រដ្ឋមន្រ្តីក្រសួងមហាផ្ទៃ លោក ស ខេង បានសម្រេចព្យួរការងាររបស់ស្នងការខេត្តកំពង់ធំ លោក អ៊ុក កុសល បណ្តោះអាសន្ន ខណៈមានការចោទប្រកាន់រឿងបៀតបៀនផ្លូវភេទរបស់ស្រ្តី ដែលជាមន្រ្តីធ្វើការនៅស្នងការដ្ឋាននគរបាលខេត្ត។
ក្នុងសេចក្តីសម្រេចមួយ ចុះថ្ងៃទី១២ ខែសីហា រដ្ឋមន្រ្តីមហាផ្ទៃបានសម្រេចផ្អាកការងារបណ្តោះអាសន្នរបស់ស្នងការនគរបាលខេត្តកំពង់ធំ លោក អ៊ុក កុសល។ ក្រសួងមហាផ្ទៃបានបញ្ជាឲ្យលោក អ៊ុក កុសល ត្រូវបង្ហាញខ្លួននៅនាយកដ្ឋានបុគ្គលិករៀងរាល់ម៉ោងធ្វើការ ដើម្បីរង់ចាំការសម្រេចជាថ្មី។ ស្នងការរងខេត្តកំពង់ធំលោក អ៊ិត គឹមស្រ៊ន ទទួលបន្ទុកជាស្នងការស្តីទី។
ក្រសួងមហាផ្ទៃមិនបានបញ្ជាក់មូលហេតុនៃការផ្អាកការងាររបស់ស្នងការរូបនោះទេ។
ការផ្អាកតួនាទីនេះធ្វើឡើង ក្រោយមានការប្តឹងផ្តល់របស់ក្រុមស្រ្តីជាមន្ត្រីនគរបាល តាមរយៈលិខិតមួយច្បាប់ ចុះថ្ងៃទី៣០ ខែកក្កដា ដាក់ទៅរដ្ឋមន្ត្រីក្រសួងមហាផ្ទៃលោក ស ខេង ដោយចោទស្នងការនគរបាលខេត្តកំពង់ធំថា បានបៀតបៀនផ្លូវភេទ។
ក្នុងពាក្យបណ្តឹងដែលមានស្នាមមេដៃរបស់ពួកគេ ពួកគេចោទលោក អ៊ុក កុសល ស្នងការនគរបាលខេត្តកំពង់ធំថា បានលួងលោមមន្ត្រីនគរបាលជាស្ត្រីឲ្យផ្តល់ខ្លួនប្រាណឲ្យលោក ឬអនុញ្ញាតឲ្យលោកប៉ះពាល់កេរភេទ ជាថ្នូរនឹងការបានឡើងឋានន្តរស័ក្តិ។ ពាក្យបណ្តឹងបញ្ជាក់ថា ក្រៅពីពាក្យសម្តីលួងលោម ស្នងការរូបនោះបានចាប់បង្ខំស្ទាបអង្អែលកេរខ្មាសដោយមិនញញើត។
វីអូអេបានព្យាយាមសុំការឆ្លើយតបពីលោក អ៊ុក កុសល តាមរយៈទូរស័ព្ទដៃទាំងពីរខ្សែរបស់លោក តែមិនទទួលបានការឆ្លើយតបទេ នៅថ្ងៃព្រហស្បតិ៍នេះ៕