សមាគមខ្មែរកម្ពុជាក្រោមអំពាវនាវឱ្យរដ្ឋាភិបាលកម្ពុជា និងអង្គការអន្តរជាតិធ្វើ អន្តរាគមន៍ និងសម្របសម្រួលឱ្យមានការដោះលែងពលរដ្ឋវៀតណាមដើមកំណើតខ្មែរដែលកំពុងត្រូវបានឃុំខ្លួនចំនួន៣នាក់ និងបញ្ឈប់ការរឹតត្បិតសិទ្ធិសេរីភាពខ្មែរកម្ពុជាក្រោម។
ការអំពាវនាវនេះធ្វើឡើងបន្ទាប់ពីពលរដ្ឋខ្មែរកម្ពុជាក្រោមចំនួន៩នាក់ត្រូវបានអាជ្ញាធរវៀតណាមចាប់ខ្លួន ដោយចោទពីបទ «កេងចំណេញលើសិទ្ធិសេរីភាព និងលទ្ធិប្រជាធិបតេយ្យ បំពានផលប្រយោជន៍របស់រដ្ឋ និងសិទ្ធិសេរីភាពស្របច្បាប់នៃអង្គការចាត់តាំង និងបុគ្គល» កាលពីថ្ងៃទី៣១ ខែកក្កដា ឆ្នាំ២០២៣។ នេះបើតាមសេចក្តីថ្លែងការណ៍របស់អង្គការសមាគមខ្មែរកម្ពុជាក្រោម ចុះថ្ងៃទី១ ខែសីហា ឆ្នាំ២០២៣។
បើតាមសេចក្តីថ្លែងការណ៍ដដែលបន្ថែមថា ក្នុងចំណោមពួកគេទាំង៩នាក់ ៣នាក់កំពុងត្រូវបានឃុំខ្លួនបណ្តោះអាសន្ន ៣នាក់ត្រូវបានដោះលែងបន្ទាប់ពីនាំខ្លួនទៅស៊ើបសួរ ម្នាក់ត្រូវបានអាជ្ញាធរកោះហៅឱ្យចូលខ្លួនដើម្បីសាកសួរ ហើយពីរនាក់ទៀតកំពុងត្រូវបានឃ្លាំមើលយ៉ាងតឹងរ៉ឹងពីអាជ្ញាធរវៀតណាម។
លោក គឹម ស៊ីសំណា មន្ត្រីសម្របសម្រួលលេខាធិការដ្ឋាននៃអង្គការសមាគមខ្មែរកម្ពុជាក្រោម ចាត់ទុកការចាប់ខ្លួនខ្មែរកម្ពុជាក្រោមនេះថាជាការរំលោភច្បាប់អន្តរជាតិស្តីសិទ្ធិមនុស្ស ព្រមទាំងថាជាការធ្វើទុក្ខបុកម្នេញមកលើខ្មែរកម្ពុជាក្រោម។ លោកបន្ថែមដោយអំពាវនាវឱ្យបណ្តាប្រទេសដែលបានផ្តល់សច្ចាប័នលើសន្ធិសញ្ញាស្តីពីសិទ្ធិមនុស្សអន្តរជាតិដែលរួមមានកម្ពុជាផង សម្របសម្រួល និងអន្តរាគមន៍ឱ្យមានការដោះលែងពួកគេទាំង៣នាក់ដែលកំពុងជាប់ឃុំ និងផ្តល់សេរីភាពពេញលេញដល់ពលរដ្ឋខ្មែរកម្ពុជាក្រោមផ្សេងទៀត។
លោកថ្លែងថា៖ «អ៊ីចឹងប្រទេសទាំងអស់នេះហើយដែលមានភារកិច្ច ដែលបានគាំទ្រនូវសិទ្ធិទាំងពីរ(សិទ្ធិនយោបាយនិងសិទ្ធិពលរដ្ឋ) ដ៏សំខាន់ៗនៅលើពិភពលោកនេះដើម្បីឱ្យរដ្ឋាភិបាលវៀតណាមហ្នឹងគិតពិចារណាឡើងវិញ ហើយនឹងត្រូវដោះលែងអ្នកទាំងអស់នៅកម្ពុជាក្រោមហ្នឹង ហើយនិងបញ្ឈប់រាល់ការរឹតត្បិត ការបំភិតបំភ័យផ្សេងៗ ហើយនិងផ្តល់សិទ្ធិសេរីភាពមកជូនដល់ខ្មែរកម្ពុជាក្រោមស្របទៅតាមគោលការណ៍អន្តរជាតិវិញ»។
បើតាមលោក គឹម ស៊ីសំណា ការចាប់ខ្លួនពលរដ្ឋខ្មែរកម្ពុជាក្រោមទាំង៩នាក់នោះ ធ្វើឡើងបន្ទាប់ពីពួកគេបានចែកចាយសៀវភៅស្តីអំពីសិទ្ធិជនជាតិដើមភាគ និងអាវយឺតដែលមានបំផុសការយល់ដឹងអំពីសិទ្ធិជនជាតិដើមភាគតិច ដល់ពលរដ្ឋខ្មែរកម្ពុជាក្រោមផ្សេងទៀត។
លោក គឹម ស៊ីសំណា បន្ថែមថា ពលរដ្ឋខ្មែរកម្ពុជាក្រោមទាំងនោះមិនបានប្រព្រឹត្តដូចការចោទប្រកាន់របស់អាជ្ញាធរវៀតណាមឡើយ ដោយពួកគេមានមនសិការនៅក្នុងការសិក្សាស្វែងយល់ពីសិទ្ធិរបស់ជនជាតិដើមភាគតិច និងចង់ថែរក្សាទំនៀមទម្លាប់ វប្បធម៌ប្រពៃណី។
