អង្គការសហប្រជាជាតិប៉ាន់ស្មានថា ជនភៀសខ្លួនជនជាតិភាគតិចរ៉ូហ៊ីងយ៉ាជាង១សែន២ម៉ឺននាក់បានឆ្លងកាត់ព្រំដែនពីរដ្ឋ Rakhine ភាគខាងជើងប្រទេសមីយ៉ាន់ម៉ាចូលក្នុងប្រទេសបង់ក្លាដែសនៅក្នុងរយៈពេល២សប្តាហ៍ចុងក្រោយនេះ។
លោក Vivan Tan មន្ត្រីសាព័ត៌មានប្រចាំតំបន់អាស៊ីរបស់ស្នងការទទួលបន្ទុកជន ភៀសខ្លួនរបស់អង្គការសហប្រជាជាតិ (UNHCR) បានប្រាប់ VOA ផ្សាយជាភាសាមីយ៉ាន់ម៉ាថា «ពួកគេបានរស់នៅរាយប៉ាយនៅក្នុងភូមិនានា ជំរំជនភៀសខ្លួនក្នុងតំបន់ភាគអាគ្នេយ៍នៃប្រទេសបង់ក្លាដែស។ ពួកគេភាគច្រើនកំពុងទៅដល់តំបន់នោះក្នុងស្ថានភាពអាក្រក់បំផុត។ ពួកគេនិយាយថា ពួកគេបានដើរអស់រយៈពេលជាច្រើនថ្ងៃមកហើយ។ ពួកគេមិនបានទទួលទានម្ហូបអាហារចាប់តាំងពីពួកគេបានចាកចេញពីផ្ទះសម្បែងរបស់ខ្លួន។ ពួកគេជាច្រើនបាននិយាយថា ពួកគេរស់រានមានជីវិតដោយសារទឹកដែលពួកគេអាចស្វែងរកបាន។ ពួកគេបានស្ថិតនៅក្នុងស្ថានភាពយ៉ាងយ៉ឺនបំផុត»។
លោក Tan បាននិយាយទៀតថា ជំរំជនភៀសខ្លួនផ្លូវការ២នៅក្នុងប្រទេសបង់ក្លា ដែស មានមនុស្សច្រើនហួសកម្រិត ដោយមានមនុស្សមកដល់កើនឡើងជារៀងរាល់ថ្ងៃ។
លោក Tan និយាយថា «ជាទូទៅ មិនមានកន្លែងដើម្បីទទួលជនភៀសខ្លួនទៀតទេ»។
មេដឹកនាំជាច្រើននៅក្នុងសហគមន៍អន្តរជាតិបានថ្កោលទោសអំពើហិង្សានេះដោយបានអំពាវនាវឲ្យលោកស្រី អង់សាន ស៊ូជីមេដឹកនាំកាន់អំណាចពិតប្រាកដរបស់ប្រទេសមីយ៉ានម៉ាថ្កោលទោសបញ្ហានេះហើយនឹងចាត់វិធានការដោះស្រាយបញ្ហានេះ។
កាលពីថ្ងៃអង្គារ សហភាពអឺរ៉ុបបានចេញសេចក្តីថ្លែងការណ៍អំពាវដល់ភាគីទាំង២ឲ្យកាត់បន្ថយការតានតឹងនេះ៕
