ពួកមន្ត្រីយោធាបាននិយាយកាលពីព្រឹកថ្ងៃសៅរ៍ថាកងយន្ត ហោះចម្បាំងអ៊ីស្រាអែលបានទម្លាក់គ្រាប់បែកលើរូងក្រោមដីនិងលេនដ្ឋានក្រោមដីរបស់ពួកហាម៉ាស់នៅប៉ែកខាងជើងនៃតំបន់ហ្កាហ្សា។ នេះជាសញ្ញាបង្ហាញការវាយ លុកលើដីនិងតាមអាកាសដើម្បីកម្ទេចក្រុមជនសកម្មប្រយុទ្ធហាម៉ាស់ដែលគ្រប់គ្រងហ្កាហ្សានៅក្រោយក្រុមនេះបានធ្វើការវាយប្រហារដ៏ប្រល័យក្នុងប៉ែកខាងត្បូងអ៊ីស្រាអែលកាលពីបីសប្តាហ៍មុននេះ។ ចំណែកឯមហាសន្និបាតអ.ស.ប.វិញបានអំពាវនាវឱ្យមានការឈប់បាញ់គ្នាខាងមនុស្សធម៌រវាងអ៊ីស្រាអេលនិងហាម៉ាស់ដើម្បីជួយជនស៊ីវីលហ្កាហ្សាដែលត្រូវឡោមព័ទ្ធ។
កងកម្លាំងការពារអ៊ីស្រាអែលបាននិយាយថាកងយន្តហោះប្រតិកម្មប្រយុទ្ធបានវាយ ប្រហារទីដៅក្រោមដីរាប់សិបនិងបានបំផ្លាញហេដ្ឋារចនាសម្ព័ន្ធគមនាគមន៍សំខាន់ៗ បណ្តាលឱ្យជិតគ្មានព័ត៌មាននិងនាំឱ្យអ្នកស្រុកតំបន់ហ្កាហ្សាប្រមាណ២លាន៣សែននាក់មិនអាចទាក់ទងនឹងប្រទេសក្រៅបាន។
លោកឧត្តមនាវី Daniel Hagari បាននិយាយប្រាប់សន្និសីទកាសែតតាមទូរទស្សន៍កាលពីយប់ថ្ងៃសុក្រថា«បន្ថែមលើការវាយប្រហារកាលពីពីរបីថ្ងៃមុននេះ កងកម្លាំងថ្មើរជើងបានពង្រីកកិច្ចប្រតិបត្តិការរបស់ពួកគេនៅយប់នេះ»។ លោកបាននិយាយបន្ថែមថាកងទ័ពអាកាសបានគ្រោងធ្វើការវាយប្រហារលើរូងក្រោមដីនិងហេដ្ឋារចនា សម្ព័ន្ធឯទៀតៗ។
អត្ថាធិប្បាយរបស់លោក Hagari បាននាំឱ្យមានសំណួរថាតើការលុកលុយថ្មើរជើងក្នុងតំបន់ហ្កាហ្សាដែលត្រូវរង់ចាំយូរមកហើយបានចាប់ផ្តើមធ្វើឬទេ។
កងកម្លាំងការពារអ៊ីស្រាអែល IDF បានប៉ុស្តតាម X ដែលពីមុនជា Twitterថា៖«កាលពីយប់មិញ កងយន្តហោះប្រតិកម្មប្រយុទ្ធនៃកងកម្លាំង IDF បានវាយប្រហារលើឈ្មោះ Asem Abu Rakaba ដែលជាប្រធានផ្នែកពហុអង់តែនរបស់ពួកហាម៉ាស់ ដោយបង្ហាញថាពួកគេប្រហែលបានសម្លាប់ប្រធានផ្នែកអាកាសរបស់ក្រុមជនសកម្មប្រយុទ្ធនេះ។
ការចុះផ្សាយនេះបានបន្តថា«ឈ្មោះ Abu Rakaba មានការទទួលខុសត្រូវដល់ UAVs ដ្រូន ឆ័ត្រយោងសំកាំង ការស្ទាក់និងការការពារខាងអាកាសរបស់ក្រុមហាម៉ាស់។ ជននោះបានចូលរួមក្នុងការចាត់ចែងការសម្លាប់រង្គាលកាលពីថ្ងៃទី៧តុលានិងបានបញ្ជាក្រុមភេរវជនដែលបានជ្រៀតចូលក្នុងអ៊ីស្រាអែលដោយប្រើឆ័ត្រយោងសំកាំង និងជាអ្នកទទួលខុសត្រូវដល់ការវាយប្រហារដោយដ្រូនលើប៉ុស្តិ៍នៃកងកម្លាំង IDF»។
