ក្រុមអ្នកសារព័ត៌មានក្នុងស្រុកបាននិយាយថាកងកម្លាំងសន្តិសុខបានរារាំងមិនឱ្យពួកគេយកព័ត៌មានអំពីការចាក់វ៉ាក់សាំងដល់ប្រជាជនដែលផ្លាស់ទីលំនៅនៅរដ្ឋ Rakhine ប្រទេសមីយ៉ាន់ម៉ាទេ។
អ្នកនាំពាក្យរដ្ឋាភិបាលយោធាមីយ៉ាន់ម៉ាលោកឧត្តមសេនីយ៍ទោ Zaw Min Tun បាននិយាយកាលពីចុងខែសីហាថា ជនជាតិភាគតិច Rohingya នឹងត្រូវចាក់វ៉ាក់សាំងកូវីដ១៩។
ប៉ុន្តែយ៉ាងហោចណាស់មានអ្នកកាសែតពីរក្រុមដែលព្យាយាមទៅយកព័ត៌មានអំពីការចាក់វ៉ាក់សាំងនៅជំរំជនភៀសខ្លួនក្នុងស្រុកបាននិយាយថាប៉ូលិសបានប្រាប់ថា ពួកគេមិនអាចចូលបានទេ។
លោក Tun Tha ការីនិពន្ធបណ្តាញព័ត៌មាន Western News នៅរដ្ឋ Rakhine បាននិយាយថា «មន្រ្តីប៉ូលិសបាននិយាយថា អ្នកសារព័ត៌មានមិនត្រូវបានអនុញ្ញាតឱ្យចូលទេ។ បើយើងចង់ចូលជំរំ យើងត្រូវតែសុំការអនុញ្ញាតពីអាជ្ញាធរ»។
លោក Tun Tha បានប្រាប់វីអូអេភាសាភូមាថា ប្រព័ន្ធផ្សព្វផ្សាយមានសេរីភាពយកព័ត៌មាន ដោយមិនចាំបាច់សុំការអនុញ្ញាតនៅជំរំផ្សេងទៀត លើកលែងនៅជំរំជនជាតិមូស្លីម។
កាលពីថ្ងៃទី១ ខែកញ្ញា ប៉ូលិសនៅទីក្រុងរ៉ង់ហ្គូនបានចាប់ខ្លួនអ្នកកាសែតស្រីម្នាក់ដែលបានលាក់ខ្លួនអស់រយៈពេល៤ខែ។ អ្នកស្រី Ma Thuzar ដែលធ្វើការឱ្យ Myanmar Pressphoto Agency និង The Friday Times News Journal បានជាប់ឃុំឃាំង៥ថ្ងៃមុនពេលអាជ្ញាធរបញ្ជាក់ពីការចាប់ខ្លួនគាត់។
អង្គការអ្នកយកព័ត៌មានគ្មានព្រំដែន(RSF) បាននិយាយថា មូលហេតុនៃការចាប់ខ្លួននិងទីកន្លែងបច្ចុប្បន្នរបស់អ្នកស្រីត្រូវបានលាក់បាំង។
អ្នកស្រី Ma Thuzar ជាអ្នកកាសែតម្នាក់ក្នុងចំណោមអ្នកសារព័ត៌មានរាប់សិបនាក់ដែលបច្ចុប្បន្នត្រូវបានយោធាមីយ៉ាន់ម៉ាឃុំខ្លួន។ អ្នកកាសែតជនជាតិអាមេរិកឈ្មោះ Danny Fenster ក៏ត្រូវបានឃាត់ខ្លួនជាង១០០ថ្ងៃចាប់តាំងពីពេលចាប់ខ្លួនលោកនៅអាកាសយានដ្ឋានទីក្រុងរ៉ង់ហ្គូនកាលពីខែឧសភា៕
(Elizabeth Hughes រួមចំណែកក្នុងសេចក្តីរាយការណ៍នេះ)