អ្នកនាំពាក្យអង្គការឃ្លាំមើលថាមពលបរិមាណូអ៊ីរ៉ង់ នៅថ្ងៃចន្ទនេះ បាននិយាយថាក្នុងពេលឆាប់នេះខាងមុខនេះ ប្រទេសអ៊ីរ៉ង់នឹងមានស្តុកសារធាតុអ៊ុយរ៉ាញ៉ូមលើសចំនួនកំណត់ពីចំនួន ដែលត្រូវបានអនុញ្ញាតឲ្យរក្សាទុកដូច ដែលមានចែងនៅក្នុងសន្ធិសញ្ញាអន្តរជាតិ ឆ្នាំ២០១៥។
នៅក្នុងសុន្ទរកថាទៅកាន់ក្រុមអ្នកសារព័ត៌មាន ដែលត្រូវបានចាក់ផ្សាយដោយទូរទស្សន៍រដ្ឋលោក Behrouz Kamalvandi បានថ្លែងថា ការស្តុកជាតិអ៊ុយរ៉ាញ៉ូមនឹងមានចំនួនច្រើនជាង ៣០០គីឡូក្រាម ត្រឹមថ្ងៃទី២៧ ខែមិថុនាខាងមុខនេះ។
ក៏ប៉ុន្តែ លោកបាននិយាយថា អ៊ីរ៉ង់នឹងត្រឡប់ទៅគោរពតាមចំនួនដែលមានចែងក្នុងកិច្ចព្រមព្រៀង ប្រសិនបើខ្លួនទទួលបានការគាំទ្រពីប្រទេសជាហត្ថលេខីផ្សេងៗទៀត ដើម្បីឲ្យអ៊ីរ៉ង់រួចផុតពីការដាក់ទណ្ឌកម្មរបស់សហរដ្ឋអាមេរិកនៅក្នុងឧស្សាហកម្មប្រេងដ៏សំខាន់របស់ប្រទេសនេះ។
ប្រទេសអ៊ីរ៉ង់បានយល់ព្រមអនុវត្តកម្មវិធីនុយក្លេអ៊ែររបស់ខ្លួនតាមកិច្ចព្រមព្រៀងឆ្នាំ២០១៥ដើម្បីជាថ្នូរនឹងការដកទណ្ឌកម្មសេដ្ឋកិច្ចដែលទណ្ឌកម្មនេះបានប៉ះពាល់យ៉ាងខ្លាំងដល់សេដ្ឋកិច្ចអ៊ីរ៉ង់។
សហរដ្ឋអាមេរិកបានដកខ្លួនចេញពីកិច្ចព្រមព្រៀងអន្តរជាតិនេះកាលពីឆ្នាំមុន ដោយបន្សល់ទុកឲ្យប្រទេសជាហត្ថលេខីផ្សេងទៀត ដូចជាចក្រភពអង់គ្លេស ចិន បារាំង រុស្ស៊ី និងអាល្លឺម៉ង់ធ្វើការដើម្បីរក្សាកិច្ចព្រមព្រៀងមួយនេះឲ្យនៅមានសុពលភាព។
ក៏ប៉ុន្តែប្រទេសអ៊ីរ៉ង់បានត្អូញត្អែរថា ប្រទេសជាហត្ថលេខីផ្សេងទៀតមិនបានជួយឲ្យអ៊ីរ៉ង់ទទួលបានអត្ថប្រយោជន៍សេដ្ឋកិច្ចគ្រប់គ្រាន់ពីការដកទណ្ឌកម្មនេះទេ ខណៈអ៊ីរ៉ង់បានគោរពតាមការកំណត់បរិមាណជាតិអ៊ុយរ៉ាញ៉ូម ដែលខ្លួនអាចស្តុកទុកបានតាមការកំណត់នៅក្នុងកិច្ចព្រមព្រៀងនេះ៕