អ្នកនាំពាក្យសន្តិសុខជាតិសេតវិមានលោក John Kirby បាននិយាយថាលោកបានឃើញរបាយការណ៍អំពីអ៊ីស្រាអែលពង្រីកកិច្ចប្រតិបត្តិការថ្មើរជើងនៅតំបន់ហ្កាហ្សាហើយ តែលោកមិនអធិប្បាយអំពីរឿងនេះទេ។
អ៊ីស្រាអែលបានប្រមូលទាហានបម្រុងនិងកងទាហានសកម្ម៣សែននាក់នៅខាងក្រៅតំបន់ហ្កាហ្សាដោយប្រុងប្រៀបសម្រាប់ការលុកលុយប្រឆាំងនឹងក្រុមសកម្មប្រយុទ្ធហាម៉ាស់។
អ៊ីស្រាអែលបានធ្វើការវាយប្រហារតាមអាកាសលើតំបន់ហ្កាហ្សាតាំងពីមានការវាយប្រហារដ៏ប្រល័យកាលពីថ្ងៃទី៧តុលារបស់ពួកហាម៉ាស់លើអ៊ីស្រាអែលបណ្តាលឱ្យមនុស្សប្រមាណ១ពាន់៤រយនាក់ស្លាប់ មានរួមកុមារនិងបានចាប់ចំណាប់ខ្មាំងជាង២រយនាក់ផងដែរ។
លោក Kirby បានថ្លែងថាសហរដ្ឋអាមេរិកគាំទ្រការផ្អាកសកម្មភាពយោធាអ៊ីស្រាអែលមួយរយៈក្នុងតំបន់ហ្កាហ្សាដើម្បីឱ្យមានការដឹកជញ្ជូនជំនួយមនុស្សធម៌ ប្រេងឥន្ធនៈនិងអគ្គិសនីទៅឱ្យជនស៊ីវីលនៅទីនោះនិងជាផ្នែកមួយនៃការប្រឹងប្រែង ប្រសិនបើអាចធ្វើបាន ដើម្បីយកចំណាប់ខ្មាំងជាង២រយនាក់ដែលពួកហាម៉ាស់បានចាប់ពង្រត់ឱ្យបានចេញពីហ្កាហ្សា។
កាលពីព្រឹកថ្ងៃសុក្រ ក្រុមហ៊ុនសេវាទូរសព្ទប៉ាឡេស្ទីន Jawwal បាននិយាយថាសេវាទូរសព្ទដៃ ទូរសព្ទមានខ្សែក្នុងផ្ទះនិងប្រព័ន្ធអ៊ិនធឺណិត បានត្រូវកាត់ផ្តាច់ដោយការ ទម្លាក់គ្រាប់បែកដ៏ខ្លាំងក្លា។ ការកាត់ផ្តាច់សេវាទាំងនេះបណ្តាលឱ្យគេមិនអាចដឹងជាបន្ទាន់អំពីចំនួនមនុស្សស្លាប់ដោយសារការវាយប្រហារនេះនិងអំពីសេចក្តីលម្អិតនៃការលុកលុយនេះបានទេ។ ទូរសព្ទប្រើផ្កាយរណបខ្លះនៅមានដំណើរការ។
សេចក្តីថ្លែងការណ៍មួយរបស់អង្គការអឌ្ឍចន្ទក្រហមប៉ាឡេស្ទីនបាននិយាយថាខ្លួនគ្មានការទាក់ទងទាំងស្រុងជាមួយបន្ទប់ប្រតិបត្តិការរបស់ខ្លួននៅហ្កាហ្សានិងក្រុមរបស់ខ្លួនដែលធ្វើប្រតិបត្តិការនៅនឹងកន្លែងទេ។
ការបោះឆ្នោតរបស់មហាសន្និបាតអង្គការសហប្រជាជាតិកាលពីថ្ងៃសុក្រ មហាសន្និបាតអ.ស.ប.បានអំពាវនាវដោយសំឡេងភាគច្រើនបំផុតឱ្យ មានការឈប់បាញ់គ្នាខាងមនុស្សធម៌ជាបន្ទាន់រវាងអ៊ីស្រាអែលនិងពួកជនសកម្មប្រយុទ្ធប៉ាឡេស្ទីនហាម៉ាស់និងទាមទារឱ្យមានការបញ្ជូនជំនួយឱ្យបានទៅដល់តំបន់ហ្កាហ្សាត្រូវឡោមព័ទ្ធនិងឱ្យមានការការពារជនស៊ីវិលផងដែរ។
