លោកនាយករដ្ឋមន្ត្រី ហ៊ុន សែន នៅបន្តឈរឈ្មោះសម្រាប់តំណែងនាយករដ្ឋមន្ត្រីនៅក្នុងការបោះឆ្នោតថ្នាក់ជាតិនៅឆ្នាំក្រោយ ចំណែកកូនប្រុសច្បងរបស់លោក គឺលោក ហ៊ុន ម៉ាណែត នឹងក្លាយជាបេក្ខភាពអនាគតនាយករដ្ឋរដ្ឋមន្ត្រីសម្រាប់គណបក្សកាន់អំណាចនេះ។ នេះជាការប្រកាសសាជាថ្មីនៅក្នុងសន្និបាតវិសាមញ្ញរបស់គណៈកម្មាធិការកណ្តាលគណបក្សប្រជាជនកម្ពុជា ដែលធ្វើឡើងរយៈពេលពីរថ្ងៃ ហើយបានបញ្ចប់កាលពីថ្ងៃអាទិត្យ ទី១៧ ខែកក្កដា ឆ្នាំ២០២២។
នៅក្នុងសេចក្តីប្រកាសព័ត៌មានស្តីអំពីលទ្ធផលនៃមហាសន្និបាតវិសាមញ្ញ គណបក្សកាន់អំណាចបានប្រកាសសម្រេចឯកច្ឆន្ទជាផ្លូវការតែងតាំងលោក ហ៊ុន ម៉ាណែត កូនប្រុសច្បងលោកនាយករដ្ឋមន្ត្រី ជាបេក្ខភាពអនាគតនាយករដ្ឋមន្ត្រី ប៉ុន្តែមិនបានបញ្ជាក់អាណត្តិណាឡើយ។ អង្គសន្និបាតបន្ថែមថា លោក ហ៊ុន សែន នឹងបន្តឈរឈ្មោះជាបេក្ខភាពនាយករដ្ឋមន្ត្រីសម្រាប់ការបោះឆ្នោតថ្នាក់ជាតិ ដែលនឹងធ្វើឡើងនៅថ្ងៃទី២៣ ខែកក្កដា ឆ្នាំ២០២៣។
លទ្ធផលនៃអង្គសន្និបាតឱ្យដឹងក្នុងន័យដើមថា៖ «អង្គសន្និបាតបញ្ជាក់ជាឱឡារិកនូវការគាំទ្រសម្តេចអគ្គមហាសេនាបតីតេជោ ហ៊ុន សែន ជាបេក្ខភាពនាយករដ្ឋមន្ត្រីសម្រាប់នីតិកាលទី៧នៃរដ្ឋសភា និងគាំទ្រឯកឧត្តម ហ៊ុន ម៉ាណែត ជាបេក្ខភាពនាយករដ្ឋមន្ត្រីសម្រាប់ពេលអនាគត»។
អ្នកនាំពាក្យគណបក្សប្រជាជនកម្ពុជា លោក សួស យ៉ារ៉ា ប្រាប់វីអូអេនៅថ្ងៃចន្ទថាលោក ហ៊ុន ម៉ាណែត ត្រូវបានសមាជិករបស់គណបក្សនេះបានសម្រេចឯកច្ឆន្ទគ្នាឱ្យធ្វើជាបេក្ខភាពអនាគតនាយករដ្ឋមន្ត្រី តាំងពីសមាជរបស់គណបក្សឆ្នាំ២០២១។ លោកបន្ថែមថា សមាជចុងក្រោយនេះ គ្រាន់តែផ្តល់ព័ត៌មានបន្ថែមដល់សាធារណជន និងបញ្ជាក់ពីគោលជំហររបស់គណបក្សម្តងទៀតប៉ុណ្ណោះអំពីបេក្ខភាពអនាគតនាយករដ្ឋមន្ត្រី។
នៅក្នុងបទសម្ភាសន៍ជាមួយវិទ្យុអាស៊ីសេរីកាលពីថ្ងៃទី១៥ ខែកក្កដា ឆ្នាំ២០២២ លោក សម រង្ស៊ី មេដឹកនាំបក្សប្រឆាំងមួយរូបដែលកំពុងរស់នៅក្នុងប្រទេសបារាំង បានថ្លែងថា លោក ហ៊ុន សែន មានគម្រោងឱ្យកូនប្រុសច្បងបន្តតំណែងរបស់លោកជានាយករដ្ឋមន្ត្រី នៅពេលលោកលាលែងពីតំណែងនាពេលណាមួយ បន្ទាប់ពីការបោះឆ្នោតឆ្នាំ២០២៣។ លោកបន្ថែមថា ប្រសិនបើឱ្យលោក ហ៊ុន ម៉ាណែត ឈរឈ្មោះជានាយករដ្ឋមន្ត្រីនាពេលនេះ វាអាចមានការជំទាស់ពីផ្ទៃក្នុងរបស់គណបក្សកាន់អំណាច។
បើតាមលោក សម រង្ស៊ី ការកែប្រែរដ្ឋធម្មនុញ្ញតាមការស្នើសុំរបស់រដ្ឋាភិបាលលោក ហ៊ុន សែន ដែលអនុញ្ញាតឱ្យគណបក្សដែលមានអាសនៈច្រើនជាងគេក្នុងរដ្ឋសភា ស្នើព្រះមហាក្សត្រនូវវរជនមួយរូបជានាយករដ្ឋមន្ត្រី ដោយលុបចោលឃ្លាពាក់ព័ន្ធនឹងការស្នើពីប្រធាន ដោយមានមតិឯកភាពពីអនុប្រធានទាំងពីរនៃរដ្ឋសភា ក៏ជាគោលបំណងនៃការសម្រួលការតែងតាំងនាយករដ្ឋមន្ត្រីថ្មី នៅពេលណាមួយ។
