មានការធ្វើបាតុកម្មនៅកន្លែងជាច្រើនក្នុងពិភពលោកអំពីវិបត្តិពួកជនអំបូរ Rohingya ក្នុងប្រទេសភូមា។ សម្តេច Dalai Lama និងមេដឹកនាំខាងសិទ្ធិមនុស្សអាហ្រ្វិកខាងត្បូងលោក Desmond Tutu ក៏បានបញ្ចេញមតិដែរដោយសុំឱ្យប្រព្រឹត្តល្អប្រសើរជាងមុនដល់ពួកជនភាគតិចកាន់សាសនាឥស្លាមនេះផងដែរ។
កាលពីថ្ងៃសុក្រ ពួកបាតុករបានធ្វើការប្រជុំ នៅក្នុងរដ្ឋធានីនៃប្រទេសឥណ្ឌូណេស៊ី ដោយបានស្រែកបន្ទរពាក្យស្លោកថា «ព្រះអាទិទេពមានមហិទ្ធិឫទ្ធិអស្ចារ្យ»។ ចំណែកនៅឯក្រុង Tokyo វិញ ពួកប៉ូលិសបានបំបែកពួកជនដែលគាំទ្រប្រជាជន Rohingya ឱ្យនៅឆ្ងាយពីក្រុមជនដែលតវ៉ាប្រឆាំងនឹងពួកបាតុករទាំងនេះដោយបានហៅពួកបាតុករថាជាពួកភេរវជន។
នៅក្នុងខេត្ត Herat នាប៉ែកខាងលិចនៃប្រទេសអាហ្វហ្គានីស្ថាន ពួកបាតុករបានទាមទារឱ្យមានការបញ្ឈប់អំពើហិង្សាប្រឆាំងនឹងប្រជាជនRohingya ហើយនៅក្នុងក្រុងអ៊ីស្លាម៉ាបាដប្រទេសប៉ាគីស្ថាន ពួកបាតុករបានទន្ទ្រាំជើងលើរូបថតលោកស្រីអង់សាន ស៊ូជី មេដឹកនាំភូមា។ មានគេរាយការណ៍ថាមានការធ្វើបាតុកម្មនៅក្នុងប្រទេសឥណ្ឌានិងប្រទេសអ៊ីរ៉ង់ផងដែរ។
អ.ស.ប.បាននិយាយថាមានមនុស្សប្រមាណ២សែន៧ម៉ឺននាក់បានរត់គេចខ្លួនទៅកាន់ប្រទេសបង់ក្លាដែសពីរដ្ឋ Rakhine នៃប្រទេសភូមាកាលពីពីរសប្តាហ៍មុននេះ នៅក្រោយក្រុមមួយហៅខ្លួនឯងថាកងទ័ពសង្គ្រោះ Rohingya នៅ Arakan ភាសាអង់គ្លេសហៅថា Arakan Rohingya Salvation Army បានវាយប្រហារប៉ុស្តិ៍ប៉ូលិសមួយចំនួន៕