កិច្ចប្រជុំពិសេសមួយរវាងរដ្ឋមន្ត្រីការបរទេសឥណ្ឌាជាមួយនឹងបណ្ដារដ្ឋមន្ត្រីការបរទេសអាស៊ានត្រូវបានធ្វើឡើងនៅថ្ងៃព្រហស្បតិ៍នេះ ដែលមានឥណ្ឌានិងសិង្ហបុរីធ្វើជាម្ចាស់ផ្ទះរៀបចំ ដោយស្នើឱ្យមានការពង្រឹងចំណងទាក់ទងរវាងបណ្ដាប្រទេសទាំងនេះ ខណៈពេលដែលរុស្ស៊ីបន្ដឈ្លានពានអ៊ុយក្រែន ហើយជម្លោះរវាងសហរដ្ឋអាមេរិក និងចិនកាន់តែតានតឹងឡើង ដែលគំរាមដល់សន្ដិភាព និងស្ថិរភាពនៅក្នុងតំបន់នេះ។
រដ្ឋមន្ត្រីការបរទេសឥណ្ឌា លោក S. Jaishankar មានប្រសាសន៍ថា ឥណ្ឌានិងបណ្ដាប្រទេសជាសមាជិកអាស៊ានប្រឈមមុខនឹងឥទ្ធិពលភូមិសាស្ត្រនយោបាយពីសង្គ្រាមនៅក្នុងប្រទេសអ៊ុយក្រែន និងឥទ្ធិពលដ៏អាក្រក់របស់ខ្លួនលើសន្ដិសុខស្បៀងអាហារនិងថាមពល ក៏ដូចជាតម្លៃជីសម្រាប់ដាំដំណាំនិងតម្លៃទំនិញ និងការរអាក់រអួលនូវសង្វាក់ផ្គត់ផ្គង់ផងដែរ។
លោកថ្លែងថា៖ «ឥណ្ឌាគាំទ្រពេញទំហឹងនូវអាស៊ានមួយដែលរឹងមាំ រួបរួមគ្នា និងរុងរឿង ដែលភាពសំខាន់របស់ក្រុមនេះនៅក្នុងតំបន់ឥណ្ឌូប៉ាស៊ីហ្វិកត្រូវបានទទួលស្គាល់យ៉ាងពេញទំហឹង»។
រដ្ឋមន្ត្រីការបរទេសសិង្ហបុរី លោក Vivian Balakrishnan ថ្លែងថា សកម្មភាពរបស់រុស្ស៊ីបាន«ធ្វើឱ្យប៉ះពាល់ដល់ប្រព័ន្ធអន្តរជាតិនៃច្បាប់ និងបទបញ្ញត្តិ»។
លោក Balakrishnan បានថ្លែងទៀតថា ការប្រជែងគ្នារវាងសហរដ្ឋអាមេរិកនិងចិនបានធ្វើឱ្យប៉ះពាល់ដោយផ្ទាល់ដល់តំបន់អាស៊ីទាំងមូល។
កិច្ចប្រជុំរយៈពេលពីរថ្ងៃនេះគឺដើម្បីគម្រប់ខួបទី ៣០ នៃទំនាក់ទំនងសន្ទនារបស់ឥណ្ឌាជាមួយនឹងសមាជិកទាំង ១០ ប្រទេសនៃអាស៊ាន ដែលរួមមានប្រទេសព្រុយណេ កម្ពុជា ឥណ្ឌូណេស៊ី ឡាវ ម៉ាឡេស៊ី ហ្វីលីពីន សិង្ហបុរី ថៃ មីយ៉ាន់ម៉ា និងវៀតណាម។
លោក Jaishankar បានគូសបញ្ជាក់ពីតម្រូវការក្នុងការពង្រឹងការតភ្ជាប់គ្នារវាងដែនដីនិងដែនសមុទ្រជាមួយនឹងរដ្ឋជាសមាជិកអាស៊ាន។ ការអភិវឌ្ឍផ្លូវល្បឿនលឿនរវាងឥណ្ឌា មីយ៉ាន់ម៉ា និងថៃ គឺជាផ្នែកមួយនៃគំនិតផ្ដួចផ្ដើមភ្ជាប់គ្នារវាងអាស៊ាននិងឥណ្ឌា (ASEAN-India Connectivity initiative)។
ពាណិជ្ជកម្មរវាងឥណ្ឌា និងអាស៊ានមានទំហំជាង ៧៨ ពាន់លានដុល្លារនៅក្នុងឆ្នាំ២០២១។
ប្រទេសឥណ្ឌាភាគច្រើននាំចេញគីមីសរីរាង្គ រ៉ែ នាវានិងទូក ដែកនិងដែកថែប គ្រឿងបរិក្ខារពេទ្យ ក្រណាត់ និងថ្នាំជក់ទៅកាន់បណ្ដាប្រទេសអាស៊ាន។ នេះបើយោងតាមក្រសួងពាណិជ្ជកម្មរបស់ឥណ្ឌា។ ផលិតផលសំខាន់ៗដែលនាំចូលទៅក្នុងប្រទេសឥណ្ឌាពីអាស៊ានរួមមានធ្យូងថ្ម ប្រេងដូង ទូរសព្ទ នាវាធន់តូច និងគ្រឿងអេឡិចត្រូនិកជាដើម៕
