ក្រុមសិទ្ធិមនុស្សនៅកូរ៉េខាងត្បូងនិយាយថា ខ្លួនរងសម្ពាធពីរដ្ឋាភិបាលចិន បន្ទាប់ពីផ្តល់កិត្តិយសដល់សកម្មជនក្រុងហុងកុងដែលជាប់ពន្ធនាគារ។ នេះ ជាករណីចុងក្រោយនៃការប៉ុនប៉ងរបស់រដ្ឋាភិបាលក្រុងប៉េកាំងដែលព្យាយាមបំបិទមាត់អ្នករិះគន់នៅកូរ៉េខាងត្បូង។
អង្គការមូលនិធិ១៨ ឧសភា នៅខែនេះ បានដាក់ឈ្មោះសកម្មជនគាំទ្រលទ្ធិប្រជាធិបតេយ្យហុងកុង អ្នកស្រី Chow Hang-tung ជាជ័យលាភីរង្វាន់សិទ្ធិមនុស្សប្រចាំឆ្នាំរបស់ខ្លួន។ ប៉ុន្មានថ្ងៃក្រោយមក មន្ត្រីចិនបីនាក់បានទាមទារឱ្យដកពានរង្វាន់វិញ។
ប្រធានអង្គការសិទ្ធិមនុស្សនេះ គឺលោក Won Sun-seok ចាត់ទុកសម្ពាធនេះជារឿងមិនសម ហេតុផលដោយនិយាយថា ស្ថានទូតបរទេសមិនគួរលូកដៃចូលក្នុងសកម្មភាពរបស់អង្គការក្រៅរដ្ឋាភិបាលទេ។
មន្ត្រីចិនបានហៅអ្នកស្រី Chow ថាជាឧក្រិដ្ឋជនដ៏គ្រោះថ្នាក់។ ក្រុមសិទ្ធិមនុស្សនិយាយថា អ្នកស្រីគឺជា «អ្នកទោសមនសិការ» និងជា «និមិត្តរូបនៃភាពក្លាហាន និងក្តីសង្ឃឹម» នៅក្នុងទីក្រុងហុងកុង។
អ្នកស្រី Chow កំពុងជាប់ពន្ធនាគាររយៈពេល ២២ ខែចំពោះការជួយរៀបចំការនៅចាំកំដរដើម្បីរំឭកដល់ការបង្ក្រាបនៅទីលាន Tiananmen ឆ្នាំ១៩៨៩។ អ្នកស្រីប្រឈមនឹងការជាប់ពន្ធនាគាររយៈពេល ១០ ឆ្នាំបន្ថែមទៀតពីបទ «ញុះញង់ឱ្យមានវិទ្ធង្សនា»។
អ្នកស្រី Chow បានក្លាយជាអ្នកប្រឆាំងមួយរូបក្នុងចំណោមអ្នកប្រឆាំងដែលនៅសេសសល់មួយចំនួននៅក្នុងទីក្រុងហុងកុង ដែលបានប្រឆាំងរដ្ឋាភិបាលដោយបើកចំហរ បន្ទាប់ពីការអនុម័តច្បាប់សន្តិសុខជាតិដ៏មានអានុភាពនៅឆ្នាំ២០២០។
រូបឯកសារ៖ សកម្មជនគាំទ្រលទ្ធិប្រជាធិបតេយ្យលើកទៀនក្នុងអំឡុងពេលរំឭកខួបលើកទី៣០ នៃការបង្ក្រាបចលនាគាំទ្រលទ្ធិប្រជាធិបតេយ្យរបស់ប្រទេសចិននៅទីលាន Tiananmen ទីក្រុងប៉េកាំង ឆ្នាំ ១៩៨៩ នៅ Victoria Park ក្នុងទីក្រុងហុងកុង កាលពីថ្ងៃទី៤ ខែមិថុនា ឆ្នាំ២០១៩។
