នៅប្រទេសឥណ្ឌាគ្រូបង្រៀនម្នាក់ដែលក្លាយជាអ្នកនយោបាយគឺលោកស្រី Droupadi Murmu បានស្បថចូលកាន់តំណែងជាប្រធានាធិបតីនោះគឺមនុស្សដំបូងគេមកពីសហគមន៍កុលសម្ព័ន្ធកាន់តំណែងខ្ពស់បំផុតនេះ។ ថ្វីដ្បិតប្រធានាធិបតីគ្រាន់តែជាតំណែងកិត្តិយសមិនមានអំណាចច្រើនក៏ដោយ ក៏ប៉ុន្តែការឡើងកាន់តំណែងជាប្រមុខសាធារណរដ្ឋនេះជានិមិត្តរូបជ័យជម្នះយ៉ាងធំធេងសម្រាប់ក្រុមជនជាតិភាគតិច។ ស្ត្រីអាយុ៦៤ឆ្នាំរូបនេះក៏ជាប្រធានាធិបតីស្ត្រីទី២របស់ប្រទេសនេះផងដែរ។
បន្ទាប់ពីស្បថចូលកាន់តំណែងក្នុងសភាក្នុងរដ្ឋធានីញូវដែលីមក លោកស្រី Murmu បាននិយាយនៅថ្ងៃច័ន្ទនេះថា «ការបោះឆ្នោតរបស់ខ្ញុំគឺជាភស្តុតាងថា ជនក្រីក្រនៅក្នុងប្រទេសឥណ្ឌាមិនមែនគ្រាន់តែសុបិននោះទេ ប៉ុន្តែវាអាចក្លាយជាការណ៍ពិតផងដែរ»។ លោកស្រីបាននិយាយថា នេះជារឿងពេញចិត្តយ៉ាងខ្លាំង ព្រោះអ្នកដែល«ត្រូវគេដកហូតសិទ្ធិច្រើនសតវត្សមកហើយ» កំពុង«មើលឃើញសិទ្ធិរបស់ពួកគេតាមរយៈខ្ញុំ»។
ជាកូនស្រីរបស់មេភូមិ Baidaposi ក្នុងរដ្ឋ Odisha នៅភាគខាងកើត លោកស្រី Murmu ជាស្ត្រីដំបូងគេពីភូមិរបស់លោកស្រីបានចូលរៀននៅមហាវិទ្យាល័យ។ លោកស្រីជាមនុស្សរបស់សហគមន៍ Santhal ដែលជាក្រុមកុលសម្ព័ន្ធដ៏ធំបំផុតមួយរបស់ប្រទេសឥណ្ឌា ដែលមានកេរ្តិ៍ឈ្មោះចូលរួមយ៉ាងសកម្មក្នុងកិច្ចការសហគមន៍។ បន្ទាប់ពីលោកស្រីឡើងកាន់តំណែង លោកនាយករដ្ឋមន្ត្រី Narendra Modi បាននិយាយនៅក្នុងធ្វីតធឺថា វាគឺជា«ចំណុចរបត់សម្រាប់ឥណ្ឌា ជាពិសេសសម្រាប់ជនក្រីក្រដែលរងការគាបសង្កត់ក្នុងសង្គម»។
ក្រុមកុលសម្ព័ន្ធ ដែលជាធម្មតារស់នៅក្នុងតំបន់ដាច់ស្រយាលនោះមានប្រហែល៨% នៃចំនួនប្រជាពលរដ្ឋ។ ពួកគេទទួលបានការសិក្សា និងការថែទាំសុខភាពយឺតយ៉ាវ។ អ្នកវិភាគនយោបាយលោកស្រី Neerja Chowdhury បាននិយាយថា «មានអ្នកនៅជាយសង្គមប្រទេសឥណ្ឌាបានមកកាន់រចនាសម្ព័ន្ធអំណាចថ្នាក់កណ្តាលគឺជាសារបង្ហាញសេចក្តីប្រាថ្នាដ៏ធំធេងប្រាប់សហគមន៍កុលសម្ព័ន្ធ។ តែគេនៅមិនទាន់ច្បាស់ថាតើការសិក្សា ស្ថានភាពសុខភាព និងអាហារូបត្ថម្ភរបស់របស់ពួកគេនឹងបានប្រសើរឬយ៉ាងណាទេ ពីព្រោះតំណែងប្រធានាធិបតីគ្រាន់តែជាប្រមុខរដ្ឋមិនសូវមានអំណាច។ ទោះជាយ៉ាងណាវានឹងជាការជំរុញសម្រាប់សហគមន៍ទាំងនេះ»។
ចាប់តាំងពីចូលប្រឡូកក្នុងឆាកនយោបាយក្នុងឆ្នាំ១៩៩៧មក លោកស្រី Murmu បានធ្វើជាសមាជិកសភាពីរអាណត្តិមកពីគណបក្ស Bharatiya Janata ក្នុងរដ្ឋ Odisha។ថ្មីៗនេះលោកស្រីជាអភិបាលរដ្ឋ Jharkhand។ លោកស្រីបានឈ្នះការបោះឆ្នោតប្រធានាធិបតីបន្ទាប់ពីបានយកឈ្នះលោក Yashwant Sinha ដែលគាំទ្រដោយគណបក្សប្រឆាំង។
ជ័យជម្នះរបស់លោកស្រីអាចធ្វើទៅបានដោយមានការគាំទ្រពីគណបក្ស BJP របស់លោក Modi និងមានការគាំទ្រគ្រប់គ្រាន់នៅក្នុងសភា។ គណបក្សជ្រើសរើសលោកស្រីនេះត្រូវបានគេមើលឃើញថា ជាការរកការគាំទ្រពីសហគមន៍កុលសម្ព័ន្ធមុនការបោះឆ្នោតសកលឆ្នាំ២០២៤។
ទោះបីប្រធានាធិបតីមិនមានអំណាចនីតិប្រតិបត្តិ តែតំណែងប្រមុខរដ្ឋដើរតួយ៉ាងសំខាន់នៅពេលមានភាពមិនច្បាស់លាស់ផ្នែកនយោបាយ។ ជាឧទាហរណ៍ នៅពេលដែលការបោះឆ្នោតទូទៅមិនសម្រេចផ្លែផ្កានោះ ប្រធានាធិបតីមានអំណាចសម្រេចថា តើគណបក្សណាដែលត្រូវបង្កើតរដ្ឋាភិបាល៕