លោកប្រធានាធិបតីអាមេរិក បារ៉ាក់ អូបាម៉ា បានសន្យាអំពីការគាំទ្ររបស់ស.រ.អា.ក្នុងរយៈពេលយូរដល់ទ្វីបអឺរ៉ុប និងបានសុំឱ្យមានឯកភាព«នៅពេលវេលាសំខាន់»មួយសម្រាប់សម្ព័ន្ធភាពអូតង់និងទ្វីបអឺរ៉ុប។
លោក អូបាម៉ា បានមានប្រសាសន៍នៅពេលបិទសន្និសីទកំពូលនៃអង្គការអូតង់ កាលពីថ្ងៃសៅរ៍ដែលពួកមន្ត្រីស.រ.អា.បានហៅថា ជាការប្រជុំសំខាន់បំផុតនៃសម្ព័ន្ធភាពនេះ ចាប់តាំងពីសង្គ្រាមត្រជាក់មក។ លោកថ្លែងថា៖ «នៅក្នុងពេលនេះដែលមានបញ្ហាច្រើន ខ្ញុំចង់យកឱកាសនេះនិយាយដោយច្បាស់លាស់ថា អ្វីដែលមិនប្រែប្រួលជាដាច់ខាតនោះគឺការប្តេជ្ញាគ្មានងាករេរបស់ស.រ.អា.ដល់សន្តិសុខ និងកិច្ចការពារទ្វីបអឺរ៉ុប ទំនាក់ទំនងឆ្លងកាត់មហាសមុទ្រអាត្លង់ទិច របស់យើង ការប្តេជ្ញារបស់យើងដល់កិច្ចការពាររួមគ្នារបស់យើង»។
ពួកមន្ត្រីអាមេរិកាំងបាននិយាយថា សន្និសីទកំពូលអូតង់នេះគឺជាចំណុចរបត់មួយដែលអង្គការអូតង់បានប្តូរការយកចិត្តទុកដាក់ពីការធានារ៉ាប់រងជាថ្មីទៅជាកាន់ការធ្វើឱ្យមានការរួញរាមិនឲ្យមានវាយប្រហារ។
នៅពេលចាប់ផ្តើមការប្រជុំសន្និសីទកំពូលនេះកាលពីថ្ងៃសុក្រ លោក អូបាម៉ា បានប្រកាសថាស.រ.អា. នឹងបញ្ជូនទាហានជិត១ពាន់នាក់ទៅកាន់ប្រទេសប៉ូឡូញជាផ្នែកមួយដែលពួកមន្ត្រីបាននិយាយថាជាកងកម្លាំងសមល្មមមួយដែលមានគោលដៅធ្វើឱ្យមានការរួញរាដល់អំពើឈ្លានពានរបស់ប្រទេសរុស្ស៊ី៕