វីអូអេមិនទាន់អាចសុំការអត្ថាធិប្បាយពីស្ថានទូតវៀតណាមប្រចាំនៅកម្ពុជាតាមរយៈសារអេឡិចត្រូនិកអ៊ីមែលបាននៅឡើយទេ។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ លោក អំ សំអាត ប្រាប់វីអូអេនៅថ្ងៃពុធនេះថា ការចាប់ខ្លួនពលរដ្ឋខ្មែរក្រោមនេះជាការរំលោភសិទ្ធិមនុស្ស។ លោកថា បើទោះបីជាវៀតណាមជាប្រទេសកម្មុយនីស្តក្តី ប៉ុន្តែត្រូវតែគោរពទៅតាមសិទ្ធិមនុស្សអន្តរជាតិដែលបានផ្តល់សច្ចាប័ន។
លោកបញ្ជាក់ថា៖ «សេចក្តីថ្លែងការណ៍ជាសកលស្តីពីសិទ្ធិមនុស្ស គឺគេអនុវត្តជាទូទៅសម្រាប់មនុស្សជាតិនៅក្នុងពិភពលោក ទោះជាប្រទេសប្រកាន់លទ្ធិប្រជាធិបតេយ្យ ឬក៏កម្មុយនីស្តក៏ដោយ ក៏ត្រូវតែមានគោលការណ៍នៃការគោរពសិទ្ធិមនុស្ស និងការឱ្យតម្លៃទៅលើមនុស្សគ្រប់រូបដូចគ្នាដែរ»។
បើតាមលោក អំ សំអាត រដ្ឋាភិបាលកម្ពុជាអាចធ្វើកិច្ចសហប្រតិបត្តិការជាមួយរដ្ឋាភិបាលវៀតណាមដើម្បីជួយសម្របសម្រួលលើករណីនេះបានដែរ។
អ្នកនាំពាក្យរដ្ឋាភិបាលកម្ពុជា លោក ផៃ ស៊ីផាន បដិសេធមិនផ្តល់ការអត្ថាធិប្បាយជុំវិញករណីនេះ ដោយលោកប្រាប់ឱ្យទៅសួរខាងក្រសួងការបរទេសកម្ពុជា និងស្ថានទូតកម្ពុជាប្រចាំនៅប្រទេសវៀតណាមវិញ។
វីអូអេមិនអាចសុំការអត្ថាធិប្បាយពីលោក អាន សុខខឿន អ្នកនាំពាក្យក្រសួងការបរទេសកម្ពុជាបានទេ។ ចំណែកស្ថានទូតកម្ពុជាប្រចាំនៅវៀតណាមមិនទាន់ឆ្លើយតបសាររបស់វីអូអេតាមរយៈអ៊ីមែលនៅឡើយរហូតដល់ល្ងាចថ្ងៃពុធនេះ។
ដែនដីកម្ពុជាក្រោមមានទំហំ៦៧.៧០០គីឡូម៉ែត្រការ៉េ និងត្រូវជា២១ខេត្តដែលមានកោះធំៗចំនួនពីរគឺកោះត្រល់និងកោះត្រឡាច។ អាណានិគមបារំាងបានសម្រេចកាត់ដែនដីខ្មែរកម្ពុជាក្រោមឬកូសាំងស៊ីន ទៅឱ្យស្តេចបាវដាយរបស់វៀតណាមគ្រប់គ្រងជាផ្លូវការតាំងពីថ្ងៃទី៤ខែមិថុនា ឆ្នាំ១៩៤៩។
នេះមិនមែនជាលើកទីមួយទេដែលអាជ្ញាធរវៀតណាមបានចាប់ខ្លួនពលរដ្ឋខ្មែរកម្ពុជាក្រោមដែលបានធ្វើសកម្មភាពផ្សព្វផ្សាយ និងទាមទារសិទ្ធិផ្សេងៗ ក្នុងអំឡុងពេលដែលពួកគេកំពុងរស់នៅលើអតីតទឹកដីកម្ពុជាមួយនេះ។
បើតាមរបាយការណ៍របស់អង្គការឃ្លាំមើលសិទ្ធិមនុស្ស Human Rights Watch ការរំលោភសិទ្ធិសេរីភាព ការរំលោភដីធ្លី ការរឹតត្បិតមិនឲ្យពលរដ្ឋខ្មែរក្រោមរៀន និងបង្រៀនភាសាខ្មែរ ការលុបបំបាត់វប្បធម៌ប្រពៃណី និងសាសនា ការបង្កអំពើហិង្សាលើរូបរាងកាយ ការចាប់ឃុំខ្លួនក្នុងពន្ធនាគារ និងការមិនទទួលស្គាល់ប្រជាពលរដ្ឋខ្មែរក្រោមថា ជាជនជាតិដើម សុទ្ធសឹងតែជាបញ្ហាប្រឈម ដែលរដ្ឋាភិបាលវៀតណាមធ្វើមកលើពលរដ្ឋខ្មែរក្រោមដែលរស់នៅលើទឹកដីកម្ពុជាក្រោមសព្វថ្ងៃ៕
សមាគមខ្មែរកម្ពុជាក្រោមអំពាវនាវឱ្យអាជ្ញាធរកម្ពុជាសម្របសម្រួលករណីវៀតណាមចាប់ខ្លួនពលរដ្ឋខ្មែរក្រោម
រូបឯកសារ៖ យុវជនម្នាក់ធ្វើបាតុកម្មដោយមានកាន់ទង់ជាតិខ្មែរក្រោម នៅមុខស្ថានទូតវៀតណាមក្នុងរាជធានីភ្នំពេញ កាលពីថ្ងៃទី ២១ ខែកក្កដា ឆ្នាំ ២០១៤។
ភ្នំពេញ —