ទីភ្នាក់ងារព័ត៌មាន AP បានរាយការណ៍ពីក្រុង Kandahar ប្រទេសអាហ្វហ្គានីស្ថានបានឲ្យដឹងថា គ្រួសារអាហ្វហ្គានីស្ថានមួយបានវិលត្រឡប់មកផ្ទះវិញ បន្ទាប់ពីបានរត់គេចខ្លួនពីលទ្ធភាពប្រតិបត្តិការយោធាមួយ។ ពួកគេបានរងគ្រោះថ្នាក់ដោយសារការផ្ទុះគ្រាប់បែកតាមដងផ្លូវមួយកាលពីថ្ងៃសៅរ៍នៅក្នុងតំបន់ខាងត្បូងប្រទេសដែលបណ្តាលឱ្យមនុស្សយ៉ាងតិចណាស់១២នាក់ស្លាប់និងមានរបួស៨នាក់ទៀត។
គ្រាប់បែកនោះបានផ្ទុះត្រូវចំឡានរបស់គ្រួសារនេះនៅក្នុងស្រុក Marjah នៃខេត្ត Helmand ដែលជាសំបុកមួយរបស់ពួកតាលីបង់។ លោក Nabil Jan Mullahkhail មេប៉ូលិសខេត្តបាននិយាយថា មានមនុស្សយ៉ាងហោចណាស់១២នាក់បានស្លាប់នៅក្នុងការផ្ទុះគ្រាប់បែកនេះ ហើយចំនួនមនុស្សស្លាប់អាចកើនឡើងថែមទៀត។
លោក Mohammad Salih ដែលជាញាតិសន្តានគ្រួសារនេះបាននិយាយថាគ្រួសារនេះបានរត់គេចខ្លួនកាលពីប៉ុន្មានថ្ងៃមុននេះក្រោយពីបានឮថារដ្ឋាភិបាលអាចបើកធ្វើការវាយលុកមួយនៅទីនោះ។ លោក Salih បានថ្លែងថាចំនួនមនុស្សស្លាប់ទំនងជាមានច្រើនជាងនេះពីព្រោះលោកជឿថា ញាតិសន្តានលោករហូតដល់២១នាក់បានបាត់បង់ជីវិតក្នុងការផ្ទុះគ្រាប់បែកនេះ។
គ្មាននរណាអះអាងទទួលខុសត្រូវដល់ការបំផ្ទុះគ្រាប់បែកនេះទេ។ ជាទម្លាប់ ពួកតាលីបង់បានដាក់គ្រាប់បែកនៅតាមដងផ្លូវដោយយកកងកម្លាំងសន្តិសុខជាទីដៅនៃការវាយប្រហារ ទោះណាជាជួនកាលគ្រាប់បែកបានផ្ទុះនៅពេលយានយន្តស៊ីវិលបើកកាត់ទីនោះ ដែលបណ្តាលឱ្យស្លាប់ជនស៊ីវិលទៅវិញ៕