លោក មាជ សុវណ្ណារ៉ា ប្រធាននាយកដ្ឋានព័ត៌មាន និងជាអនុប្រធានក្រុមការងារគណបក្សសង្គ្រោះជាតិប្រចាំខេត្តបន្ទាយមានជ័យត្រូវបានកងកម្លាំងមានសមត្ថកិច្ចស្លៀកពាក់ឯកសណ្ឋានស៊ីវិលបានចាប់ខ្លួន ក្នុងខណៈពេលដែលលោកកំពុងធ្វើដំណើរទៅកាន់ទីស្នាក់ការគណបក្សតាមបណ្តោយផ្លូវព្រះនរោត្តម។
មន្ត្រីប៉ូលិសអានដីកាតុលាការថា៖ «សម្រេច៖ ១- ឲ្យនាំខ្លួនឈ្មោះមាជ សុវណ្ណារ៉ា ដែលមានអត្តសញ្ញាណខាងលើនេះ។ ២- បង្គាប់មកកងកម្លាំងសារធារណៈឲ្យចាប់និងនាំខ្លួនឈ្មោះខាងលើនេះមកប្រគល់ជូនសាលាដំបូងរាជធានីភ្នំពេញដើម្បីចាត់ការតាមផ្លូវច្បាប់»។
នៅក្នុងដីកាបង្គាប់ឲ្យចាប់ខ្លួន តុលាការបានចោទប្រកាន់លោកមាជ សុវណ្ណារ៉ាពីបទ៖ «ដឹកនាំកុប្បកម្ម ញុះញង់ឲ្យប្រព្រឹត្តបទឧក្រិដ្ឋជាអាទិ៍ និង ផ្តើមគំនិតក្នុងអំពើហិង្សាដោយចេតនាដោយមានស្ថានទម្ងន់ទោស» ដែលបានប្រព្រឹត្តនៅទីលានប្រជាធិបតេយ្យកាលពីថ្ងៃទី១៥ខែកក្កដា តាមមាត្រាទី៤៥៩ មាត្រាទី៤៩៥ មាត្រាទី២៨ និងមាត្រាទី២១៨នៃក្រមព្រហ្មទណ្ឌថ្មី។
លោក មាជ សុវណ្ណារ៉ា ដែលជាស្ថាបនិកវិទ្យុខ្មែរប៉ុស្តិ៍ និងជាជនជាតិខ្មែរសញ្ជាតិអាមេរិកាំង បានប្រាប់វីអូអេសំឡេងសហរដ្ឋអាមេរិកប៉ុន្មាននាទីមុនពេលដែលសមត្ថកិច្ចបាននាំខ្លួន។ លោកបានបញ្ជាក់ថា លោកមិនបានប្រព្រឹត្តខុសដូចការចោទប្រកាន់របស់តុលាការទេ។
លោកមាជ សុវណ្ណារ៉ាមានប្រសាសន៍ថា ការចូលរួមបាតុកម្មរបស់លោកកន្លងមកគឺដោយសន្តិវិធី គ្មានគោលបំណងដើម្បីញុះញង់ប្រឆាំងនឹងរដ្ឋាភិបាលរបស់លោកនាយករដ្ឋមន្ត្រីហ៊ុន សែនទេ។
លោកនិយាយថា៖ «បាទ សុំឲ្យអ្នកកាសែតជាតិ និងអន្តរជាតិរកយុត្តិធម៌ ជូនខ្ញុំ ពីព្រោះខ្ញុំមកនេះធ្វើនយោបាយ ជានយោបាយស្របច្បាប់ អហិង្សាអត់មានមកផ្តួលរំលំរដ្ឋាភិបាលណាទេ ពីព្រោះខ្ញុំជាសញ្ជាតិខ្មែរអាមេរិកាំងម្នាក់។ ខ្ញុំស្រឡាញ់ជាតិខ្ញុំបាទ»។
លោក Jay Raman អ្នកនាំពាក្យស្ថានទូតសហរដ្ឋអាមេរិកប្រចាំកម្ពុជា មិនបានធ្វើអត្ថាធិប្បាយទេ។ លោកបានបញ្ជាក់តាមសារអេឡិចត្រូនិចថា លោកមិនធ្វើអត្ថាធិប្បាយរឿងបុគ្គល។
លោកមាជ សុវណ្ណារ៉ាត្រូវបានកងកម្លាំងមានសមត្ថកិច្ចដឹកតាមរថយន្តពីស្នងការប៉ូលិសក្រុងភ្នំពេញ រួចយកមកសារសួរនៅសាលាដំបូងក្រុងភ្នំពេញភ្លាម ពោលគឺសមត្ថកិច្ចមិនបានប្រើនីតិវិធីសាកសួររយៈពេល៤៨ម៉ោងទេ។
