យោធាអ៊ីស្រាអែលនិយាយនៅថ្ងៃព្រហស្បតិ៍នេះថាខ្លួនបានធ្វើកិច្ចប្រតិបត្តិការថ្មើរជើងនៅក្នុងតំបន់ ហ្កាហ្សាជាទីកន្លែងដែលអស់រយៈពេលជិត៣សប្តាហ៍ដែលកងទ័ពអ៊ីស្រាអែលបានធ្វើការវាយប្រហារតាមអាកាសដែលដៅលើពួកសកម្មប្រយុទ្ធហាម៉ាស់។
កងកម្លាំងការពារជាតិអ៊ីស្រាអែលបាននិយាយថារថក្រោះនិងទាហានថ្មើរជើងរបស់ខ្លួន«បានវាយប្រហារក្រុមតូចៗរបស់ភេរវជនជាច្រើន ហេដ្ឋារចនាសម្ព័ន្ធនិងទីកន្លែងបាញ់មីស៊ីលប្រឆាំងនឹងរថក្រោះ»មុនពេលវិលត្រឡប់មកកាន់ទឹកដីអ៊ីស្រាអែលវិញ។
កងកម្លាំងការពារជាតិអ៊ីស្រាអែលបាននិយាយថាកិច្ចប្រតិបត្តិការនេះបានធ្វើឡើងដើម្បីប្រុងប្រៀប«សម្រាប់ដំណាក់ការនៃការប្រយុទ្ធបន្ទាប់»។
ពួកមន្ត្រីអ៊ីស្រាអែលបានសន្យាធ្វើឱ្យប្រាកដថាពួកហាម៉ាស់លែងអាចធ្វើការវាយប្រហារដែលគំរាមកំហែងអ៊ីស្រាអែលតទៅទៀតបន្ទាប់ពីការវាយប្រហារថ្ងៃទី៧ ខែតុលាដោយក្រុមជនសកម្មប្រយុទ្ធដែលបានសម្លាប់មនុស្សប្រហែល១.៤០០នាក់។
យោធាអ៊ីស្រាអែលបានកោះហៅទាហានបម្រុង៣០០.០០០នាក់ហើយបានដាក់កងទ័ពនៅជិតព្រំដែនតំបន់ហ្កាហ្សាមុនពេលនៃការវាយប្រហារថ្មើជើងតាមការរំពឹងទុក។
នាយករដ្ឋមន្ត្រីអ៊ីស្រាអែលលោក Benjamin Netanyahuបាននិយាយនៅក្នុងសេចក្តីថ្លែងការណ៍ផ្សាយតាមទូរទស្សន៍កាលពីថ្ងៃពុធម្សិលមិញថាអ៊ីស្រាអែលបាន«ប្រុងប្រៀបការវាយប្រហារថ្មើរជើង។ ខ្ញុំនឹងមិនបរិយាយថានៅពេលណា តើប៉ុន្មានដងនោះទេ»។
ប្រធានាធិបតីសហរដ្ឋអាមេរិកលោក Joe Bidenបានសម្តែងការគាំទ្រកាលពីថ្ងៃពុធម្សិលមិញចំពោះអ្វីដែលឥឡូវនេះហាក់ដូចជាស្ថិតនៅឆ្ងាយពីគោលដៅដែលសហរដ្ឋអាមេរិកប៉ងប្រាថ្នាស្វះស្វែងរកជាយូរមកហើយសម្រាប់រដ្ឋដាច់ដោយពីគ្នានិងស្វ័យភាពរវាងអ៊ីស្រាអែលនិងប៉ាឡេស្ទីន។
លោកប្រធានាធិបតី Bidenបានមានប្រសាសន៍នៅឯសន្និសីទកាសែតនៅសេតវិមានថា៖«សេចក្តីប្រាថ្នារបស់ជនជាតិប៉ាឡេស្ទីនមិនអាចត្រូវព្រងើយកន្តើយនោះទេ។ អ៊ីស្រាអែលនិងប៉ាឡេស្ទីនសក្តិសមរស់នៅស្មើភាពគ្នា ប្រកៀកស្មាគ្នាក្នុងសុវត្ថិភាព សេចក្តីថ្លៃថ្នូនិងសន្តិភាព»៕
ព័ត៌មានខ្លះនៃសេចក្តីរាយការណ៍នេះដកស្រង់ពីទីភ្នាក់ងារសារព័ត៌មាន AP, AFP និង Reuters
