ភ្នំពេញ —
រយៈពេលជាងមួយខែកន្លងផុតទៅ លោកឃឹម សឿន បានសន្និដ្ឋានទាំងមិនអស់ចិត្តថាកូនប្រុសរបស់លោកពិតជាបានស្លាប់បាត់បង់ជីវិតទៅហើយ។
កូនប្រុសរបស់លោកឈ្មោះឃឹម សូផាត ហៅក្រៅថាជ្រូក អាយុ១៦ឆ្នាំ បានបាត់ខ្លួនក្នុងព្រឹត្តិការណ៍នៃការបាញ់បង្រ្កាបបាតុករជាកម្មកររោងចក្រនៅសួនឧស្សាហកម្មកាណាឌីយ៉ាកាលពីថ្ងៃទី៣ខែមករាកន្លងទៅក្នុងទីក្រុងភ្នំពេញ។
នៅក្នុងការបង្រ្កាបនោះមានមនុស្សចន្លោះពីបួនទៅប្រាំនាក់បានស្លាប់ របួស៣៩នាក់ និងមួយចំនួនទៀតត្រូវចាប់ខ្លួន។
លោក ឃឹម សឿន ថ្លែងថាលោកគ្មានសង្ឃឹមថាសូផាតកូនប្រុសលោកនៅមានជីវិតនោះទេ។
«បើវានៅរស់ រយៈពេលមួយខែជាងហើយ អត់មានទំនាក់ទំនង ដំណឹងអ្វីសោះ។ ខ្ញុំអស់សង្ឃឹមហើយ។ គេថាបើមិនឃើញមានតែក្រពើស៊ី»។
នៅថ្ងៃកើតហេតុមានសាក្សីខ្លះបានអះអាងថាពួកគេឃើញក្រុមកងកម្លាំងមានសមត្ថកិច្ចបាញ់សូផាតចំទ្រូងបណ្តាលឱ្យរបួសធ្ងន់ មុននឹងក្រុមកម្លាំងមានសមត្ថកិច្ចចាប់បោះរូបគេដាក់លើឡានទាហាន ហើយសូផាតបានបាត់ដំណឹងតាំងពីពេលនោះមក។
គ្រួសារលោក ឃឹម សឿន បានរៀបចំពិធីបុណ្យសពឱ្យសូផាតចំនួនពីរដងរួចមកហើយ គឺបីថ្ងៃនិង៧ថ្ងៃបន្ទាប់ពីឧបទ្ទវហេតុនេះ ហើយលោកគ្រោងនឹងធ្វើបុណ្យសពគម្រប់១០០ថ្ងៃឱ្យរូបគេម្តងទៀត។
«តូចចិត្តណាស់ និយាយមិនចង់ចេញ។ បើម៉ែវាពេលឮបងប្អូននៅជិតខាងនិយាយពីរឿងនេះ គឺសន្លប់រហូតតែម្តង។ ឥឡូវនៅសល់តែស្បែកនិងឆ្អឹងទេ ម៉ែវានោះ ដោយសារហួសចិត្ត ស្រឡាញ់កូន»។
លោក ឃឹម សឿន បានស្វែងរកកូនប្រុសលោកតាមមន្ទីរពេទ្យ វត្តអារាម និងទីកន្លែងសង្ស័យនានា ប៉ុន្តែនៅតែគ្មានតម្រុយពីកូនប្រុសលោកទាល់តែសោះ។ ប៉ុន្តែទោះបីជាក្តីរំពឹងថារកកូនលោកឃើញហាក់ដូចជារសាត់បាត់ក៏ដោយ ក៏លោកនៅតែមិនបោះបង់ការតាមរកកូនប្រុសលោកដែរ។ តាំងពីថ្ងៃកើតហេតុមកដល់ថ្ងៃនេះ លោកបានឡើងមកភ្នំពេញប្រហែល១០ដងហើយ។
លោកបានឡើងពីខេត្តស្វាយរៀងរបស់លោកមកកាន់រាជធានីភ្នំពេញរាល់ពេលដែលលោកទទួលដំណឹងថាគេបានប្រទះឃើញសាកសពកូនរបស់លោក។
