ក្រោយការថ្លែងព្រមានជាសាធារណៈរបស់លោកនាយករដ្ឋមន្រ្តី ហ៊ុន សែន លោក គង់ គាំ អ្នកនយោបាយជើងចាស់មួយរូប និងបច្ចុប្បន្នជាទីប្រឹក្សារបស់គណបក្សភ្លើងទៀន កំពុងប្រឈមនឹងពាក្យបណ្តឹងរបស់គណបក្សប្រជាជនកម្ពុជា និងលទ្ធភាពនៃការប្តឹងផ្តល់រឹបអូសផ្ទះរបស់លោកនៅក្នុងសង្កាត់ទន្លេបាសាក់២ ខណ្ឌចំការមន រាជធានីភ្នំពេញ។
កាលពីថ្ងៃចន្ទ លោកនាយករដ្ឋមន្ត្រី ហ៊ុន សែន បានព្រមានលោក គង់ គាំ ថា កុំឱ្យវាយប្រហារគណបក្សកាន់អំណាច ដោយលោកព្រមានប្តឹងផ្តល់តាមផ្លូវច្បាប់ផងដែរ។
ក្រោយការព្រមានរបស់លោក ហ៊ុន សែន គណបក្សប្រជាជនខេត្តត្បូងឃ្មុំបានដាក់ពាក្យបណ្តឹងទៅតុលាការ ប្តឹងលោក គង់ គាំ ពីបទ«ញុះញង់បង្កឱ្យមានភាពវឹកវរ ចលាចល អសន្តិសុខក្នុងសង្គម»ទាក់ទងនឹងការថ្លែងរបស់លោកក្នុងវេទិកាសាធារណៈនៅក្នុងពិធីសម្ពោធដាក់ឱ្យប្រើប្រាស់ស្នាក់ការគណបក្សភ្លើងទៀន ក្នុងខេត្តត្បូងឃ្មុំ កាលពីថ្ងៃទី៧ ខែមករា ឆ្នាំ២០២៣។
ពាក្យបណ្តឹងរបស់គណបក្សប្រជាជនកម្ពុជាខេត្តត្បូងឃ្មុំ ចុះថ្ងៃទី១០ ខែមករា ឆ្នាំ២០២៣ ស្រង់តាមសម្តីដើមរបស់លោក គង់ គាំថា៖ «...ខ្ញុំមិនចង់សំណេះសំណាលវែងទេ ប៉ុន្តែថ្ងៃនេះ គណបក្សប្រជាជនប្រហែលគេនាំគ្នារំឭកថ្ងៃកំណើតរបស់គេដែរហើយ។ យើងរំឭកថ្ងៃឈ្នះ ទាំងគណបក្សប្រជាជនកម្ពុជា ទាំងគណបក្សភ្លើងទៀន ជួបគ្នា។ ថ្ងៃនេះរំឭកគ្នា រំឭកថា ផឹកទឹកឱ្យនឹកប្រភព ជ្រកម្លប់ឱ្យនឹកអ្នកដាំ។ ខ្ញុំមិនដឹងទេ! ខ្ញុំធ្លាប់នៅគណបក្សប្រជាជនដែរកាលហ្នឹង។ គេប្រាប់ខ្ញុំឱ្យនឹកប្រភព»។
លោក គង់ គាំ ត្រូវបានប្តឹងទាមទារសំណងជំងឺចិត្តចំនួន៥០ម៉ឺនដុល្លារអាមេរិក។ នេះបើតាមពាក្យបណ្តឹងរបស់គណបក្សប្រជាជនកម្ពុជា ចុះថ្ងៃទី១០ ខែមករា ឆ្នាំ២០២៣។
ស្របពេលលោកប្រឈមនឹងពាក្យបណ្តឹងទៅតុលាការ អតីតរដ្ឋមន្រ្តីការបរទេសកម្ពុជា លោក ហោ ណាំហុង ក៏បានផ្តល់បទសម្ភាសន៍ដល់សារព័ត៌មាន Freshnews ដែលស្និទ្ធនឹងរដ្ឋាភិបាល និងត្រូវបានផ្សព្វផ្សាយកាលពីថ្ងៃអង្គារ។ លោក ហោ ណាំហុង អះអាងថា លោក គង់ គាំ បានលួចដីរបស់ក្រសួងការបរទេស កាលពីឆ្នាំ១៩៨១។
