កងសន្តិសុខនៅស្ថានទូតអាមេរិកក្នុងទីក្រុងបាកដាដ ប្រទេសអ៊ីរ៉ាក់ នៅថ្ងៃអង្គារ បានបាញ់ឧស្ម័នបង្ហៀរទឹកភ្នែក ជាការឆ្លើយតបទៅនឹងក្រុមបាតុករដែលបានរំលោភចូលគែមនៃបរិវេណស្ថានទូត ពេលដែលពួកគេបានប្រមូលផ្តុំគ្នាថ្កោលទោសការវាយប្រហារតាមអាកាសរបស់សហរដ្ឋអាមេរិក ដែលតម្រង់គោលដៅទៅលើកងជីវពលគាំទ្រដោយប្រទេសអ៊ីរ៉ង់នៅក្នុងប្រទេសអ៊ីរ៉ាក់ និងស៊ីរី។
ហ្វូងមនុស្សម្នាដែលមានកំហឹង បានប្រើដែកគាស់និងបង្គោលតាមដងផ្លូវ ដើម្បីវាយកម្ទេចទ្វារធ្វើពីដែកថែបនៃស្ថានទូតអាមេរិក ក្រោយពីពួកគេ បានរំលោភឆ្លងចូលដល់បរិវេណស្ថានទូតនិងដុតប៉ុស្តិ៍យាមអស់យ៉ាងតិចមួយ។
ប្រព័ន្ធផ្សព្វផ្សាយអ៊ីរ៉ាក់បានរាយការណ៍ថា កងកម្លាំងសន្តិសុខរដ្ឋាភិបាល មិនបានធ្វើអន្តរាគមន៍ ដើម្បីបញ្ឈប់ក្រុមបាតុករ កុំឱ្យរំលោភចូលដល់តំបន់បៃតងដែលមានកម្លាំងការពារយ៉ាងរឹងមាំ ជាទីតាំងដែលស្ថានទូតស្ថិតនៅ ឬក៏កុំឱ្យចូលដល់បរិវេណស្ថានទូតផ្ទាល់នោះទេ។
ក្រសួងការបរទេសសហរដ្ឋអាមេរិកបានចេញសេចក្ដីថ្លែងការណ៍មួយ ដោយនិយាយថាបុគ្គលអាមេរិកាំងទាំងអស់មានសុវត្ថិភាព ហើយក៏គ្មានការប៉ះពាល់ណាមួយទៅលើពួកគេទេ។ ស្ថានទូតក៏ «គ្មានផែនការជម្លៀសបុគ្គលិក» ចេញពីស្ថានទូតនោះដែរ។
ឯកអគ្គរដ្ឋទូតអាមេរិកប្រចាំប្រទេសអ៊ីរ៉ាក់ គឺលោក Matt Tueller មិនស្ថិតនៅក្នុងស្ថានទូតនោះទេពេលដែលមានបាតុកម្មនោះ ដោយលោកបានធ្វើដំណើរជាលក្ខណៈឯកជន។
រដ្ឋមន្ត្រីការពារជាតិអាមេរិក លោក Mark Esper បានប្រកាសកាលពីថ្ងៃអង្គារថាសហរដ្ឋអាមេរិកនឹងបញ្ជូនកម្លាំងបន្ថែមទៀត ដើម្បីទៅជួយបុគ្គលស្ថានទូតនោះ។ ប៉ុន្តែលោកមិនបានផ្តល់សេចក្តីពិស្តារណាមួយទេ ទោះបីជាបណ្តាញផ្សព្វផ្សាយព័ត៌មានខ្លះ រាយការណ៍ថាកងកម្លាំងម៉ារីនរបស់សហរដ្ឋអាមេរិក កំពុងត្រូវបានបញ្ជូនទៅកាន់ទៅនោះក៏ដោយ។
រដ្ឋមន្ត្រីការបរទេសអាមេរិក លោក Mike Pompeo បាននិយាយគ្នាតាមទូរស័ព្ទជាមួយនាយករដ្ឋមន្ត្រីអ៊ីរ៉ាក់ លោក Adel Abdul Mahdi និងប្រធានាធិបតីអ៊ីរ៉ាក់ លោក Barham Salih ដើម្បីពិភាក្សាពីស្ថានការណ៍វិវត្តន៍ចុងក្រោយ៕