មានគម្លាតខ្លាំងឡើងៗមួយរវាងរដ្ឋាភិបាលក្រុងវ៉ាស៊ីនតោន និងរដ្ឋាភិបាលក្រុងសេអ៊ូលអំពីកតិកាសញ្ញាយោធាអន្តរកូរ៉េមួយដែលរដ្ឋាភិបាលក្រុងវ៉ាស៊ីនតោន ព្រួយបារម្ភថា អាចធ្វើឱ្យខ្សោយដល់កិច្ចការពាររបស់ប្រទេសកូរ៉េខាងត្បូងប្រឆាំងនឹងការវាយប្រហារដោយកូរ៉េខាងជើង។
លោកស្រី Kang Kyung-wha រដ្ឋមន្ត្រីការបរទេសកូរ៉េខាងត្បូងបានមានប្រសាសន៍ថា លោករដ្ឋមន្ត្រីការបរទេសស.រ.អា. Mike Pompeo បានសម្តែងការអាក់អន់ចិត្តនៅពេលលោកស្រីបាននិយាយជាមួយលោកនៅក្រោយរដ្ឋាភិបាលក្រុងសេអ៊ូលបង្ហាញចំណុចសំខាន់ៗនៃផែនការចុះហត្ថលេខាលើកិច្ចព្រមព្រៀងយោធាមួយជាមួយរដ្ឋាភិបាលក្រុងព្យុងយ៉ាង នៅក្នុងជំនួបកំពូលអន្តរកូរ៉េកាលពីខែកញ្ញាមុន។
កង្វល់របស់លោក Pompeo អំពីកិច្ចព្រមព្រៀងយោធារបស់រដ្ឋាភិបាលក្រុងសេអ៊ូលជាមួយរដ្ឋាភិបាលក្រុងព្យុងយ៉ាង មានឡើងនៅពេលទំនាក់ទំនងរវាងប្រទេសកូរ៉េខាងត្បូងនិងស.រ.អា.គា្មនភាពកក់ក្តៅទេ។ ភាពឃ្លាតពីគ្នាខ្លាំងឡើងៗនេះបណ្តាលមកពីចំណងទាក់ទងអន្តរកូរ៉េដែលហាក់ដូចជាមានភាពកក់ក្តៅជាងមុន និងលឿនជាងការណ៍ដែលកូរ៉េខាងជើងធ្វើឱ្យមានការជឿនលឿនក្នុងការធ្វើមិនឱ្យមានអាវុធនុយក្លេអ៊ែរក្នុងឧបទ្វីបកូរ៉េ។
លោក Bruce Bechtol ជានាយទាហានម៉ារីនចូលនិវត្តន៍និងជាអតីតមន្ត្រីខាងស៊ើបការណ៍សម្ងាត់នៅឯទីភ្នាក់ងារស៊ើបការណ៍សម្ងាត់ខាងការពារប្រទេស។លោកបានធ្វើការសិក្សាស្រាវជ្រាវអំពីកងយោធានៃប្រទេសកូរ៉េខាងជើងនៅឯសាកលវិទ្យាល័យ Angelo State University ក្នុងរដ្ឋ Texas។ លោកយល់ឃើញថា រដ្ឋាភិបាលក្រុងសេអ៊ូលបានធ្វើសម្បទាននៅក្នុងកិច្ចព្រមព្រៀងយោធានេះ ចំណែកឯកូរ៉េខាងជើងវិញបានលះបង់តិចតួចណាស់៕