លោកថ្លែងថា៖ «សរុបសេចក្តីមក ខ្ញុំដឹងច្បាស់។ ផ្ទះនោះជាផ្ទះរបស់ក្រសួងការបរទេស។ មិនមានការអនុញ្ញាតផ្តល់ពីរដ្ឋមន្ត្រីក្រសួងការបរទេស ដែលកាលណោះ សម្តេចតេជោ ហ៊ុន សែន ជារដ្ឋមន្ត្រីការបរទេស ហើយក៏មិនមានការអនុញ្ញាតពីខ្ញុំ ជាអនុរដ្ឋមន្ត្រីការបរទេស។ មុនពេលខ្ញុំទៅម៉ូស្គូក៏មិនបានធ្វើលិខិតប្រគល់ផ្ទះនោះឱ្យ គង់ គាំ ក៏អត់មានដែរ។ លោក គង់ គាំ យកផ្ទះនេះរបស់ក្រសួងការបរទេស ដោយអត់មានច្បាប់ទម្លាប់ទេ លួចធ្វើកម្មសិទ្ធិករខ្លួនឯងទេ»។
លោក ហោ ណាំហុង ក៏បានព្រមានប្តឹងយកដីនោះមកវិញផងដែរ។
លោកបញ្ជាក់ក្នុងបទសម្ភាសន៍ជាមួយសារព័ត៌មាន Freshnews ថា៖ «សរុបមក ផ្ទះនេះជាផ្ទះរបស់ក្រសួង។ ក្រសួងមានសិទ្ធិពេញទីទាំងអស់ដើម្បីយកផ្ទះនេះឱ្យក្រសួងវិញ ដោយសារជាផ្ទះរបស់ក្រសួង»។
ជាការឆ្លើយតប លោក គង់ គាំ ទីប្រឹក្សារបស់គណបក្សភ្លើងទៀន ប្រាប់វីអូអេនៅថ្ងៃអង្គារនេះថា កាលណោះ លោកជាមន្ត្រីរបស់ក្រសួងការបរទេស ហេតុនេះការរស់នៅក្នុងផ្ទះរបស់ក្រសួងជារឿងធម្មតា ហើយការចូលទៅរស់នៅរបស់លោកក៏មិនមែនធ្វើឡើងដោយឯកឯងដែរ ប៉ុន្តែលោកក៏បានជូនដំណឹងទៅមន្ត្រីទទួលបន្ទុករបស់ក្រសួង ជាពិសេសលោកនាយករដ្ឋមន្ត្រី ហ៊ុន សែន ដែលកាលនោះលោកជារដ្ឋមន្ត្រីក្រសួងការបរទេស។
លោកបញ្ជាក់ថា៖ «ដូច្នេះវាអត់មានការចង់បាន អត់មានការលួចយកអីទេគឺថា ដោយមានតួនាទីហ្នឹង ហើយផ្ទះនោះទំនេរ អ៊ីចឹងហើយខ្ញុំនៅចាំថា គេហៅថា ខ្វះការគួរសមអីទេ គឺមុនហ្នឹងសម្រេចចូលមកនៅផ្ទះបច្ចុប្បន្នហ្នឹងក៏បានជូនព័ត៌មានទៅលោករដ្ឋមន្ត្រី ហ៊ុន សែន ហ្នឹងដែរ ដែលគាត់នៅជារដ្ឋមន្ត្រីនៅឡើយហ្នឹង»។
បើតាមលោក គង់ គាំ ផ្ទះរបស់លោកត្រូវបានផ្ទេរកម្មសិទ្ធិឱ្យលោកតាំងពីឆ្នាំ១៩៩០ ហើយកាលពីឆ្នាំ២០១៥ ក៏បានចាត់ចែងផ្ទេរសាជាថ្មីម្តងទៀតដើម្បីឱ្យវាកាន់តែរឹងមាំ។ លោកបញ្ជាក់ថា ការលើកឡើងពីបញ្ហានៅពេលនេះជារឿងមួយផ្នែកនៃការរឹតត្បិតសិទ្ធិសេរីភាពនយោបាយរបស់លោក ដោយហេតុថា លោកទើបតែបានចូលរួមជីវភាពនយោបាយជាមួយគណបក្សប្រឆាំង។
