កងកម្លាំង ដែលគាំទ្រដោយសហរដ្ឋអាមេរិក បានខិតកាន់តែជិតដើម្បីរំដោះទឹកដីស៊ីរីចុងក្រោយ ដែលបានកាន់កាប់ដោយក្រុមភេរវកម្មរដ្ឋឥស្លាមរឹងទទឹង ក៏ប៉ុន្តែការវាយប្រហារចុងក្រោយ ប្រហែលនៅរយៈពេលប៉ុន្មានថ្ងៃទៀតតែប៉ុណ្ណោះ។
ក្រុមចម្រុះសាកលបានចេញសារតាមប្រព័ន្ធ Twitter កាលពីថ្ងៃពុធបាននិយាយថា «ពួកអ្នកប្រយុទ្ធក្រុមរដ្ឋឥស្លាមដែលរឹងទទឹងភាគច្រើន នៅតែស្ថិតនៅទីនោះ។ កងកម្លាំងដែលគាំទ្រដោយសហរដ្ឋអាមេរិក បន្តទទួលជនស៊ីវិលដែលប៉ុនប៉ងគេចចេញទៅកន្លែងសុវត្ថិភាព»។
សេចក្តីថ្លែងការណ៍របស់ក្រុមចម្រុះ បានកើតមានឡើងប៉ុន្មានម៉ោងបន្ទាប់ពីកងកម្លាំងប្រជាធិបតេយ្យស៊ីរីដែលដឹកនាំដោយជនជាតិភាគតិច Kurds បានបំបែកទីកន្លែងរបស់ក្រុមរដ្ឋឥស្លាម ដែលបានលាក់ខ្លួននៅក្នុងភូមិ Baghouz ដោយបានជួយរំដោះពួកអ្នកភូមិរាប់រយនាក់ រួមមានស្រ្តី និងកូនក្មេង។
លោក Mustafa Bali អ្នកនាំពាក្យកងកម្លាំងប្រជាធិបតេយ្យស៊ីរីដែលគាំទ្រដោយសហរដ្ឋអាមេរិក បានប្រាប់ទីភ្នាក់ងារព័ត៌មានបារាំងAFP ថា «បន្ទាប់ពីការព្យាយាមអស់រយៈពេលជាច្រើនថ្ងៃ យើង អាចជម្លៀសមនុស្សជាលើកទីមួយនៅថ្ងៃនេះ»។
ពួកអ្នកឃើញហេតុការណ៍ផ្ទាល់នឹងភ្នែក បាននិយាយថា ពួកគេបានឃើញក្បួនកុងវ័ររថយន្តធំៗចំនួន១០គ្រឿងបានចាកចេញពីទីតាំងរបស់ក្រុមរដ្ឋឥស្លាម ដែលជាទឹកដីដ៏តូចមួយគ្របដណ្តប់ដោយតង់ស្នាក់នៅ។
ពួកគេនិយាយថា រថយន្តធំៗទាំងនោះ បានដឹកមនុស្សរាប់រយនាក់។ យ៉ាងហោចណាស់ក៏រថយន្ត២គ្រឿងដែរ បានដឹកពួកបុរសដែលគេកំណត់អត្តសញ្ញាណថាជាក្រុមអ្នកប្រយុទ្ធរដ្ឋឥស្លាមដែលបានចុះចាញ់៕