កាលពីថ្ងៃអង្គារ ឥណ្ឌា បានចោទប្រកាន់ប៉ាគីស្ថានពីការយាយីដល់សមាជិកក្រុមគ្រួសាររបស់លោក Shri Kulbhushan Jadhav ដែលជាចារបុរសឥណ្ឌាដែលគេកាត់ទោសនៅពេលដែលពួកគេត្រូវបានគេអនុញ្ញាតឲ្យទៅសួរសុខទុកលោកកាលពីមួយថ្ងៃមុន។
អាជ្ញាធរប៉ាគីស្ថានបានអនុញ្ញាតឲ្យភរិយាលោក Jadhav ហើយនិងម្តាយរបស់លោកទៅសួរសុខទុកលោកកាលពីថ្ងៃចន្ទ ដោយប៉ាគីស្ថានបានបញ្ជាក់ម្តងទៀតថា ការណ៍នេះធ្វើឡើង «ដោយផ្អែកលើហេតុផលមនុស្សធម៌សុទ្ធសាធ»។
ក្រសួងការបរទេសឥណ្ឌា បានប្រាប់ឲ្យដឹងថា ជំនួបនោះបានធ្វើឡើងនៅក្នុងបរិយាកាសនៃការបង្ខិតបង្ខំ។
ក្រសួងការបរទេសឥណ្ឌាបានប្រាប់ឲ្យដឹងនៅក្នុងសេចក្តីថ្លែងការណ៍ថា «ការណ៍នេះបានបង្ហាញថា លោក Shri Jadhaw បានស្ថិតនៅក្នុងបរិយាកាសលំបាកនិងការបង្ខិតបង្ខំ។ ការនិយាយស្តីរបស់លោកភាគច្រើនបានបង្ហាញយ៉ាងច្បាស់ពីការធ្វើទារុណកម្មហើយនិងប្រឌិតក្លែងក្លាយដើម្បីចោទប្រកាន់ពីសកម្មភាពរបស់លោកនៅក្នុងប្រទេសប៉ាគីស្ថាន។ អាការៈខាងក្រៅរបស់លោកក៏បង្កើននូវសំណួរពីសុខភាព និងសុខមាលភាពរបស់លោកដែរ»។
រដ្ឋាភិបាលក្រុងញូវដែលីក៏បាននិយាយដែរថា ម្តាយរបស់លោក Jadhaw បានត្រូវគេរារាំងមិនឲ្យនិយាយទៅកាន់កូនប្រុសរបស់លោកស្រីជាភាសាកំណើតរបស់ពួកគាត់ ហើយថា ក្រុមគ្រួសារត្រូវបានរំខានយាយីដោយបណ្តាញព័ត៌មាន ថ្វីបើមានកិច្ចព្រមព្រៀងដ៏ច្បាស់ក្រឡែតថា សារព័ត៌មានមិនត្រូវអនុញ្ញាតឲ្យនៅជិតក្រុមគ្រួសារក៏ដោយ៕