លោក គង់ គាំ បន្តថា ប្រសិនបើមានការប្តឹងផ្តល់ដើម្បីទាមទារយកមកវិញ ទុកឱ្យមន្ត្រីទទួលបន្ទុកជាអ្នកសម្រេចដោយផ្អែកទៅលើភស្តុតាង និងហេតុផលសមស្រប។
ទាក់ទងនឹងពាក្យបណ្តឹងរបស់គណបក្សប្រជាជនកម្ពុជាវិញ លោក គង់ គាំ អះអាងថា ការប្តឹងផ្តល់លោកដោយគណបក្សប្រជាជនកម្ពុជាពាក់ព័ន្ធជាមួយការថ្លែងរបស់លោកនៅក្នុងវេទិកាខេត្តត្បូងឃ្មុំជាការមិនត្រឹមត្រូវ ពីព្រោះថា វាគ្រាន់តែជាការបង្ហាញសាធារណជនឱ្យយល់ដឹងពីប្រភពដើម្បីដឹងគុណនៃគណបក្សនីមួយៗ។
លោកបញ្ជាក់ថា៖ «ដូច្នេះការលើកឡើងរបស់ខ្ញុំថា ផឹកទឹកឱ្យនឹកប្រភព ជ្រកម្លប់ឱ្យនឹកអ្នកដាំហ្នឹង ចំពោះប្រភពហើយ និងអ្នកដាំរបស់គណបក្សប្រជាជន អាស្រ័យលើមតិសាធារណៈ ឬសមាជិក និងអ្នកគាំទ្រគណបក្សប្រជាជនខ្លួនឯងទេ។ ខ្ញុំសំដៅតែរំឭកដល់សមាជិក ហើយនឹងអ្នកគាំទ្រគណបក្សភ្លើងទៀនទេដែលថា ប្រភពគឺកិច្ចព្រមព្រៀងទីក្រុងប៉ារីស ហើយប្រភពគឺរដ្ឋធម្មនុញ្ញព្រះរាជាណាចក្រកម្ពុជា ហើយអ្នកដាំគឺខ្មែរ អ្នកប្រជាធិបតេយ្យសេរីតែប៉ុណ្ណឹងទេ»។
លោក អំ សំអាត នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ ប្រាប់វីអូអេថា ការប្តឹងផ្តល់គ្នារបស់អ្នកនយោបាយ ជាទូទៅជារឿងនយោបាយច្រើនជាងការអនុវត្តច្បាប់។ លោកជំរុញឱ្យអ្នកនយោបាយមានការអត់ឱន អធ្យាស្រ័យចំពោះគ្នា ជាពិសេសជជែកគ្នាដើម្បីបង្កបរិយាកាសអំណោយផលមួយ នៅមុនការបោះឆ្នោតថ្នាក់ជាតិនាខែកក្កដា ឆ្នាំ២០២៣ខាងមុខ។
លោកបញ្ជាក់ថា៖ «យើងជាអង្គការសង្គមស៊ីវិល យើងចង់ឃើញអ្នកនយោបាយទាំងអស់ហ្នឹងឈរនៅលើគោលការណ៍មួយជជែកគ្នានៅក្នុងនាមជាខ្មែរ ជាខ្មែរដូចគ្នាដើម្បីធ្វើឱ្យបរិយាកាស ឬក៏សន្តិភាពនយោបាយនៅក្នុងប្រទេសកម្ពុជាហ្នឹងមានភាពល្អប្រសើរ ហើយបរិយាកាសមុនបោះឆ្នោត និងឆ្ពោះទៅរកការបោះឆ្នោតហ្នឹង គឺវាមានបរិយាកាសល្អ ហើយការបោះឆ្នោតប្រកបដោយភាពត្រឹមត្រូវ សេរី និងយុត្តិធម៌»។
បើតាមលោក អំ សំអាត វប្បធម៌សន្ទនាជាវិធីដ៏ត្រឹមត្រូវដែលអ្នកនយោបាយគួរដើរដើម្បីបង្កបរិយាកាសល្អសម្រាប់ការបោះឆ្នោត និងធានាផលប្រយោជន៍ជាតិ៕