឆ្នាំនេះ។ លោកនិយាយទៀតថា អ្វីៗហាក់ដូចជា«មានការផ្លាស់ប្តូរ»៕
ប្រែសម្រួលដោយ លោក ជឹង ប៉ូជីន