លោកត្រូវបង្ខំចិត្តខ្ចីប្រាក់ពីអ្នកជិតខាងសម្រាប់ធ្វើសោហ៊ុយ ដើម្បីស៊ើបដំណឹងកូនលោក និងស្វែងរកអន្តរាគមន៍ពីសង្គមស៊ីវិលនានា ដូចជាអង្គការលីកាដូ អង្គការអាដហុក និងអង្គការសហប្រជាជាតិប្រចាំកម្ពុជាជាដើម។
លោក អំ សំអាត ប្រធានផ្នែកបច្ចេកទេសស៊ើបអង្កេតនៅអង្គការលីកាដូថ្លែងថាលោកនៅបន្តការស្រាវជ្រាវចំពោះការបាត់ខ្លួនរបស់សូផាតនេះ។
«ឥឡូវយើងមិនអាចធ្វើការសន្និដ្ឋានបានទេ។ យើងកំពុងតែបន្តការស្រាវជ្រាវបន្តទៀត»។
លោក ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេស ថ្លែងថាអាជ្ញាធរនាពេលកន្លងមកក៏បានស្វះស្វែងជួយរកសូផាតដែរ។
«អាជ្ញាធរជួយដែរ គឺជួយរកមើលក្នុងបញ្ជីឈ្មោះដែលមានក្នុងអំឡុងពេលដែលយើងធ្វើការឃាត់ខ្លួនកន្លងមក ប៉ុន្តែអត់ឃើញមានឈ្មោះនោះក្នុងបញ្ជីហ្នឹង»។
លោក ខេង ទីតូ លើកទឹកចិត្តឱ្យក្រុមគ្រួសារឬសាក្សីដែលបានឃើញផ្ទាល់ភ្នែកឱ្យដាក់ពាក្យបណ្តឹងទៅតុលាការ។
ប៉ុន្តែ លោក ឃឹម សឿន ថ្លែងថាលោកនៅតែមិនហ៊ានដាក់ពាក្យបណ្តឹងទៅតុលាការឬខាងសមត្ថកិច្ចនៅឡើយ ព្រោះលោកយល់ថាខ្លួនជាជនក្រីក្រ គ្មានអ្នកណារកយុត្តិធម៌ឱ្យគ្រួសារលោកទេ៕
កូនប្រុសរបស់លោកឈ្មោះឃឹម សូផាត ហៅក្រៅថាជ្រូក អាយុ១៦ឆ្នាំ បានបាត់ខ្លួនក្នុងព្រឹត្តិការណ៍នៃការបាញ់បង្រ្កាបបាតុករជាកម្មកររោងចក្រនៅសួនឧស្សាហកម្មកាណាឌីយ៉ាកាលពីថ្ងៃទី៣ខែមករាកន្លងទៅក្នុងទីក្រុងភ្នំពេញ។
នៅក្នុងការបង្រ្កាបនោះមានមនុស្សចន្លោះពីបួនទៅប្រាំនាក់បានស្លាប់ របួស៣៩នាក់ និងមួយចំនួនទៀតត្រូវចាប់ខ្លួន។
លោក ឃឹម សឿន ថ្លែងថាលោកគ្មានសង្ឃឹមថាសូផាតកូនប្រុសលោកនៅមានជីវិតនោះទេ។
«បើវានៅរស់ រយៈពេលមួយខែជាងហើយ អត់មានទំនាក់ទំនង ដំណឹងអ្វីសោះ។ ខ្ញុំអស់សង្ឃឹមហើយ។ គេថាបើមិនឃើញមានតែក្រពើស៊ី»។
នៅថ្ងៃកើតហេតុមានសាក្សីខ្លះបានអះអាងថាពួកគេឃើញក្រុមកងកម្លាំងមានសមត្ថកិច្ចបាញ់សូផាតចំទ្រូងបណ្តាលឱ្យរបួសធ្ងន់ មុននឹងក្រុមកម្លាំងមានសមត្ថកិច្ចចាប់បោះរូបគេដាក់លើឡានទាហាន ហើយសូផាតបានបាត់ដំណឹងតាំងពីពេលនោះមក។
