នៅក្នុងលិខិតមួយកាលពីថ្ងៃទី១៨ ខែមេសាជូនក្រុមប្រឹក្សានេះហើយដែលត្រូវបានផ្សព្វផ្សាយកាលពីថ្ងៃព្រហស្បតិ៍ ឯកអគ្គរដ្ឋទូតលីប៊ី លោក ElmahdiElmajerbi បានសរសេរថា លោកសុំឱ្យក្រុមប្រឹក្សានេះបញ្ជូនបេសកកម្មស្វែងរកដើម្បីស៊ើបអង្កេតកងកម្លាំងស្មោះត្រង់នឹងបុរសខ្លាំងនៅលីប៊ីឈ្មោះ KhalifaHaftar។
រដ្ឋាភិបាលបានចោទប្រកាន់ថា កងកម្លាំងរបស់លោក Haftar បានសម្លាប់និងជម្លៀសជនស៊ីវិល បំផ្លាញទ្រព្យសម្បត្តិឯកជនជ្រើសរើសកុមារធ្វើទាហាននិងពាក់ព័ន្ធក្នុង «សង្គ្រាមនិងប្រទូស្តរាយនានា»។
កាលពីសប្ដាហ៍មុន លោកប្រធានាធិបតីអាមេរិក DonaldTrump បាននិយាយទូរស័ព្ទជាមួយលោកHaftar ហើយថា លោកបានគាំទ្រការវាយប្រហារលើក្រុងទ្រីប៉ូលី។ នេះបើតាមរបាយការណ៍របស់ Bloomberg។ កងកម្លាំងរបស់លោកHaftarបានចាប់ផ្តើមវាយលុកនៅថ្ងៃទី៤ ខែមេសាដើម្បីដណ្ដើមយករដ្ឋធានីនេះជាផ្នែកមួយនៃយុទ្ធនាការផ្តួលរំលំរដ្ឋាភិបាលដែលគាំទ្រដោយអង្គការសហប្រជាជាតិ។ កងទ័ពលោក Hafterឈ្មោះកងទ័ពជាតិលីប៊ីបានប្រយុទ្ធប្រឆាំងនឹងកងជីវពលដែលជាសម្ព័ន្ធមិត្តរដ្ឋាភិបាល។
កងកម្លាំងសម្ព័ន្ធមិត្តរបស់រដ្ឋាភិបាលបានចាប់ផ្តើមការវាយបកវិញកាលពីចុងសប្ដាហ៍មុនដែលនាំឲ្យមានការព្រមានពីគណៈកម្មាធិការកាកបាទក្រហមអន្តរជាតិថា តំបន់លំនៅដ្ឋានក្នុងក្រុងទ្រីប៉ូលីកំពុងក្លាយជាសមរភូមិ។ អង្គការសុខភាពពិភពលោកបានប៉ាន់ស្មានថា មនុស្សជាង២៧០ នាក់រួមទាំងជនស៊ីវិល ត្រូវបានសម្លាប់នៅក្នុងការប្រយុទ្ធគ្នា។ មនុស្សជាង១,៣០០ នាក់បានរងរបួសនិងជាង៣ម៉ឺន៥ពាន់នាក់ត្រូវបានបង្ខំឱ្យចាកចេញពីផ្ទះសម្បែង៕