លោករដ្ឋមន្ត្រីការបរទេសរុស្សី Sergei Lavrov និយាយនៅថ្ងៃចន្ទនេះថាកិច្ចចរចានៅក្នុងប្រទេសបេឡារុសគួរផ្ដោតការយកចិត្តទុកដាក់លើកិច្ចឈប់បាញ់គ្នាជាបន្ទាន់និងគ្មានលក្ខខណ្ឌរវាងក្រុមសកម្មប្រយុទ្ធ និងកងទ័ពអ៊ុយក្រែន។ ការលើកឡើងនេះធ្វើឡើងក្នុងអំឡុងពេលដែលមន្ត្រីជាន់ខ្ពស់មកពីប្រទេសរុស្សី អ៊ុយក្រែន និងតំណាងស្ថាប័នសន្តិសុខ និងសហប្រតិបត្តិការនៅទ្វីបអឺរ៉ុបកំពុងជួបប្រជុំគ្នានៅក្នុងទីក្រុង Minskរបស់ប្រទេសបេឡារុស។
ទោះបីជាយ៉ាងណាក្ដីគេមិនបានដឹងឲ្យបានច្បាស់លាស់ទេថា តើក្រុមសកម្មប្រយុទ្ធទាមទារបំបែករដ្ឋលម្អៀងទៅខាងរុស្សីនឹងចូលរួមក្នុងការប្រជុំនេះឬទេ។ លោក Lavrov ក៏បាននិយាយដែរថាគ្មានអន្តរាគមន៍យោធារុស្សីនៅក្នុងប្រទេសអ៊ុយក្រែននោះទេ៕