លោក John Lansing នាយកប្រតិបត្តិនៃក្រុមប្រឹក្សាភិបាលនៃការផ្សព្វផ្សាយ BBG ដែលជាអង្គការគ្រប់គ្រងលើប្រព័ន្ធផ្សព្វផ្សាយសំឡេងសហរដ្ឋអាមេរិក VOA បានបញ្ជាក់ប្រាប់ក្រុមពិភាក្សា ដែលប្រារព្ធថ្ងៃសេរីភាពសារព័ត៌មានពិភពលោកថា សង្គ្រាមព័ត៌មានកំពុងកើតឡើងនៅលើពិភពលោក។
ក្រុមប្រឹក្សាភិបាលនៃការផ្សព្វផ្សាយ BBG និងមហាវិទ្យាល័យប្រព័ន្ធផ្សព្វផ្សាយ និងកិច្ចការសាធារណៈ នៃសាកលវិទ្យាល័យ George Washington បានរៀបចំក្រុមពិភាក្សានេះ នៅក្នុងរដ្ឋធានីវ៉ាស៊ីនតោន កាលពីថ្ងៃច័ន្ទម្សិលមិញ ដើម្បីពិភាក្សាអំពីការប្រឈមនានានៃវិជ្ជាជីវៈសារព័ត៌មានអន្តរជាតិ ការកើនឡើងនៃព័ត៌មានមិនពិត និងមធ្យោបាយដែលប្រព័ន្ធផ្សព្វផ្សាយអាចបង្កើតនូវភាពជឿទុកចិត្តបាន។
លោក John Lansing បានលើកឡើងពីការចោទប្រកាន់ទៅលើប្រទេសរុស្ស៊ី ថាបានជ្រៀតជ្រែកចូលក្នុងការបោះឆ្នោតរបស់សហរដ្ឋអាមេរិកកាលពីឆ្នាំមុន។ លោកក៏បានបញ្ជាក់ផងដែរថា ពលរដ្ឋទូទៅគួរតែប្រុងប្រយ័ត្នចំពោះការរាយការណ៍ទាំងនោះ និងគួរតែបង្កើនការយកចិត្តទុកដាក់របស់ខ្លួនលើព័ត៌មានពិត។ បើមិនអញ្ចឹងទេ លោកខ្លាចថា លទ្ធផលនឹងមិនដឹងជាទៅជាយ៉ាងណានោះទេ។
អនុរដ្ឋមន្ត្រីការបរទេសស្ដីទីទទួលបន្ទុកកិច្ចការការទូតសាធារណៈ លោក Bruce Wharton ដែលជាសមាជិកមួយរូបនៃក្រុមប្រឹក្សាភិបាលរបស់ទីភ្នាក់ងារ BBG បាននិយាយថា៖ «បរិយាកាសប្រព័ន្ធផ្សព្វផ្សាយនៅជុំវិញពិភពលោកមានសភាពកាន់តែយ៉ាប់យ៉ឺនឡើង»។ លោកក៏បានបញ្ជាក់ទៀតថា «វាពិតជាមានសារៈសំខាន់ណាស់ ដែលយើងទាំងអស់គ្នាមកជួបជុំគ្នានៅទីនេះ ដើម្បីងើបឈរការពារសេរីភាពសារព័ត៌មាន»។
លោក Michael Oreskes អនុប្រធានជាន់ខ្ពស់ទទួលបន្ទុកខាងព័ត៌មាន និងជានាយកគ្រប់គ្រងលើការពិនិត្យផ្ទៀងផ្ទាត់ការផ្សព្វផ្សាយ នៃក្រុមហ៊ុនវិទ្យុជាតិសាធារណៈ NPRនៅក្នុងរដ្ឋធានីវ៉ាស៊ីនតោន បាននិយាយថា ការកើនឡើងនូវព័ត៌មានមិនពិត បានធ្វើឲ្យប៉ះពាល់ដល់មូលដ្ឋានចម្បងនៃវិជ្ជាជីវៈសារព័ត៌មាន៕
