រដ្ឋាភិបាលរបស់លោកនាយករដ្ឋមន្ត្រី Nawaz Sharif កាលពីពាក់កណ្ដាលខែឧសភានេះបានចេញបញ្ជាឲ្យនាយកដ្ឋានបទល្មើសបច្ចេកវិជ្ជានៃភ្នាក់ងារស៊ើបអង្កេតសហព័ន្ធ ឬ FIA បន្តនីតិវិធីប្រឆាំងលើសកម្មជនដែលធ្វើឲ្យ«ប៉ះពាល់ដល់កិត្តិយស»កងទ័ពជាតិ តាមរយៈបណ្ដាញផ្សព្វផ្សាយសង្គម។
ចាប់ពីពេលនោះមក ក្រុមអាជ្ញាធរបានបានឃុំខ្លួននិងសួរចម្លើយសកម្មជនដែលគេមិនដឹងចំនួនច្បាស់ ហើយបានដកហូតកុំព្យូទ័រក៏ដូចជាទូរស័ព្ទដៃរបស់ពួកគេផងដែរ។ អ្នកដែលត្រូវបានឃុំខ្លួនភាគច្រើនមកពីគណបក្សប្រឆាំងរបស់ប៉ាគីស្ថាន គឺគណបក្ស Tehrik-e-Insaf ឬ PTI ដែលដឹកនាំដោយលោក Imran Khan។
អង្គការឃ្លាំមើលឯករាជ្យមួយឈ្មោះថា គណៈកម្មការសិទ្ធិមនុស្សប៉ាគីស្ថាន ឬ HRCP បានរិះគន់យ៉ាងចាស់ដៃទៅលើការបង្ក្រាបនេះ។
ក្នុងសេចក្តីថ្លែងការណ៍មួយកាលពីថ្ងៃទី១៩ ខែឧសភា ក្រុមឃ្លាំមើលនេះបានទាមទារឲ្យបញ្ចប់ការគាបសង្កត់តាមទំនើងចិត្តទៅលើសេរីភាពនៃការបញ្ចេញមតិ និងបរិយាកាសគំរាមកំហែងលើសកម្មជននយោបាយ អ្នកសរសេរគេហទំព័រប្លុក អ្នកសារព័ត៌មាន និងសកម្មជនសង្គមស៊ីវិលដទៃទៀត។
បុរសម្នាក់កំពុងប្រើប្រាស់បណ្តាញសង្គមក្នុងហាងកាហ្វេមួយ នៅក្នុងទីក្រុងអ៊ីស្លាម៉ាបាដ ប្រទេសប៉ាគីស្ថាន។
គណៈកម្មការ HRCP បានសរសេរនៅក្នុងសេចក្តីថ្លែងការណ៍របស់ខ្លួនថា៖ «យើងសង្ឃឹមថា អាជ្ញាធរនឹងដឹងខ្លួនថា តើស្ថានភាពជាក់ស្តែងនឹងបញ្ជាក់យ៉ាងណាអំពីការបង្កអរិភាពរបស់ពួកគេទៅលើសេរីភាពនៃការបញ្ចេញមតិ»។
លោក Khan ក៏បានចោទប្រកាន់រដ្ឋាភិបាលដែរថា បានរំលោភលើច្បាប់ស្តីពីបទល្មើសបច្ចេកវិទ្យា ដោយធ្វើឲ្យសកម្មជនបណ្ដាញសង្គមរបស់គណបក្ស PTI ក្លាយជាជនរងគ្រោះដោយសាររឿងនយោបាយ។ អ្នកនយោបាយគណបក្សប្រឆាំងរូបនេះបានរៀបចំការធ្វើបាតុកម្មនៅតាមដងផ្លូវ ដើម្បីដាក់សម្ពាធឲ្យលោក Sharif ចុះចេញពីតំណែង ដោយបានចោទប្រកាន់លោកពីការប្រពឹត្តអំពើពុករលួយ។
លោក Khan បានព្រមានរដ្ឋាភិបាលរបស់លោក Sharif ខណៈពេលលោកបានថ្លែងទៅកាន់ការជួបជុំគណបក្សរបស់លោកនៅទីក្រុង Quetta ដែលស្ថិតនៅភាគនិរតីនៃប្រទេសដោយលោកបានថ្លែងថា៖
«សូមកុំបង្ខំឲ្យគណបក្ស PTI ចេញមកកាន់ដងផ្លូវឲ្យសោះ។ យើងនឹងមិនអនុញ្ញាតឲ្យលោក ( Nawaz Sharif) បំបិទមាត់សាធារណមតិដែលប្រឆាំងនឹងលោកជាដាច់ខាត»។
