លោករដ្ឋមន្ត្រីការបរទេសស.រ.អា. Mike Pompeo បានមានប្រសាសន៍ប្រាប់វីអូអេកាលពីថ្ងៃព្រហស្បតិ៍ម្សិលមិញថា ស.រ.អា.គ្មានបំណងអនុញ្ញាតឱ្យរុស្ស៊ីសាកសួរចម្លើយលោក Michael McFaul អតីតឯកអគ្គរដ្ឋទូតរបស់រដ្ឋាភិបាលក្រុងវ៉ាស៊ីនតោន ប្រចាំក្រុងមូស្គូ និងជាអ្នករិះគន់ខ្លាំងក្លាដល់ប្រធានាធិបតីរុស្ស៊ី Vladimir Putin ទេ។
អ្នកការទូតស.រ.អា.កំពូលរូបនេះបាននិយាយនៅក្នុងសេចក្តីសម្ភាសន៍មួយនៅឯក្រសួងការបរទេសស.រ.អា.ថា «ការសាកសួរចម្លើយនេះនឹងមិនកើតមានឡើយ»។
លោក Pompeo បានមានប្រសាសន៍ថា លោក Putin «បានធ្វើសំណើមួយអំពីការណ៍មួយចំនួននៅក្នុងការសន្ទនាគ្នា» ដែលលោកបានធ្វើកាលពីថ្ងៃចន្ទនៅក្នុងជំនួបកំពូលរបស់លោកក្នុងក្រុងហែលស៊ិនគី ជាមួយលោកប្រធានាធិបតីស.រ.អា. ដូណាល់ ត្រាំ។
លោក Pompeo បានមានប្រសាសន៍ប្រាប់វីអូអេថា៖ «មានការស្នើ, អត្ថាធិប្បាយ, ការគិតពិចារណាដោយប្រធានាធិបតី Putin ស្តីពីការស៊ើបអង្កេតនេះ។ប្រធានាធិបតី ត្រាំ បាននិយាយច្បាស់លាស់ថា យើងនឹងមិនបង្ខំជនជាតិអាមេរិកាំងឱ្យធ្វើដំណើរទៅកាន់ប្រទេសរុស្ស៊ីដើម្បីឱ្យពួករុស្ស៊ីសាកសួរចម្លើយទេ»។
លោក Putin បានស្នើអនុញ្ញាតឱ្យពួកអ្នកស៊ើបអង្កេតរបស់លោកស្មាក្តីពិសេស Robert Mueller ធ្វើដំណើរទៅកាន់ក្រុងមូស្គូដើម្បីសម្ភាសពួកមន្ត្រីខាងស៊ើបការណ៍សម្ងាត់រុស្ស៊ី ១២នាក់ដែលបានត្រូវចោទប្រកាន់ជាផ្លូវការក្នុងការទាក់ទិនជាមួយការលបលួចចូលទៅក្នុងបណ្តាញកុំព្យូទ័រ របស់ពួកប្រជាធិបតេយ្យដែលធ្វើការយកជ័យជម្នះលើលោក ត្រាំ នៅក្នុងការបោះឆ្នោតកាលពីឆ្នាំ២០១៦ ជាថ្នូរនឹងការបើកឱ្យពួកមន្ត្រីរុស្សីសម្ភាសលោក McFaul; លោក Bill Browder អ្នកជំនួញអង់គ្លេសមានដើមកំណើតអាមេរិកាំងដែលបានធ្វើការឱ្យមានការអនុម័តសេចក្តីព្រាងច្បាប់មួយនៅក្នុងស.រ.អា.និងកន្លែងឯទៀតៗដើម្បីដាក់ទណ្ឌកម្មរុស្ស៊ីដោយសារការរំលោភលើសិទ្ធិមនុស្ស៕