ប្រទេសអ៊ីរ៉ង់ប្រាប់ឲ្យដឹងថា ខ្លួននឹងហាមឃាត់ពលរដ្ឋសហរដ្ឋអាមេរិកទាំងអស់មិនឲ្យចូលក្នុងសាធារណរដ្ឋឥស្លាម នៅក្នុងការឆ្លើយតបទៅនឹងបទបញ្ជារបស់ប្រធានាធិបតីសហរដ្ឋអាមេរិក ដូណាល់ ត្រាំ ដែលបានកម្រិតជនអន្តោប្រវេសន៍មកពីប្រទេសកាន់សាសនាឥស្លាមចំនួន៧។
នៅក្នុងសេចក្តីថ្លែងការណ៍កាលពីថ្ងៃសៅរ ក្រសួងការបរទេសអ៊ីរ៉ង់បានភ្ជាប់ការហាមឃាត់ផ្ទាល់របស់ខ្លួនទៅនឹងបទបញ្ជារបស់ប្រធានាធិបតីត្រាំដែលរដ្ឋាភិបាលក្រុងតេហេរ៉ង់ បានហៅថា «ជាការប្រមាថមើលងាយដ៏ពិតប្រាកដដល់ពិភពលោកឥស្លាម។ សេចក្តីថ្លែងការណ៍នោះបានបន្តទស្សន៍ទាយថា បទបញ្ជាប្រធានាធិបតីរបស់លោកត្រាំ នឹងត្រូវកត់ត្រានៅក្នុងប្រវត្តិសាស្រ្តថាជាអំណោយដ៏ធំមួយដល់ពួកជ្រុលនិយមហើយនិងពួកអ្នកគាំទ្ររបស់គេ»។
រដ្ឋាភិបាលក្រុងតេហេរ៉ង់បានព្រមានទៀតថា ការហាមឃាត់របស់សហរដ្ឋអាមេរិកដែលបានធ្វើឡើងកាលពីថ្ងៃសុក្រដោយប្រធានាធិបតីត្រាំសម្រាប់រយៈពេល១២០ថ្ងៃ នឹងមិនធ្វើឲ្យប្រទេសអាមេរិកមានសុវត្ថិភាពកាន់តែខ្លាំងឡើងនោះទេ។ ក្រសួងការបរទេសអ៊ីរ៉ង់ក៏បានប្រាប់ឲ្យដឹងទៀតដែរថា វិធានការសងសឹករបស់ខ្លួន នឹងស្ថិតនៅជាធរមានរហូតទាល់តែការរឹតត្បិតរបស់សហរដ្ឋអាមេរិកត្រូវបានលុបចោល។
ប្រតិកម្មរបស់អ៊ីរ៉ង់ជាការឆ្លើយតបផ្លូវការលើកទី១ពីប្រទេសកាន់សាសនាឥស្លាមសំខាន់ៗចំនួន៧ដែលមានឈ្មោះនៅក្នុងបញ្ជីហាមឃាត់របស់ប្រធានាធិបតីត្រាំ។ប្រទេស៦ផ្សេងទៀតមាន អ៊ីរ៉ាក់ លីប៊ី ស៊ីរី ស៊ូដង់ យេម៉ែន និងប្រទេសសូម៉ាលី។
បទបញ្ជារបស់លោកប្រធានាធិបតីត្រាំ ផ្អាកមិនឲ្យជនភៀសខ្លួនទាំងអស់ចូលក្នុងសហរដ្ឋអាមេរិកចំនួន៤ខែ ហើយរារាំងជនភៀសខ្លួនស៊ីរីជារៀងរហូត។បទបញ្ជាប្រធានាធិបតីនោះក៏បានហាមឃាត់អ្នកមាន Green Card មកពីប្រទេសទាំង៧នោះមិនឲ្យចូលក្នុងទឹកដីសហរដ្ឋអាមេរិកដែរ ខណៈដែលបទបញ្ជានោះបានបញ្ជារឲ្យទីភ្នាក់ងារនានារបស់សហរដ្ឋអាមេរិករៀបចំបែបបទសម្រាប់អ្នកកាន់គ្រឹស្តសាសនានៅក្នុងប្រទេសទាំងនោះឲ្យបានចូលក្នុងសហរដ្ឋអាមេរិកយ៉ាងលឿន៕