លោក សម រង្ស៊ី ថ្លែងថា៖ «គឺពេលហ្នឹង គាត់ប្រុងថាគាត់នឹងលាលែង លាលែងឱ្យកូនគាត់ ហើយគាត់ចង់ឱ្យកូនគាត់ឡើងមកធ្វើនាយករដ្ឋមន្ត្រីជំនួសគាត់។ តែបើទុករដ្ឋធម្មនុញ្ញចាស់ទៅអត់រួចទេ ឆ្លងកាត់សភាទៅអត់រួចទេ អ៊ីចឹងគាត់រំលងរដ្ឋសភា។ គាត់ក្នុងឋានៈជានាយករដ្ឋមន្ត្រីផង ជាប្រធានគណបក្សប្រជាជនកម្ពុជាផង គាត់នឹងស្នើទៅព្រះមហាក្សត្រផ្ទាល់តែម្តងថាសុំអោយហ៊ុន ម៉ាណែត ធ្វើនាយករដ្ឋមន្ត្រីជំនួសគាត់»។
អ្នកវិភាគនយោបាយ លោកបណ្ឌិត មាស នី ប្រាប់វីអូអេនៅថ្ងៃចន្ទនេះថា វាមិនមានការភ្ញាក់ផ្អើលអ្វីនោះទេចំពោះការដែលគណបក្សប្រជាជនកម្ពុជាសម្រេចឱ្យលោក ហ៊ុន ម៉ាណែត ជាបេក្ខភាពអនាគតនាយករដ្ឋមន្ត្រី ហើយថា គណបក្សកាន់អំណាចបាននិងកំពុងរៀបចំកសាងអ្នកដឹកនាំថ្មីសម្រាប់អនាគតរបស់ពួកគេទាំងថ្នាក់លើនិងថ្នាក់មូលដ្ឋាន។
អ្នកវិភាគរូបនេះអះអាងថាលោក ហ៊ុន ម៉ាណែត មិនទាន់មានគំនិតដឹកនាំអ្វីថ្មីនៅឡើយទេ ហើយកំពុងតែកសាងសមត្ថភាពបន្ថែម ជាពិសេសរៀនសូត្រតាមរយៈការដឹកនាំពីឪពុករបស់លោក។
លោកបណ្ឌិត មាស នី ថ្លែងថា៖ «ហើយរឿងភាគច្រើនដែលយើងមើលឃើញនោះ គឺការរៀនសូត្របន្តពីឪពុករបស់លោក ជាជាងការផ្តើមគំនិតអ្វីថ្មីៗ។ នេះជាការដែលយើងមើលឃើញមកដល់ពេលនេះ»។
លោក មាស នី បន្តថា នៅពេលដែលការដឹកនាំរបស់លោក ហ៊ុន ម៉ាណែត ឈានមកដល់ វានឹងមិនមានអ្វីខុសប្លែកគ្នាខ្លាំងពីការដឹកនាំរបស់លោក ហ៊ុន សែន នោះទេ ជាពិសេសពាក់ព័ន្ធប្រជាធិបតេយ្យ និងទំនាក់ទំនងការបរទេសកម្ពុជាជាមួយនឹងបណ្តាប្រទេសមហាអំណាច។ លោកបញ្ជាក់ថា អ្នកជំនាន់ក្រោយជាទូទៅដើរតាមស្នាមជើងរបស់អ្នកជំនាន់មុន។
លោក មាស នី បញ្ជាក់ថា៖ «អ៊ីចឹងមិនអាចនិយាយបានថាឱ្យតែអ្នករៀននៅបស្ចិមប្រទេសប្រាកដជាយកការដឹកនាំពីបស្ចិមប្រទេស ឬក៏យើងហៅថានាំមកនូវប្រជាធិបតេយ្យ សេរីភាពគ្រប់គ្រាន់ យកមកឱ្យប្រទេស វាមិនប្រាកដទេ។ វាអាស្រ័យលើឧត្តមគតិ និងភាពឆ្លាតវ័យរបស់មេដឹកនាំនីមួយៗទេ។ យើងឃើញហើយមេដឹកនាំខ្លះរៀនមកពីបស្ចិមប្រទេសប៉ុន្តែដល់មកត្រូវតែចូលក្នុងរចនាសម្ព័ន្ធដែលមានស្រាប់»។
គួរបញ្ជាក់ថា លោក ហ៊ុន ម៉ាណែត បានបញ្ចប់ការសិក្សានៅបណ្ឌិត្យសភាយោធាអាមេរិក West Point និងមានតំណែងជាអគ្គមេបញ្ជាការរងនៃកងយោធពលខេមរភូមិន្ទនិងជាមេបញ្ជាការកងទ័ពជើងគោកកម្ពុជា។ ក្រៅពីមានតួនាទីជាមន្ត្រីជាន់ខ្ពស់យោធាលោក ហ៊ុន ម៉ាណែត ក៏ត្រូវបានតែងតាំងជាប្រធានចលនាយុវជនថ្នាក់កណ្ដាលរបស់គណបក្សប្រជាជនកម្ពុជា កាលពីខែមិថុនា ឆ្នាំ២០២០៕
