យន្តហោះចម្បាំងចិនមួយគ្រឿងបានហោះមកជិតយន្តហោះទម្លាក់គ្រាប់បែក B-52 មួយគ្រឿងរបស់អាមេរិកដែលកំពុងហោះលើសមុទ្រចិនខាងត្បូង ក្នុងគម្លាតប្រហែលជាង៣ម៉ែត្របន្តិចប៉ុណ្ណោះ ដែលវិះតែនឹងបង្កឱ្យមានឧប្បត្តិហេតុបុកគ្នាទៅហើយ។ នេះបើតាមការបញ្ជាក់របស់យោធាអាមេរិក ដោយបានលើកឡើងពីគ្រោះថ្នាក់ដែលអាចកើតមានឡើង ខណៈពេលដែលប្រទេសទាំង២កំពុងប្រជែងយកឥទ្ធិពលនៅក្នុងតំបន់នេះ។ នេះបើតាមការចេញផ្សាយរបស់ទីភ្នាក់ងារសារព័ត៌មាន AP។
នៅក្នុងសេចក្តីថ្លែងការណ៍មួយរបស់ទីបញ្ជាការដ្ឋានយោធាអាមេរិកប្រចាំតំបន់ឥណ្ឌូប៉ាស៊ីហ្វិក បានឱ្យដឹងថា ក្នុងការហោះស្កាត់ក្នុងពេលយប់នោះ យន្តហោះប្រយុទ្ធចិន Shenyang J-11 ដែលមានម៉ាស៊ីន២ បានហោះមកជិតនឹងយន្តហោះកងទ័ពអាកាសរបស់អាមេរិក «ក្នុងល្បឿនដ៏លឿនមិនអាចគ្រប់គ្រងបាន ដោយហោះពីក្រោម និងចំពីមុខ ក្នុងចម្ងាយជាង៣ម៉ែត្របន្តិចប៉ុណ្ណោះពីយន្តហោះB-52 របស់អាមេរិក ដោយធ្វើឱ្យយន្តហោះទាំង២ស្ថិតក្នុងស្ថានភាពដ៏គ្រោះថ្នាក់អាចបុកគ្នាបាន»។
ក្រសួងការបរទេសចិនមិនបានឆ្លើយតបភ្លាមៗទៅនឹងការសុំអត្ថាធិប្បាយលើរឿងនេះទេ ប៉ុន្តែកាលពីខែឧសភាកន្លងទៅ ដែលមានហេតុការណ៍ស្រដៀងគ្នាមួយដែរនោះ រដ្ឋាភិបាលចិន បានទាត់ចោលការប្រឆាំងតវ៉ារបស់អាមេរិក ដោយទាមទារថា រដ្ឋាភិបាលក្រុងវ៉ាស៊ីនតោន ត្រូវបញ្ឈប់ការហោះហើរយន្តហោះរបស់ខ្លួន លើតំបន់សមុទ្រចិនខាងត្បូងនេះ។
សហរដ្ឋអាមេរិកនិងសម្ព័ន្ធមិត្តរបស់ខ្លួន បានធ្វើសមយុទ្ធយោធាជាទៀតទាត់នៅក្នុងសមុទ្រចិនខាងត្បូង និងបានហោះហើរយន្តហោះរបស់ខ្លួនជាប្រចាំនៅលើតំបន់នោះ ដើម្បីបញ្ជាក់ឱ្យច្បាស់ថា ដែនទឹកនិងដែនអាកាសក្នុងតំបន់នេះ ជាដែនអន្តរជាតិ។
សហរដ្ឋអាមេរិកនិយាយថា ការហោះស្កាត់យន្តហោះអាមេរិកបានកើតឡើងជាញឹកញាប់ ដោយមានហេតុការណ៍ស្រដៀងគ្នានេះកើតឡើងប្រមាណ១៨០ដងមកហើយ ចាប់តាំងពីរដូវស្លឹកឈើជ្រុះក្នុងឆ្នាំ២០២១មក។
បើទោះបីជាយ៉ាងណាក៏ដោយ ក៏ការហោះស្កាត់យន្តហោះអាមេរិកក្នុងពេលកន្លងទៅ មិនបានជិតខ្លាំង ដូចការហោះស្កាត់កាលពីថ្ងៃអង្គារកន្លងទៅនេះទេ ហើយជាមួយនឹងភាពតានតឹងកំពុងឡើងខ្ពស់រួចស្រាប់ទៅហើយរវាងរដ្ឋាភិបាលក្រុងប៉េកាំងនិងរដ្ឋាភិបាលក្រុងវ៉ាស៊ីនតោននោះ ការបុកគ្នានៃយន្តហោះរបស់ប្រទេសទាំង២នេះ នឹងអាចនាំទៅបង្កើតឱ្យមានភាពតានតឹងកាន់តែខ្លាំងថែមទៀត៕
