នៅថ្ងៃអង្គារនេះ លោកនាយករដ្ឋមន្ត្រី ហ៊ុន សែន បានថ្លែងថា ស្ថិរភាពនៅក្នុងប្រទេសនឹងបន្តមាន ក្រោយពេលមានអ្នកដឹកនាំថ្មីមកជំនួសលោក និងមន្ត្រីវ័យចំណាស់ៗរបស់គណបក្សកាន់អំណាច។ លោកក៏បានអះអាងផងដែរថា ការកែប្រែរដ្ឋធម្មនុញ្ញកន្លងមកនោះ ត្រូវបានធ្វើឡើងដើម្បីប្រយោជន៍ជាតិ ។
លោក ហ៊ុន សែន ដែលពេលនេះមានអាយុ ៧១ ឆ្នាំ បានគ្រប់គ្រងប្រទេសកម្ពុជា ជិតបួនទសវត្សរ៍ គិតចាប់តាំងពីការដួលរលំនៃរបបកម្ពុជាប្រជាធិបតេយ្យ ដែលគេស្គាល់ថា ជារបបខ្មែរក្រហម។
ថ្លែងនៅក្នុងពិធីចុះត្រួតពិនិត្យការដ្ឋានសាងសង់វារីអគ្គិសនីស្ទឹងពោធិ៍សាត់១ ស្ថិតនៅឃុំប្រម៉ោយ ស្រុកវាលវែង ខេត្តពោធិ៍សាត់ លោកហ៊ុន សែន បានប្រាប់ប្រជាពលរដ្ឋ និងក្រុមមន្ត្រីរដ្ឋាភិបាលថា លោកមិនអាចបន្តដឹកនាំប្រទេសរហូតទេ ពោលគឺនឹងមានអ្នកជំនាន់ថ្មីមកជំនួសលោក និងមន្ត្រីរដ្ឋាភិបាលចាស់ៗរបស់គណបក្សប្រជាជនកម្ពុជា។
លោកបញ្ជាក់បន្ថែមថា ស្ថិរភាពនយោបាយនៅក្នុងប្រទេសនឹងបន្តមាន ព្រោះលោក និងអ្នកជំនាន់ចាស់របស់បក្សកាន់អំណាច នឹងនៅបន្តជួយអ្នកដឹកនាំថ្មី ក្នុងការគ្រប់គ្រងប្រទេសជាតិ។
លោកថ្លែងថា៖ «យើងអត់ទៅណាឆ្ងាយ យើងនៅហ្នឹងដែរ។ អ៊ីចឹងវាមិនមាំជាង ខ្សែក្រវាត់ពីរជាន់។ បានសេចក្តីថា ខាងមុខមានក្មេងគេកាន់អំណាច ខាងក្រោយគឺមានចាស់ទុំដែលនៅទ្រទ្រង់ ខ្សែក្រវាត់ពីរនេះ គឺមាំណាស់។ អត់មានអស្ថិរភាពនយោបាយ ដោយសារតែការបាត់បង់ជីវិតរបស់នាយករដ្ឋមន្ត្រី ឬរបស់អ្នកណា ជាពិសេសគឺនាយករដ្ឋមន្ត្រីបាត់បង់ជីវិត គឺគ្រោះថ្នាក់ណាស់»។
លោក ហ៊ុន សែន បានពន្យល់ថា ការកែរដ្ឋធម្មនុញ្ញកន្លងមកនោះ គឺមួយផ្នែកខ្លះមានសារ:សំខាន់ដល់ការរក្សាក្បាលម៉ាស៊ីនដឹកនាំប្រទេស នៅពេលដែលមិនមានឥស្សរជនរូបណា កាន់កាប់តំណែងនាយករដ្ឋមន្ត្រី។
លោកថ្លែងថា៖ «យើងកែរដ្ឋធម្មនុញ្ញកន្លងទៅគឺកែ ពីមុនយើងទៅក្នុងរដ្ឋធម្មនុញ្ញអត់ទាំងមានកំណត់ផង អត់មានកំណត់ គឺចែងច្បាស់ធ្លូទៅតែហ្មងថា ក្នុងករណីតំណែងនាយករដ្ឋមន្ត្រីនៅទំនេរជាស្ថាពរ គណៈរដ្ឋមន្ត្រីមួយត្រូវរៀបចំឡើងវិញ អ៊ីចឹងមានន័យថា នាយករដ្ឋមន្ត្រីស្លាប់ភ្លាម ឬលាលែងពីតំណែងភ្លាម គណៈរដ្ឋមន្ត្រីទាំងមូលរលាយបណ្តោយ»។
