លោកប្រធានាធិបតីចិនស៊ី ជីងពីង និងលោកប្រធានាធិបតីស.រ.អាបារ៉ាក់ អូបាម៉ានៅថ្ងៃសុក្រនេះ នឹងបន្តការពិភាក្សាគ្នាក្នុងគោលបំណងដោះស្រាយការខ្វែងគំនិតគ្នាលើការលួចយកព័ត៌មានតាមប្រព័ន្ធអ៊ីនធឺណិត ដែលគេមន្ទិលសង្ស័យថា ចិនបានធ្វើនោះលើគោលនយោបាយសេដ្ឋកិច្ចរបស់រដ្ឋាភិបាលក្រុងប៉េកាំង និងលើជម្លោះដែនដីនៅសមុទ្រចិនខាងត្បូង។
លោកអូបាម៉ានឹងទទួលស្វាគមន៍លោកស៊ីក្នុងពិធីសាយភោជន៍ផ្លូវរដ្ឋមួយនៅយប់ថ្ងៃសុក្រនេះ ។
កាលពីថ្ងៃព្រហស្បតិ៍លោកអូបាម៉ា និងលោកស៊ីបានដើរទៅកាន់កិច្ចប្រជុំក្នុងពេលទទួលទានអាហារពេលយប់ឯកជននៅទល់មុខសេតវិមាន ដែលនៅទីនោះអ្នកទាំងពីរផ្តោតទៅលើបញ្ហាសន្តិសុខប្រព័ន្ធអ៊ីនធឺណិត។
លោកស៊ី បានទៅដល់រដ្ឋធានីវ៉ាស៊ីនតោនកាលពីថ្ងៃព្រហស្បតិ៍ក្នុងការឈប់សំចតទី២ នៃទស្សនកិច្ចមួយសប្តាហ៍របស់លោកទៅកាន់ស.រ.អា ដែលបានចាប់ផ្តើមនៅទីក្រុង Seattle នៅឆ្នេរសមុទ្រប៉ាស៊ីហ្វិក ដែលនៅទីនោះលោកមេដឹកនាំចិនបានព្យាយាមធានាដល់បណ្តាក្រុមហ៊ុនស.រ.អាថា លោកកំពុងធ្វើការព្យាយាមដើម្បីបង្កើតឲ្យមានបរិយាកាសវិនិយោគទុនមួយឲ្យបានប្រសើរជាងសព្វថ្ងៃនៅក្នុងប្រទេសចិន៕