រដ្ឋមន្ត្រីក្រសួងការពារប្រទេសរបស់អាមេរិក លោក Jim Mattis ថ្លែងក្នុងពេលលោកចេញដំណើរទស្សនកិច្ចជាលើកដំបូងទីកាន់ទីក្រុង Islamabad ក្នុងនាមជាមេដឹកនាំទីក្រសួងការពារប្រទេសថា លោកគ្មានគម្រោងឆ្កឹះឆ្កៀលកិច្ចការផ្ទៃក្នុងប្រទេសប៉ាគីស្ថានទេ ប៉ុន្តែលោករំពឹងថា ប៉ាគីស្ថាននឹងប្រកាន់ខ្ជាប់នូវការសន្យារបស់ខ្លួន ក្នុងការប្រយុទ្ធប្រឆាំងនឹងអំពើភេរវកម្ម។
ដោយថ្លែងនៅលើយន្តហោះយោធា លោក Mattis និយាយថា លោកមិនរំពឹងថានឹងមានជជែកគ្នាតឹងតែង នៅក្នុងជំនួបជាមួយនាយករដ្ឋមន្ត្រីប៉ាគីស្ថាន លោក Shahid Khaqan Abbasin និងមេបញ្ជាការកងទ័ពលោក Qamar Javed Bajwa នោះទេ។
លោកMattisមានប្រសាសន៍ថា៖ «នេះមិនមែនជាវិធីសាស្ត្រដែលខ្ញុំយកទៅដោះស្រាយបញ្ហានោះទេ»។ ខ្ញុំជឿជាក់ថា យើងអាចស្វែងរកដោះស្រាយដ៏លំបាកនេះបាន ហើយបន្ទាប់មកយើងអាចធ្វើការជាមួយគ្នាបាន»។
កាលពីខែតុលា លោក Mattis បានព្រមានថា សហរដ្ឋអាមេរិកមានឆន្ទៈនឹងសហការជាមួយនឹងប៉ាគីស្ថានម្តងទៀត មុននឹងខ្លួនចាត់វិធានការបន្តបន្ទាប់ដែលចាំបាច់នានា ដើម្បីឆ្លើយតបទៅនឹងការចោទប្រកាន់ដែលថា ប៉ាគីស្ថានគាំទ្រដល់ពួកក្រុមសកម្មប្រយុទ្ធ។
កាលពីថ្ងៃអាទិត្យលោក Mattis ថ្លែងថា លោកនឹងព្យាយាមស្វែងរកដំណោះស្រាយរួមគ្នា តាមរយៈការស្តាប់ពីភាគីផ្សេងទៀតដោយមិនឈ្លានពាន៕
អស់រយៈពេលមួយទសវត្សរ៍មកហើយ សហរដ្ឋអាមេរិកបានចោទប្រកាន់ប៉ាគីស្ថានថាជាអ្នកផ្តល់ទីជម្រក ឬមានទំនាក់ទំនងជិតស្និទ្ធជាមួយក្រុមភេរវជន ដូចជាបណ្តាញ Haqqani និងក្រុម តាលីបង់ ដែលបានវាយប្រហារទៅលើកងកម្លាំងចម្រុះរបស់អង្គការអូតង់នៅប្រទេសអាហ្វហ្គានីស្ថានដែលជាប្រទេសជិតខាងនោះ៕