លោករៀបរាប់បន្តថា៖ «អ៊ីចឹង បានជាយើងចែងថា បើតំណែងនាយករដ្ឋមន្ត្រីនៅទំនេរជាស្ថាពរ ទៅតាមករណី ករណីស្លាប់ គឺករណីថា ព្រោះក្នុងការកំណត់ ដូចជាការបែងចែកតួនាទីដែលខ្ញុំចេញសេចក្តីសម្រេចថា ឧបនាយករដ្ឋមន្ត្រីមួយ ធ្វើនាយករដ្ឋមន្ត្រីស្តីទី? អ៊ីចឹង នាយករដ្ឋមន្ត្រីស្តីទី ត្រូវដឹកនាំរដ្ឋាភិបាល រហូតដល់រើស រៀបចំគណៈរដ្ឋមន្ត្រីមួយថ្មី អាហ្នឹងទំនេរ»។
លោកបន្ថែមថា ក្នុងករណីលាលែង នាយករដ្ឋមន្ត្រីដែលលាលែងនោះ ត្រូវទទួលខុសត្រូវការងារ រហូតដល់គណៈរដ្ឋមន្ត្រីមួយត្រូវបានរៀបចំឡើងវិញ ហើយមុនពេលដែលបង្កើតគណៈរដ្ឋមន្ត្រីថ្មី គណៈរដ្ឋមន្ត្រីចាស់ដែលបង្កើតដោយសភាក៏ត្រូវបន្តទទួលខុសត្រូវការងារខ្លួនដែរ។ ទោះយ៉ាងណា លោកថា ការកំណត់បែបនេះ បែរជាត្រូវបានគេរិះគន់ថា ជាការធ្វើរដ្ឋប្រហារធម្មនុញ្ញទៅវិញ។
ក្នុងរយៈពេលប៉ុន្មានឆ្នាំចុងក្រោយនេះ គណបក្សកាន់អំណាចបានផ្លាស់ប្តូរ មន្ត្រីដឹកនាំនយោបាយជាច្រើនរូប ដោយប្តូរមន្ត្រីចាស់ដាក់មន្ត្រីវ័យក្មេងឱ្យឡើងកាន់តំណែងជារដ្ឋមន្ត្រី ក្នុងនោះរួមមានរដ្ឋមន្ត្រីក្រសួងបរិស្ថានលោក សាយ សំអាល់ បានឡើងមកជំនួសលោករដ្ឋមន្ត្រីចាស់លោក ម៉ុក ម៉ារ៉េត លោក កើត រិទ្ធ រដ្ឋមន្ត្រីក្រសួងយុត្តិធម៌ បានឡើងមកជំនួសលោក អង្គវង្ស វឌ្ឍនា លោក ឌិត ទីណា រដ្ឋមន្ត្រីក្រសួងកសិកម្ម ឡើងមកជំនួសលោក វេង សាខុន ហើយក៏មានការតែងតាំងឧបនាយករដ្ឋមន្ត្រីបន្ថែមទៀត ដែលរួមមានលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក ប្រាក់ សុខុន រដ្ឋមន្ត្រីក្រសួងការបរទេស និងលោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ផងដែរ។
ដំណាលគ្នានឹងពេលមានការជំរុញមន្ត្រីវ័យក្មេងឱ្យធ្វើជាប្រមុខដឹកនាំក្រសួងស្ថាប័នរដ្ឋ គណបក្សប្រជាជនកម្ពុជាដែលមានលោក ហ៊ុន សែន ជាប្រធាននោះ ក៏បានរៀបចំរួចជាស្រេចនូវបេក្ខភាពនាយករដ្ឋមន្ត្រីសម្រាប់ពេលអនាគត ដែលជាកូនប្រុសច្បងរបស់លោកហ៊ុន សែន គឺលោក ហ៊ុន ម៉ាណែត។
អ្នកវិភាគនយោបាយលោក សេង សារី យល់ថា ការកែរដ្ឋធម្មនុញ្ញ ឬវិសោធនកម្មកន្លងមកធ្វើឡើង ដើម្បីបម្រើប្រយោជន៍នយោបាយរបស់គណបក្សកាន់អំណាច ហើយថា វិសោធនកម្មមុនៗនោះ បានធ្វើឱ្យខូចសង្គតិភាពនៃច្បាប់ដែលមានចែងក្នុងរដ្ឋធម្មនុញ្ញ។
