លោកប្រធានាធិបតីបារ៉ាក់ អូបាម៉ា បានអំពាវនាវដល់ពលរដ្ឋអាមេរិកាំងកុំឲ្យចុះចាញ់ភាពភ័យខ្លាច ក្រោយពីមានការវាយប្រហារនាពេលថ្មីៗនេះនៅក្នុងទីក្រុងប៉ារីស និងនៅរដ្ឋកាលីហ្វរញ៉ា ខណៈដែលលោកព្យាយាមធានាសាធារណជនថា លោក និងរដ្ឋបាលរបស់លោកនឹងដោះស្រាយការគំរាមកំហែងដោយភេរវកម្មនេះយ៉ាងមុតមាំ។
នៅក្នុងសេចក្តីថ្លែងការណ៍ដ៏កម្រពីការិយាល័យរបស់លោកនៅឯសេតវិមាន លោកអូបាម៉ាបានថ្លែងនៅយប់ថ្ងៃអាទិត្យថា ក្រុម FBI នៅកំពុងប្រមូលភស្តុតាងទាក់ទិននឹងព្រឹត្តិការណ៍ដែលបានកើតឡើងកាលពីសប្តាហ៍មុននៅឯទីក្រុង San Bernardino រដ្ឋកាលីហ្វរញ៉ា។ ប៉ុន្តែលោកបានថ្លែងថា នៅមិនទាន់មានភស្តុតាងនៅឡើយទេថា អ្នកបាញ់ប្រហារពីរនាក់នោះមានជាប់ទាក់ទងនឹងបណ្តាញភេរវកម្មក្រៅប្រទេស។
លោកថ្លែងថា សហរដ្ឋអាមេរិកបានពង្រឹងកិច្ចការពាររបស់ខ្លួនដើម្បីប្រឆាំងនឹងការគំរាមកំហែងដោយពួកភេរវករ។ លោកថ្លែងថា យោធាអាមេរិកកំពុងតាមចាប់បណ្តាញភេរវកម្មក្រៅប្រទេសដោយឥតស្រាកស្រាន្ត។
ប៉ុន្តែលោកកត់សម្គាល់ថា ក្រុមភេរវករឥឡូវនេះកំពុងងាកទៅរកការវាយប្រហារមួយដែលលោកហៅថា «ការវាយប្រហារដែលមិនស្មុគស្មាញដូចមុន» ដូចអ្វីដែលបានកើតឡើងនៅក្នុងរដ្ឋកាលីហ្វរញ៉ា។
លោកប្រធានាធិបតី អូបាម៉ា ថ្លែងថា លោកយល់ថា ពលរដ្ឋអាមេរិកាំងកំពុងសួរថា «តើពួកគេកំពុងប្រឈមមុខនឹងជំងឺមហារីកដែលមិនអាចព្យាបាលបានភ្លាមៗនោះឬយ៉ាងណា»។ ប៉ុន្តែលោកបានថ្លែងថា៖ «ពួកយើងនឹងកម្ទេចក្រុម ISIL ឬ ក្រុមរដ្ឋឥស្លាមនោះ»។
លោកអូបាម៉ាបានសន្យាថា យោធាអាមេរិកនឹងចាប់ខ្លួនមេដឹកនាំភេរវករនៅប្រទេសណាក៏ដោយដែលពួកគេកំពុងលាក់ខ្លួន។ លោកក៏បានថ្លែងថា សហរដ្ឋអាមេរិកនឹងបន្តផ្តល់ការហ្វឹកហាត់ និងផ្តល់ឧបករណ៍ដល់កងកម្លាំងស៊ីរីនិងអ៊ីរ៉ាក់ក្នុងការវាយប្រយុទ្ធជាមួយនឹងក្រុមរដ្ឋឥស្លាមនៅលើគោក។ ហើយលោកបានថ្លែងថា សហរដ្ឋអាមេរិកកំពុងធ្វើការជាមួយនឹងសម្ព័ន្ធរបស់ខ្លួន។ ហើយលោកក៏បានថ្លែងថា សហគមន៍អន្តរជាតិបានចាប់ផ្តើមរួមគ្នាកំណត់ពេលវេលាដើម្បីបញ្ចប់សង្គ្រាមនៅក្នុងប្រទេសស៊ីរីហើយ៕
ប្រែសម្រួលដោយ ស្រេង លក្ខិណា