អ៊ីស្រាអែលបានចាញ់ផ្តើមវាយប្រហារតាមអាកាសទៅលើតំបន់ Gaza នៅថ្ងៃសុក្រនេះ នៅក្នុងការឆ្លើយតបដល់ការបាញ់គ្រាប់រ៉ុក្កែតដោយក្រុមជនសកម្មប្រយុទ្ធនៅក្នុងដែនដីប៉ាឡេស្ទីន។ ការបាញ់តបតគ្នាបានកើតមានឡើង នៅពេលដែលមានភាពតានតឹងកើនឡើង បន្ទាប់ពីការវាយឆ្មក់ដ៏ប្រល័យដោយកងទ័ពអ៊ីស្រាអែលទៅលើតំបន់ West Bank ដែលកាន់កាប់ដោយអ៊ីស្រាអែល។
យោធាអ៊ីស្រាអែលបានប្រាប់ឱ្យដឹងថា ខ្លួនបានវាយប្រហារយ៉ាងតិចណាស់ក៏ពីរលើកដែរ ដៅលើក្រុមជនសកម្មប្រយុទ្ធ Jihad ដែលបានរងការចោទប្រកាន់ពីការបាញ់ទៅលើជនជាតិអ៊ីស្រាអែលជាច្រើននាក់នោះ។
មិនមានសេចក្តីរាយការណ៍ពីមនុស្សរងរបួសពីភាគីទាំងពីរទេ។ អ៊ីស្រាអែលបាននិយាយថា គ្រាប់រ៉ុក្កែតភាគច្រើនដែលបានបាញ់ចេញពីតំបន់ Gaza នោះត្រូវបានបាញ់ទម្លាក់ដោយប្រព័ន្ធការពាររបស់អ៊ីស្រាអែល។
ការបាញ់ឆ្លងកាត់ព្រំដែននៅថ្ងៃសុក្រនេះកើតមានឡើង បន្ទាប់ពីការវាយឆ្មក់របស់អ៊ីស្រាអែលទៅលើជំរំជនភៀសខ្លួនមួយកន្លែង កាលពីថ្ងៃព្រហស្បតិ៍ម្សិលមិញ នៅក្នុងតំបន់ Jenin ដែលបានសម្លាប់មនុស្ស ៩ នាក់ ដែលជាថ្ងៃបង្ហូរឈាមដ៏ខ្លាំងបំផុតនៅក្នុងតំបន់ West Bank ក្នុងរយៈពេលប៉ុន្មានឆ្នាំនេះ។
រហូតមកទល់ពេលនេះ មិនមានក្រុមណាមមួយអះអាងទទួលខុសត្រូវ ចំពោះការបាញ់គ្រាប់រ៉ុក្កែតចេញពីតំបន់ Gaza នោះទេ ក៏ប៉ុន្តែទាំងពួក Hamasនិង Islamic Jihad បានសន្យាធ្វើការឆ្លើយតបដល់ការវាយឆ្មក់របស់អ៊ីស្រាអែល កាលពីថ្ងៃព្រហស្បតិ៍ម្សិលមិញ នៅក្នុងតំបន់ West Bank ដែលបានសម្លាប់មនុស្ស ៩ នាក់នោះ៕
ព័ត៌មានខ្លះនៃសេចក្តីរាយការណ៍នេះផ្តល់ដោយទីភ្នាក់ងារព័ត៌មាន Reuters និង AFP