នៅទីនេះ អ្នកស្រីកំពុងនិយាយជាមួយអ្នកសារព័ត៌មាននៅឆ្នាំ២០២១។ អ្នកស្រី Chow Hang -tung បានថ្លែងថា៖ «រដ្ឋាភិបាលតែងតែរិះគន់ពួកយើង សកម្មជន ក្រុមអ្នកគាំទ្រលទ្ធិប្រជាធិបតេយ្យចំពោះការធ្វើឱ្យហុងកុងមានអស្ថិរភាព។ ខ្ញុំគិតថា រដ្ឋាភិបាល និងច្បាប់សន្តិសុខជាតិនោះទេដែលធ្វើឱ្យហុងកុងមានអស្ថិរភាព»។
អ្នកស្រី Glacier Kwong ជាសកម្មជននយោបាយនៅហុងកុង។ អ្នកស្រី Glacier Kwong បានថ្លែងក្នុងសម្តីដើមថា៖ «ការជំរុញចិត្តរបស់អ្នកស្រីក្នុងការបន្តនិយាយ គឺដោយសារតែអ្នកស្រីជឿជាក់លើសិទ្ធិមនុស្ស អ្នកស្រីជឿជាក់លើសេរីភាពដូចជាសិទ្ធិពីកំណើតរបស់ប្រជាពលរដ្ឋហុងកុង និងចិន។ ហើយអ្នកស្រីគ្រាន់តែគិតថា នេះជារឿងត្រឹមត្រូវដែលត្រូវធ្វើ ហើយគ្មានអ្វីអាចរារាំងអ្នកស្រីបានទេ។ វាសាមញ្ញអ៊ីចឹងឯង»។
ចលនាគាំទ្រលទ្ធិប្រជាធិបតេយ្យរបស់ហុងកុងបានទាក់ទាញការគាំទ្រនៅក្នុងប្រទេសកូរ៉េខាងត្បូងដែលធ្លាប់បានតស៊ូអស់រយៈពេលជាច្រើនទសវត្សរ៍ដើម្បីលទ្ធិប្រជាធិបតេយ្យ។
ប៉ុន្តែចិនបានឆ្លើយតបចំពោះការបង្ហាញសាមគ្គីភាពរបស់កូរ៉េខាងត្បូងនេះជាមួយល្បិចអាក្រក់ៗ។
មហាវិទ្យាល័យនានាបានលុបចោលព្រឹត្តិការណ៍ជាមួយសកម្មជនហុងកុង ចំពេលមានសម្ពាធពីចិន។ មានការរាយការណ៍ផងដែរពីការវាយប្រហារដោយនិស្សិតចិនទៅលើមិត្តរួមថ្នាក់ជនជាតិកូរ៉េ ដែលបានបង្ហាញការគាំទ្រចំពោះការតវ៉ានៅហុងកុង។
លោក Won ប្រធានអង្គការសិទ្ធិមនុស្សនិយាយថា លោកស៊ាំនឹងសម្ពាធបែបនេះហើយ។ ក្នុងនាមជានិស្សិតមហាវិទ្យាល័យ លោកត្រូវបានកាត់ទោសឱ្យជាប់ពន្ធនាគារ២ឆ្នាំសម្រាប់ការតវ៉ាប្រឆាំងនឹងអតីតមេដឹកនាំយោធានៅកូរ៉េខាងត្បូងដែលគាំទ្រដោយសហរដ្ឋអាមេរិក។
លោក Won បានថ្លែងក្នុងសម្តីដើមថា៖ «យើងមិនចុះចាញ់នឹងសម្ពាធបែបនេះទេ»។ លោកបន្តថា ក្រុមរបស់លោកនឹងបន្តបង្ហាញសាមគ្គីភាពប្រឆាំងនឹងការគាបសង្កត់របស់រដ្ឋាភិបាល ទោះជាមាននៅទីណាក៏ដោយ៕
ប្រែសម្រួលដោយលោក ជឹង ប៉ូជីន