គ្រួសារលោក ឃឹម សឿន បានរៀបចំពិធីបុណ្យសពឱ្យសូផាតចំនួនពីរដងរួចមកហើយ គឺបីថ្ងៃនិង៧ថ្ងៃបន្ទាប់ពីឧបទ្ទវហេតុនេះ ហើយលោកគ្រោងនឹងធ្វើបុណ្យសពគម្រប់១០០ថ្ងៃឱ្យរូបគេម្តងទៀត។
«តូចចិត្តណាស់ និយាយមិនចង់ចេញ។ បើម៉ែវាពេលឮបងប្អូននៅជិតខាងនិយាយពីរឿងនេះ គឺសន្លប់រហូតតែម្តង។ ឥឡូវនៅសល់តែស្បែកនិងឆ្អឹងទេ ម៉ែវានោះ ដោយសារហួសចិត្ត ស្រឡាញ់កូន»។
លោក ឃឹម សឿន បានស្វែងរកកូនប្រុសលោកតាមមន្ទីរពេទ្យ វត្តអារាម និងទីកន្លែងសង្ស័យនានា ប៉ុន្តែនៅតែគ្មានតម្រុយពីកូនប្រុសលោកទាល់តែសោះ។ ប៉ុន្តែទោះបីជាក្តីរំពឹងថារកកូនលោកឃើញហាក់ដូចជារសាត់បាត់ក៏ដោយ ក៏លោកនៅតែមិនបោះបង់ការតាមរកកូនប្រុសលោកដែរ។ តាំងពីថ្ងៃកើតហេតុមកដល់ថ្ងៃនេះ លោកបានឡើងមកភ្នំពេញប្រហែល១០ដងហើយ។
លោកបានឡើងពីខេត្តស្វាយរៀងរបស់លោកមកកាន់រាជធានីភ្នំពេញរាល់ពេលដែលលោកទទួលដំណឹងថាគេបានប្រទះឃើញសាកសពកូនរបស់លោក។
លោកត្រូវបង្ខំចិត្តខ្ចីប្រាក់ពីអ្នកជិតខាងសម្រាប់ធ្វើសោហ៊ុយ ដើម្បីស៊ើបដំណឹងកូនលោក និងស្វែងរកអន្តរាគមន៍ពីសង្គមស៊ីវិលនានា ដូចជាអង្គការលីកាដូ អង្គការអាដហុក និងអង្គការសហប្រជាជាតិប្រចាំកម្ពុជាជាដើម។
លោក អំ សំអាត ប្រធានផ្នែកបច្ចេកទេសស៊ើបអង្កេតនៅអង្គការលីកាដូថ្លែងថាលោកនៅបន្តការស្រាវជ្រាវចំពោះការបាត់ខ្លួនរបស់សូផាតនេះ។
«ឥឡូវយើងមិនអាចធ្វើការសន្និដ្ឋានបានទេ។ យើងកំពុងតែបន្តការស្រាវជ្រាវបន្តទៀត»។
លោក ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេស ថ្លែងថាអាជ្ញាធរនាពេលកន្លងមកក៏បានស្វះស្វែងជួយរកសូផាតដែរ។
«អាជ្ញាធរជួយដែរ គឺជួយរកមើលក្នុងបញ្ជីឈ្មោះដែលមានក្នុងអំឡុងពេលដែលយើងធ្វើការឃាត់ខ្លួនកន្លងមក ប៉ុន្តែអត់ឃើញមានឈ្មោះនោះក្នុងបញ្ជីហ្នឹង»។
លោក ខេង ទីតូ លើកទឹកចិត្តឱ្យក្រុមគ្រួសារឬសាក្សីដែលបានឃើញផ្ទាល់ភ្នែកឱ្យដាក់ពាក្យបណ្តឹងទៅតុលាការ។
ប៉ុន្តែ លោក ឃឹម សឿន ថ្លែងថាលោកនៅតែមិនហ៊ានដាក់ពាក្យបណ្តឹងទៅតុលាការឬខាងសមត្ថកិច្ចនៅឡើយ ព្រោះលោកយល់ថាខ្លួនជាជនក្រីក្រ គ្មានអ្នកណារកយុត្តិធម៌ឱ្យគ្រួសារលោកទេ៕