ប្រធានាធិបតីអាមេរិកលោក Donald Trump បានរិះគន់លើស្ថានភាពនៃទំនាក់ទំនងរវាងរដ្ឋាភិបាលសហរដ្ឋអាមេរិក និងរដ្ឋាភិបាលរុស្ស៊ីនៅលើ Twitter។ ការរិះគន់របស់លោកនេះបានធ្វើឡើងនៅក្នុងរយៈពេលតែប៉ុន្មានម៉ោងប៉ុណ្ណោះមុនពេលលោកជួបប្រជុំទល់មុខគ្នាជាមួយនឹងប្រធានាធិបតីរុស្ស៊ីលោក Vladimir Putin។
លោក Trump បានសរសេរនៅលើ Twitter យ៉ាងដូច្នេះថា៖ «ទំនាក់ទំនងរបស់សហរដ្ឋអាមេរិកជាមួយនឹងរុស្ស៊ីមានលក្ខណៈកាន់តែអាក្រក់ឡើង ដោយសារតែភាពល្ងង់ខ្លៅ និងភាពភ្លីភ្លើរបស់សហរដ្ឋអាមេរិកអស់រយៈពេលជាច្រើនឆ្នាំកន្លងមក»។
លោក Trump ក៏បានសរសេរសារជាច្រើននៅលើ Twitter នៅពេលដែលលោកធ្វើដំណើរទៅកាន់ប្រទេសហ្វាំងឡង់ ដោយលោកបានបញ្ជាក់ថា ទោះបីជាលោកទទួលបានជោគជ័យនៅក្នុងជំនួបជាមួយនឹងលោក Putin ក៏ដោយ ក៏លោកនៅតែត្រូវគេរិះគន់ថាធ្វើមិនបានល្អដដែល។
នៅពេលដែលអ្នកសារព័ត៌មានសួរបន្ថែមអំពីបញ្ហានេះ នៅក្នុងអំឡុងពេលដែលលោកពិសាអាហារពេលព្រឹកជាមួយនឹងប្រធានាធិបតីហ្វាំងឡង់លោក Sauli Niinisto នៅឯវិមានប្រធានាធិបតីហ្វាំងឡង់ លោក Trump បានផ្ដោតតែទៅលើទំនាក់ទំនងទ្វេភាគីជាមួយនឹងរដ្ឋាភិបាលហ្វាំងឡង់ និងកិច្ចប្រជុំកាលពីសប្ដាហ៍មុនរបស់អង្គការអូតង់។
លោក Trump និងលោក Putin គ្រោងនឹងជួបជាមួយនឹងលោក Putin នៅរសៀលថ្ងៃចន្ទនេះ។
ជំនួបនេះបានកើតឡើង ៣ ថ្ងៃក្រោយមក បន្ទាប់ពីមេធាវីពិសេសសហរដ្ឋអាមេរិកលោក Robert Mueller បានចោទប្រកាន់មន្ត្រីស៊ើបការណ៍សម្ងាត់រុស្ស៊ី ១២ នាក់ ថាបានជ្រៀតជ្រែកចូលក្នុងការបោះឆ្នោតប្រធានាធិបតីអាមេរិកកាលពីឆ្នាំ ២០១៦ ដើម្បីជួយឲ្យលោក Trump ឈ្នះការបោះឆ្នោត៕