សេចក្តីសម្រេចចិត្តនេះព្រាងដោយពួករដ្ឋអារ៉ាប់ត្រូវបានអនុម័តដោយមានសំឡេងគាំទ្រ១២០។ ចំណែកឯប្រទេស៤៥បានបោះឆ្នោតអនុប្បវាទនិងប្រទេស១៤ទៀតមានរួមអ៊ីស្រាអែលនិងសហរដ្ឋអាមេរិកផងបានបោះឆ្នោតជំទាស់។ មហាសន្និបាតអ.ស.ប.បានបោះឆ្នោតក្រោយពីក្រុមប្រឹក្សាសន្តិសុខគ្មានជោគជ័យក្នុងការចាត់វិធាន ការបួនដងកាលពីពីរសប្តាហ៍មុននេះ។ អ៊ីស្រាអែលបានហៅសេចក្តីសម្រេចចិត្តនេះរបស់អ.ស.ប.ថាជា«ភាពអាម៉ាស់»។
អ៊ីស្រាអែលបានច្រានចោលការអំពាវនាវឱ្យមានការឈប់បាញ់គ្នាបណ្តោះអាសន្នមួយនៅហ្កាហ្សា។ សហគមន៍អន្តរជាតិមានការរំខានដោយស្ថានភាពធ្ងន់ធ្ងរជាងមុនសម្រាប់មនុស្ស២លាន៣សែននាក់ជាប់គាំងនៅក្រោមការវាយប្រហារតាមអាកាសខ្លាំងក្លាដែលអ៊ីស្រាអែលមិនធ្លាប់ធ្វើខ្លាំងបែបនេះក្នុងតំបន់ជាប់នឹងសមុទ្រម៉េឌីទែរ៉ា ណេនេះ។
លោក Lior Haiat អ្នកនាំពាក្យក្រសួងការបរទេសអ៊ីស្រាអែលបាននិយាយកាលពីថ្ងៃសុក្រថា«អ៊ីស្រាអែលជំទាស់នឹងការផ្អាកការប្រយុទ្ធគ្នាខាងមនុស្សធម៌ឬការឈប់បាញ់គ្នានៅពេលនេះ»។ ចំណែកឯមន្ត្រីជាន់ខ្ពស់អ៊ីស្រាអែលម្នាក់បានថ្លែងថាការអំពាវនាវឱ្យមានការផ្អាកការប្រយុទ្ធគ្នាហាក់ដូចជា«មិនស្មោះត្រង់»។
ពួកហាម៉ាស់បានស្វាគមន៍ការអំពាវនាវរបស់មហាសន្និបាតអ.ស.ប.ឱ្យមានការឈប់បាញ់គ្នាខាងមនុស្សធម៌។
កាលពីយប់ថ្ងៃសុក្រ សមាជិកជាន់ខ្ពស់ម្នាក់នៃការិយាល័យនយោបាយរបស់ពួកហា ម៉ាស់លោក Ezzat al-Rishaq បាននិយាយថាក្រុមហាម៉ាស់បានប្រុងប្រៀបស្រេចហើយសម្រាប់ការលុកលុយរបស់អ៊ីស្រាអែលក្នុងតំបន់ហ្កាហ្សា។ លោកបាននិយាយតាមបណ្តាញសង្គម Telegram ថា«ប្រសិនបើ លោក Netanyahu សម្រេចចូលក្នុងតំបន់ហ្កាហ្សាយប់នេះ ការតស៊ូប្រុងប្រៀបស្រេចហើយ»។
ពួកមន្ត្រីអ៊ីស្រាអែលបានប្តេជ្ញាធ្វើឱ្យប្រាកដប្រជាថាពួកហាម៉ាស់មិនអាចធ្វើការវាយប្រហារគំរាមកំហែងអ៊ីស្រាអែលក្រោយការសម្លាប់រង្គាលរបស់ពួកគេកាលពីថ្ងៃទី៧តុលាបានទៀតទេ»។
ព័ត៌មានខ្លះនៃសេចក្តីរាយការណ៍នេះដកស្រង់ពីទីភ្នាក់ងារព័ត៌មានAP, Reuters និង AFP
ប្រែសម្រួលដោយលោក ឈឹម សុមេធ