លោកប្រាប់វីអូអេនៅថ្ងៃអង្គារនេះថា៖ «ហើយចុងក្រោយនេះ យើងឃើញហើយ ក្រោយពីការរំលាយគណបក្សសង្គ្រោះជាតិក្នុងឆ្នាំ ២០១៧ ការធ្វើវិសោធនកម្មរដ្ឋធម្មនុញ្ញច្រើនណាស់បានធ្វើឡើង ក្រោយពីការដកអភិយឯកសិទ្ធិ ឬក៏ការដកកៅអីពីសភា ពីគណបក្សប្រឆាំងហ្នឹង យកមកចែកគ្នាហ្នឹងគឺ មានការធ្វើវិសោធនកម្មរដ្ឋធម្មនុញ្ញច្រើនណាស់។ ដូច្នេះ ខ្ញុំសរុបមកវិញ ខ្ញុំថា ការធ្វើវិសោធនកម្មរដ្ឋធម្មនុញ្ញមិនមែនជារឿងខុសទេ។ ក៏ប៉ុន្តែការធ្វើវិសោធនកម្មរដ្ឋធម្មនុញ្ញតាមអ្វីដែលកម្ពុជាកំពុងតែធ្វើនេះវាអត់អាចទទួលយកបានទេ»។
ជុំវិញការធានានូវសន្តិភាព និងសិ្ថរភាពនយោបាយក្នុងប្រទេសបន្ទាប់ពីលោកហ៊ុន សែនចាកចេញពីតំណែងជានាយករដ្ឋមន្ត្រី អ្នកវិភាគរូបនេះ លើកឡើងថា បើអ្នកនយោបាយរូបណានៅបន្តគោរពរដ្ឋធម្មនុញ្ញ និងមិនព្យាយាមបំភ្លេចសន្និសីទទីក្រុងប៉ារីសឆ្នាំ១៩៩១ នោះប្រជាពលរដ្ឋខ្មែរនឹងបន្តរស់នៅក្នុងស្ថានភាពគ្មានជម្លោះ ហើយការអភិវឌ្ឍប្រទេសនឹងបន្តមាន។
លោកថ្លែងថា៖ «អ៊ីចឹងបើសិនជា អ្នកនយោបាយណាក៏ដោយដែលមិនព្យាយាមបំភ្លេច សន្និសីទទីក្រុងប៉ារីស ដែលមិនព្យាយាមបំពានធម្មនុញ្ញ ហើយអនុវត្តទៅតាមគោលការណ៍ធម្មនុញ្ញទៅកម្ពុជាមានសន្តិភាពពិតប្រាដកហើយ កម្ពុជាមានស្ថិរភាពពិតប្រាកដហើយ»។
លោកបន្ថែមថា៖ «សន្តិភាព ហើយនិងស្ថិរភាពសង្គម ហើយនិងសង្គ្រាមនៅកម្ពុជានេះមិនអាចធានាដោយបុគ្គលណាទេ មិនអាចធានាដោយមាត់អ្នកនយោបាយណាទេ។ វាធានាដោយរដ្ឋធម្មនុញ្ញ។ វាធានាដោយមានអន្តរជាតិជាអ្នកផ្តួចផ្តើមចូលរួម ជាពិសេសយើងពិនិត្យមើលទៅលើសន្និសីទក្រុងប៉ារីសឆ្នាំ៩១»។
នៅក្នុងការថ្លែងទៅកាន់ប្រជាពលរដ្ឋ និងក្រុមមន្ត្រីរដ្ឋាភិបាលនៅខេត្តពោធិ៍សាត់ដដែលនោះ លោកនាយករដ្ឋមន្ត្រី ហ៊ុន សែន ក៏បានថ្លែងបរិហារក្រុមអ្នករិះគន់ខ្លះ ថា បារម្ភតែរឿងលទ្ធិប្រជាធិបតេយ្យ និងសិទ្ធិមនុស្ស តែពួកគេបានមើលរំលងការប្រឹងប្រែងរបស់រដ្ឋាភិបាលក្នុងការរក្សាសន្តិភាព សិទ្ធិរស់រានមានជីវិត និងការយកចិត្តទុកដាក់របស់រដ្ឋាភិបាលទៅលើសុខមាលភាពរបស់ប្រជាជន តួយ៉ាងការផ្តល់វ៉ាក់សាំងប្រឆំាងនឹងជំងឺឆ្លងដែលទំនងសំដៅលើជំងឺកូវីដ១៩ ទាំងក្នុងទីប្រជុំជន និងទីជនបទ៕