នាយករដ្ឋមន្ត្រីចក្រភពអង់គ្លេសលោក Boris Johnson បានសរសើរកិច្ចព្រមព្រៀងរបស់ប្រទេសជិត២០០ ដែលជំរុញកិច្ចខិតខំប្រឹងប្រែងប្រឆាំងនឹងការប្រែប្រួលអាកាសធាតុ ខណៈលោកបង្ហាញការខកចិត្ត ព្រោះសន្និសីទអង្គការសហប្រជាជាតិអំពីអាកាសធាតុ មានលទ្ធផលមិនខ្លាំងជាងនេះ។
លោក Johnson បាននិយាយនៅក្នុងសន្និសីទព័ត៌មានកាលពីថ្ងៃអាទិត្យថា «យើងអាចបញ្ចុះបញ្ចូល លួងលោម និងលើកទឹកចិត្ត ប៉ុន្តែយើងមិនអាចបង្ខំឱ្យប្រទេសដែលមានអធិបតេយ្យភាពធ្វើអ្វីដែលគេមិនចង់ធ្វើនោះទេ ។ ទីបំផុតវាជាសិទ្ធិសម្រេចរបស់ពួកគេ ហើយពួកគេត្រូវតែប្រកាន់អ៊ីចឹង»។
លោក Johnson បានប្រាប់អ្នកសារព័ត៌មានថា កិច្ចព្រមព្រៀងដែលសម្រេចនៅចុងបញ្ចប់នៃកិច្ចប្រជុំកំពូលរយៈពេលពីរសប្តាហ៍នៅទីក្រុង Glasgow ប្រទេសស្កុតលែននោះ «ពិតជាប្រវត្តិសាស្ត្រមួយ» ហើយវា «សម្លាប់ថាមពលធ្យូងថ្ម» ដោយការសន្យាបន្ថយការប្រើប្រាស់ធ្យូងថ្ម។
លោកបាននិយាយថា ទោះបីជាមានការខ្វែងគំនិតគ្នាអំពីវិសាលភាព និងល្បឿនវិធានការព្យាយាមកំហិតកំណើនកំដៅផែនដីក្នុងប៉ុន្មានទសវត្សរ៍ខាងមុខក៏ដោយ ក៏«ពិភពលោកកំពុងឆ្ពោះទៅរកទិសដៅត្រឹមត្រូវដែលមិនអាចប្រកែកបាន»។
អ្នកស្រី Patricia Espinosa លេខាធិការអង្គការសហប្រជាជាតិផ្នែកអាកាសធាតុ បានប្រាប់ទីភ្នាក់ងារព័ត៌មាន AP ថា ការដោះស្រាយបញ្ហាប្រឈម ដូចជាការប្រែប្រួលអាកាសធាតុ មិនអាចធ្វើបានក្នុងសន្និសីទតែមួយនោះទេ ប៉ុន្តែថា កិច្ចប្រជុំនៅ Glasgow សម្រេចបានលទ្ធផលវិជ្ជមានណាស់ ដោយវាផ្តល់មាគ៌ាច្បាស់លាស់អំពីអ្វីដែលយើងត្រូវធ្វើប៉ុន្មានឆ្នាំទៅមុខទៀត»។
អ្នកស្រី Espinosa និយាយថា «ខ្ញុំគិតថា អ្វីដែលយើងកំពុងឃើញក្នុងអត្ថបទ គឺថាជាលើកដំបូងហើយដែលយើងកំពុងនិយាយអំពីធ្យូងថ្ម និងផលិតផលឥន្ធនៈហ្វូស៊ីលក្នុងដំណើរការរបស់យើងដើម្បីទប់ស្កាត់ការប្រែប្រួលអាកាសធាតុ។ ហើយខ្ញុំគិតថា នោះជាជំហានដ៏ល្អឆ្ពោះទៅមុខ»៕
ព័ត៌មានខ្លះក្នុងសេចក្តីរាយការណ៍នេះ ដកស្រង់ពីទីភ្នាក់ងារព័ត៌មាន The Associated Press និង Agence France-Presse