ប្រទេសជប៉ុនបានប្រាប់ឲ្យដឹងថា សកម្មភាពខាងនាវាចរណ៍ដ៏គឃ្លើនរបស់ចិនក្នុងសមុទ្រចិនខាងកើត ជាការគម្រាមកំហែងដ៏ខ្លាំងដល់សន្តិសុខរបស់ជប៉ុន នៅពេលដែលនាយករដ្ឋមន្រ្តី Shizo Abe ជំរុញវិធានការដ៏ចម្រូងចម្រាសជាបន្តបន្ទាប់ ដែលមានគោលបំណងពង្រីកតួនាទីខាងយោធារបស់ជប៉ុន។
នៅក្នុងការពិនិត្យមើលឡើងវិញនូវវិស័យការពារប្រទេសប្រចាំឆ្នាំរបស់ខ្លួននៅថ្ងៃអង្គារនេះ ក្រសួងការពារជាតិជប៉ុន បានរិះគន់ការអភិវឌ្ឍអណ្តូងប្រេង និងឧស្ម័ននៅក្រោមបាតសមុទ្រក្នុងសមុទ្រចិនខាងកើតដោយរដ្ឋាភិបាលក្រុងប៉េកាំង និងការបង្កើនវត្តមានខាងយោធារបស់ចិននៅជិតប្រជុំកោះ ដែលជប៉ុនត្រួតត្រាដែលត្រូវបានទាមទារដោយប្រទេសចិនផងដែរ។
របាយការណ៍នោះ បានប្រកាសប្រឆាំងសកម្មភាពរបស់ចិននៅក្នុងសមុទ្រចិនខាងត្បូងដែលសម្បូរទៅដោយធនធាន ដែលនៅទីនោះចិនបានចាប់ផ្តើមស្ថាបនាកោះសិប្បនិមិត្តជាច្រើន។ នេះជាចំណាត់ការមួយ ដែលបានធ្វើឲ្យភាពតានតឹងរីកកាន់តែធំឡើងរវាងរដ្ឋាភិបាលក្រុងប៉េកាំង និងប្រទេសជិតខាងមួយចំនួនរបស់ខ្លួននៅតំបន់អាស៊ីខាងកើត។
របាយការណ៍នោះបានសន្និដ្ឋានថា «ប្រទេសចិន ជាពិសេសពាក់ព័ន្ធនឹងជម្លោះអំពីបញ្ហាផ្លូវនាវាចរណ៍ បានបន្តធ្វើសកម្មភាពគឃ្លើន ដែលរួមមានការប៉ុនប៉ងធ្វើការផ្លាស់ប្តូរស្ថានការណ៍ដោយការបង្ខំ ហើយបានប្រុងប្រៀបធ្វើការទាមទារដោយឯកត្តោភាគីរបស់ខ្លួនដោយគ្មានការសម្របសម្រួល»។
ក្រសួងការពារជាតិជប៉ុន ក៏បានកំណត់កម្មវិធីមីស៊ីលរបស់ប្រទេសកូរ៉េខាងជើង ជាការគម្រាមកំហែងដល់សន្តិសុខជប៉ុនផងដែរ៕