នៅក្នុងកិច្ចប្រជុំសមាជិកអង្គការអូតង់នៅក្នុងរដ្ឋធានីប្រ៊ុចសែល កាលពីថ្ងៃព្រហស្បតិ៍ លោក Jim Mattis រដ្ឋមន្ត្រីក្រសួងការពារប្រទេសរបស់អាមេរិកបានច្រានចោលកិច្ចសហប្រតិបត្តិយោធារវាងសហរដ្ឋអាមេរិកនិងរុស្ស៊ី ដោយសារតែស្ថានភាពមិនសូវល្អនាពេលបច្ចុប្បន្ននេះ។
លោក Mattis បានមានប្រសាសន៍នៅក្នុងសន្និសីទសារព័ត៌មានមួយនៅទីស្នាក់ការអង្គការអូតង់ថា «យើងមិនស្ថិតក្នុងជំហរមួយដើម្បីសហការទៅលើផ្នែកយោធានោះទេ។ ប៉ុន្តែមេដឹកនាំនយោបាយរបស់យើងនឹងចូលរួមនិងព្យាយាមសម្របសម្រួលគ្នា»។
ទំនាក់ទំនងរវាងប្រទេសទាំងពីរបានឈានដល់ចំណុចទាបបំផុតចាប់តាំងពីសង្គ្រាមត្រជាក់មក ដោយសារតែការចោទប្រកាន់ទៅលើរដ្ឋាភិបាលក្រុងមូស្គូ ថាបានពាក់ព័ន្ធនឹងការបោះឆ្នោតរបស់អាមេរិកកាលពីឆ្នាំមុន និងភាពគឃ្លើនរបស់រុស្ស៊ីទៅលើប្រទេសអ៊ុយក្រែន។
លោក Mattis បាននិយាយថា មុនពេលមានកិច្ចសហប្រតិបត្តិការយោធាជាមួយនឹងរុស្ស៊ី រុស្ស៊ីត្រូវបង្ហាញថា ខ្លួនអាចអនុវត្តទៅតាមច្បាប់អន្តរជាតិបាន។
លោក Mattis បានធ្វើអត្ថាធិប្បាយដូច្នេះ បន្ទាប់ពីរដ្ឋមន្ត្រីការពារប្រទេសរបស់រុស្ស៊ី លោក Sergei Shoigu បាននិយាយថា រដ្ឋាភិបាលក្រុងមូស្គូបានត្រៀមខ្លួនរួចរាល់ហើយក្នុងការស្តារកិច្ចសហប្រតិបត្តិការជាមួយនឹងក្រសួងការពារប្រទេសរបស់អាមេរិក»៕