លោក កែ មុន្នី ចៅក្រមស៊ើបសួរនៃសាលាដំបូងក្រុងភ្នំពេញ ក្រោយពីបានសាកសួរអស់រយៈពេលជាងពីរម៉ោង បានសម្រេចចេញដីកាឃុំខ្លួនលោក មាជ សុវណ្ណារ៉ានៅពន្ធនាគារព្រៃសជាបណ្តោះអាសន្នដើម្បីរង់ចាំជំនុំជម្រះទោស។
លោកចៅក្រមមិនបានធ្វើអត្ថាធិប្បាយទេ ដោយសារតែតុលាការកំពុងដំណើរការនីតិវិធីរបស់តុលាការ។
លោកនិយាយថា៖ «ខ្ញុំកំពុងដំណើរការនីតិវិធី»។
នៅក្នុងបន្ទប់តុលាការ មានអ្នកតំណាងរាស្ត្រគណបក្សសង្គ្រោះជាតិដែលតុលាការធ្លាប់បានចាប់ឃុំកន្លងមក បានមកសាកសួរនិងលើកទឹកចិត្តដល់លោកមាជ សុវណ្ណារ៉ា។ ក៏ប៉ុន្តែពួកគេមិនអាចរារាំងដំណើរការផ្លូវច្បាប់បានទេគឺបានត្រឹមតែឈរមើលនីតិវិធីរបស់តុលាការដែលធ្លាប់បានទទួលរងការចោទប្រកាន់ថា នៅក្រោមឥទ្ធិពលគណបក្សកាន់អំណាចតែប៉ុណ្ណោះ។
លោកចាន់ ចេន មេធាវីការពារក្តីលោកមាជ សុវណ្ណារ៉ាមានប្រសាសន៍ថា ការចេញដីកាឃុំខ្លួនរបស់លោកចៅក្រមនេះគឺជាការរំលោភច្បាប់ ពីព្រោះកូនក្តីរបស់លោកមិនមានភស្តុតាងណាមួយដែលបញ្ជាក់ថា ដឹកនាំប៉ុនប៉ងផ្តួលរំលំរដ្ឋាភិបាលទេ។
លោកនិយាយថា៖«បើយើងឆ្លុះបញ្ជាំងពីអង្គហេតុ ភស្តុតាងនានា យើងឃើញថា កូនក្តីខ្ញុំមិនបានប្រព្រឹត្តដូចការចោទប្រកាន់ទេ ហើយវាមិនយុត្តិធម៌ទេចំពោះការចោទប្រកាន់របស់តំណាងអយ្យការ ហើយទីបំផុតចៅក្រមស៊ើបសួរគាត់បានយកកូនក្តីខ្ញុំដើម្បីយកទៅឃុំឃាំងនោះទេ»។
លោកយឹម សុវណ្ណ អ្នកនាំពាក្យគណបក្សសង្គ្រោះជាតិ បានហៅការចាប់ខ្លួនមន្ត្រីគណបក្សចុងក្រោយនេះថា នឹងអាចប៉ះពាល់ដល់ការចរចាក្នុងពេលដែលក្រុមការងារនៃគណបក្សទាំងពីរកំពុងជជែកអំពីសេចក្តីព្រៀងច្បាប់ស្តីពីការកែទម្រង់កិច្ចការបោះឆ្នោត។
លោកនិយាយថា៖ «នេះជាការលំបាក ជាការបារម្ភមួយដែលធ្វើឲ្យមានបរិយាកាសនយោបាយមិនល្អចំពោះការចរចា។ ទោះជាយ៉ាងណាក៏ដោយយើងមានជំនឿថា ថ្នាក់ដឹកនាំកំពូលនៃគណបក្សសង្គ្រោះជាតិនិងគណបក្សប្រជាជននឹងជួបជុំគ្នាដើម្បីដោះស្រាយបញ្ហាហ្នឹងដោយសន្តិវិធីហើយដំណោះស្រាយមិនខុសពីអ្វីដែលបានដោះស្រាយដូចករណីដែលធ្វើឡើងបែបនេះពីមុនមកទេ បាទ»។
សំណុំរឿងកាលពីថ្ងៃទី១៥ខែកក្កដាកន្លងទៅនេះ តុលាការមិនបានបោះបង់ចោលទេ បើទោះបីជាមកដល់ពេលនេះគណបក្សសង្គ្រោះជាតិបានសម្រេចចូលរួមក្នុងសភាដើម្បីបង្គ្រប់សិទ្ធិដល់គណបក្សប្រជាជនកម្ពុជាក៏ដោយ។
លោកកែម ឡី អ្នកវិភាគនយោបាយក្នុងសង្គម មានប្រសាសន៍ថា សំណុំរឿងនេះគណបក្សគ្រប់គ្រងអំណាចនិងបន្តលេងល្បែងនយោបាយនេះដើម្បីកៀបសង្កត់គណបក្សសង្គ្រោះជាតិ មិនឲ្យហ៊ានតវ៉ារឿងសមាសភាគគ.ជ.ប.ថ្មី៕