លោក Khan បានចោទប្រកាន់ថា តាមរយៈគណនីបណ្ដាញសង្គមក្លែងក្លាយ គណបក្សកាន់អំណាចបានបញ្ចេញយុទ្ធនាការប្រឆាំងនឹងកងទ័ព ដើម្បីបង្កើតឲ្យមានការបង្ក្រាបលើសកម្មជនតាមប្រព័ន្ធផ្សព្វផ្សាយសង្គមរបស់គណបក្ស PTI។ គណបក្សរបស់លោក Khan មានជំនាញក្នុងការប្រើប្រាស់ប្រព័ន្ធផ្សព្វផ្សាយសង្គមក្នុងការប្រមូលរកការគាំទ្រពីសាធារណជន និងលាតត្រដាងអំពីអំពើពុករលួយរបស់មេដឹកនាំរដ្ឋាភិបាលមួយចំនួន។
រដ្ឋាភិបាលរបស់លោក Sharif បានការពារនីតិធិវីដ៏តឹងរ៉ឹងរបស់ខ្លួននេះលើសកម្មជនបណ្ដាញផ្សព្វផ្សាយសង្គម ដោយពួកគេបាននិយាយថា រដ្ឋធម្មនុញ្ញមិនអនុញ្ញាតឲ្យពលរដ្ឋរិះគន់កងកម្លាំងប្រដាប់អាវុធឡើយ។
រដ្ឋមន្ត្រីក្រសួងមហាផ្ទៃសហព័ន្ធបានព្រមាន ខណៈដែលលោកបញ្ជាឲ្យក្រុមអាជ្ញាធរចាប់ និងចាត់វិធានការតឹងរ៉ឹងប្រឆាំងនឹងអ្នកទាំងឡាយណាដែលពាក់ព័ន្ធនឹងសកម្មភាពដែលគួរតែទទួលការស្តីបន្ទោស។ លោកបានថ្លែងថា៖ «ការចំអកដល់កងទ័ពប៉ាគីស្ថានឬមន្ត្រីកងទ័ពប៉ាគីស្ថាននៅលើប្រព័ន្ធផ្សព្វផ្សាយសង្គមដោយយករូបភាពសេរីភាពនៃការបញ្ចេញមតិមកការពារនោះ គឺមិនអាចទទួលយកបានឡើយ ហើយវាជាបទល្មើសធ្ងន់ធ្ងរដែលមានចែងក្នុងច្បាប់»។
នៅក្នុងសេចក្តីថ្លែងការណ៍របស់ខ្លួន អង្គការ HRCP បានច្រានចោលការអះអាងទាំងនោះ និងបានរំឭកដល់អាជ្ញាធរថា រដ្ឋធម្មនុញ្ញក៏បានចែងដែរថា ការរឹតត្បិតណាមួយដល់សេរីភាពនៃការបញ្ចេញមតិ «ត្រូវតែមានហេតុផលសមរម្យ និងមិនគួរមានឥទ្ធិពលឡើយបើសិនច្បាប់មិនអនុញ្ញាត»។
ស្ថានប័នយោធាដ៏មានឥទ្ធិពលនេះ បានគ្រប់គ្រងប្រទេសប៉ាគីស្ថានអស់រយៈពេលបីទសវត្សរ៍មកហើយ តាមរយៈការធ្វើរដ្ឋប្រហារដោយផ្ទាល់ ប្រឆាំងនឹងរដ្ឋាភិបាលស៊ីវិល។ ក្រុមអ្នកវិភាគនិយាយថា ស្ថាប័នយោធានៅបន្តមានឥទ្ធិពលលើកិច្ចការនយោបាយ ជាពិសេសបញ្ហាទាំងឡាយដែលទាក់ទងនឹងគោលនយោបាយការបរទេស។
កងយោធា ជាពិសេសភ្នាក់ងារស៊ើបអង្កេតរបស់ខ្លួន ក៏បានប្រឈមនឹងការរិះគន់ពីអន្តរជាតិដែរដោយសារតែត្រូវគេចោទប្រកាន់ថាបានផ្តល់ជម្រកដល់ក្រុមកងយុទ្ធជនដែលមានជាប់ពាក់ព័ន្ធនឹងការវាយប្រហារឆ្លងកាត់ព្រំដែនក្នុងប្រទេសអាហ្វហ្គានីស្ថាន និងឥណ្ឌា។
ក្រុមអ្នកវិភាគនិយាយថា បើទោះបីជាមានភាពចម្រូងចម្រាសជាច្រើនជុំវិញកងយោធានេះ ស្ថាប័ននេះបានទទួលផលប្រយោជន៍ពីមាត្រាជាច្រើនក្នុងរដ្ឋធម្មនុញ្ញដែលរារាំងការរិះគន់លើស្ថាប័ននេះ៕
ប្រែសម្រួលដោយ នៀម ឆេង