យន្ដហោះឯកជនមួយគ្រឿងដែលចេញដំណើរពីទីក្រុងមូស្គូ ទៅកាន់ទីក្រុង St. Petersburg បានធ្លាក់កាលពីថ្ងៃពុធ និងបានបង្កឱ្យមនុស្សទាំងអស់ ១០នាក់នៅលើនោះស្លាប់។ នេះបើយោងតាមការបញ្ជាក់របស់ក្រុមមន្ត្រីសង្គ្រោះបន្ទាន់រុស្ស៊ី។
មេដឹកនាំក្រុមទាហានស៊ីឈ្នួល Wagner លោក Yevgeny Prigozhin ក៏ស្ថិតនៅក្នុងបញ្ជីឈ្មោះអ្នកដំណើរនៅលើយន្ដហោះនោះផងដែរ ប៉ុន្តែគេមិនទាន់ដឹងច្បាស់ភ្លាមៗនៅឡើយទេ ថាលោកពិតជាបានជិះលើយន្ដហោះនោះឬមួយក៏អត់។ នេះបើតាមការបញ្ជាក់របស់ក្រុមមន្ត្រី។
សេចក្ដីរាយការណ៍ព័ត៌មានមួយចំនួនដែលមិនទាន់ត្រូវបានបញ្ជាក់ជាផ្លូវការ បានឱ្យដឹងថា យន្ដហោះនោះជារបស់ លោក Prigozhin ដែលជាស្ថាបនិកក្រុមទាហានស៊ីឈ្នួលឯកជន Wagner។
រូបឯកសារ៖ លោក Yevgeny Prigozhin មេក្រុមទាហានស៊ីឈ្នួល Wagner ឈរថតរូបក្នុងឯកសណ្ឋានទាហាននៅទីតាំងមួយដែលមិនត្រូវបានបញ្ជាក់ កាលពីថ្ងៃទី ២១ ខែសីហា ឆ្នាំ២០២៣។ (Courtesy PMC Wagner via Telegram via REUTERS)
ទីភ្នាក់ងារអាកាសចរណ៍ស៊ីវិលរបស់រុស្ស៊ី Rosaviatsia បាននិយាយថា លោក Prigozhin ស្ថិតនៅក្នុងបញ្ជីឈ្មោះអ្នកដំណើរនៅលើយន្តហោះនោះ។ តែជាទោះជាយ៉ាងណាក្ដី គេនៅមិនទាន់ដឹងច្បាស់ភ្លាមៗនៅឡើយទេ ថាលោក Prigozhin បានជិះយន្ដហោះនោះ ឬមួយក៏អត់។
ទីភ្នាក់ងារសារព័ត៌មាន Tass របស់រដ្ឋក្នុងប្រទេសរុស្ស៊ីបានដកស្រង់សម្ដីរបស់ក្រុមមន្ត្រីសង្គ្រោះបន្ទាន់ថា យន្ដហោះនោះមានអ្នកបើកយន្ដហោះចំនួន ៣នាក់ និងអ្នកដំណើរចំនួន ៧នាក់។ អាជ្ញាធរនិយាយថា ពួកគេកំពុងតែស៊ើបអង្កេតលើហេតុការណ៍ធ្លាក់យន្ដហោះនោះ។ ហេតុការណ៍នោះបានកើតឡើងនៅតំបន់ Tver ដែលមានចម្ងាយជាង ១០០ គីឡូម៉ែត្រនៅភាគខាងជើងទីក្រុងមូស្គូ។
លោក Prigozhin ដែលក្រុមទាហានស៊ីឈ្នួល Wagner របស់លោកបានប្រយុទ្ធព្រមគ្នាជាមួយនឹងទាហានរបស់រុស្ស៊ីនៅក្នុងប្រទេសអ៊ុយក្រែន បានធ្វើរដ្ឋប្រហារប្រដាប់អាវុធរយៈពេលខ្លីដោយមានការផ្សាយផ្ទាល់តាមបណ្ដាញសង្គម ប្រឆាំងនឹងមេដឹកនាំយោធារបស់រុស្ស៊ីកាលពីចុងខែមិថុនា។ វិមានក្រឹមឡាំងបានឱ្យដឹងថា លោក Prigozhin នឹងត្រូវធ្វើនិរទេសទៅប្រទេសបេឡារុស ហើយកូនទាហានរបស់លោកនឹងត្រូវចូលនិវត្តន៍ តាមទៅជាមួយនឹងលោក ឬមួយក៏ចូលរួមជាមួយនឹងយោធារុស្ស៊ី៕
ប្រែសម្រួលដោយអ្នកស្រី ហុង ចិន្ដា