ប្រធានាធិបតីអាមេរិកលោក Donald Trump បានសរសេរនៅលើ Twiiter ថា តំបន់គ្រប់គ្រងរបស់ក្រុមជ្រុលនិយមរដ្ឋឥស្លាម «ជិតដួលរលំ» ហើយ ប៉ុន្តែលោកបានព្រមានថានឹងទុកឲ្យយុទ្ធជនរាប់រយនាក់នៃក្រុមជ្រុលនិយមរដ្ឋឥស្លាមនោះបង្កការប៉ះពាល់ធំធេងដល់ប្រទេសកំណើតរបស់ពួកគេ ប្រសិនបើសម្ព័ន្ធមិត្តរបស់សហរដ្ឋអាមេរិកបដិសេធមិនទទួលយកពួកគេទៅកាត់ទោស។
សាររបស់លោក Trump ដែលសរសេរនៅរមណីយដ្ឋានកម្សាន្ត Mar-a-Lago របស់លោកនៅក្នុងរដ្ឋ Florida កាលពីថ្ងៃសៅរ៍ម្សិលមិញនេះ គឺជាការលើកឡើងដំបូងបង្អស់របស់លោក Trump អំពី ការប្រយុទ្ធប្រឆាំងនឹងក្រុមជ្រុលនិយមរដ្ឋឥស្លាម តាំងពីលោកនិយាយចុះនិយាយឡើងអំពីការប្រកាសអំពីរឿងនេះ នៅសេតវិមានកាលពីព្រឹកថ្ងៃសុក្រ។
លោក Trump និយាយនៅពេលនោះយ៉ាងដូច្នេះថា៖ «យើងមានការប្រកាសដ៏អស្ចារ្យជាច្រើនទាក់ទិននឹងប្រទេសស៊ីរី និងជ័យជម្នះរបស់យើងក្នុងការកម្ចាត់តំបន់គ្រប់គ្រងរបស់ក្រុមជ្រុលនិយមរដ្ឋឥស្លាម។ រឿងនេះនឹងត្រូវប្រកាសនៅក្នុងរយៈពេល ២៤ ម៉ោងក្រោយ»។
ប៉ុន្តែ លោក Trump បានប្រើសម្ដីបែបផ្សេងកាលពីល្ងាចថ្ងៃសៅរ៍ម្សិលមិញ ដោយលោកបានដាក់សម្ពាធលើសម្ព័ន្ធមិត្តរបស់អាមេរិកឲ្យប្រឹងប្រែងបន្ថែមទៀត ហើយនៅពេលនោះដែរ លោកបានប្រកាសថា «តំបន់គ្រប់គ្រងរបស់ក្រុមជ្រុលនិយមរដ្ឋឥស្លាមជិតដួលរលំ»។
លោក Trump និយាយដូច្នេះថា៖ «សហរដ្ឋអាមេរិកអំពាវនាវឲ្យអង់គ្លេស បារាំង អាល្លឺម៉ង់ និងសម្ព័ន្ធមិត្តដទៃទៀតនៅទ្វីបអឺរ៉ុបឲ្យទទួលយកយុទ្ធជន ISIS ជាង ៨ រយនាក់ ដែលយើងចាប់បាននៅក្នុងប្រទេសស៊ីរី ហើយយកពួកគេទៅកាត់ទោស។ ហើយវាមិនល្អនោះទេ ប្រសិនបើយើងត្រូវបង្ខំចិត្តដោះលែងពួកគេ»៕
