លោកនាយករដ្ឋមន្រ្តី ហ៊ុន សែន ប្រើប្រាស់កិច្ចប្រជុំអាស៊ាន រិះគន់អតីតមេដឹកនាំគណបក្សប្រឆាំង និងបានស្នើឲ្យលោកប្រធានាធិបតីអាមេរិក ដូណាល់ ត្រាំ ដាស់តឿនស្ថានទូតអាមេរិកប្រចាំកម្ពុជា កុំឲ្យជ្រៀតជ្រែកចូលកិច្ចការផ្ទៃក្នុងរបស់កម្ពុជា។
ថ្លែងក្នុងកិច្ចប្រជុំកំពូលលើកទី៥ ដើម្បីរំឭកខួបអនុស្សាវរីយ៍លើកទី៤០ នៃទំនាក់ទំនងកិច្ចសន្ទនាអាស៊ាន-សហរដ្ឋអាមេរិក នៅទីក្រុងម៉ានីល ប្រទេសហ្វីលីពីន កាលពីថ្ងៃច័ន្ទកន្លងទៅ លោក ហ៊ុន សែន និយាយទៅកាន់លោកប្រធានាធិបតី ដូណាល់ ត្រាំ ក្នុងកិច្ចប្រជុំនោះថា រដ្ឋបាលរបស់ប្រធានាធិបតីអាមេរិកអាណត្តិមុនៗ បានប្រើប្រាស់លទ្ធិប្រជាធិបតេយ្យ និងសិទ្ធិមនុស្សដើម្បីជ្រៀតជ្រែកកិច្ចផ្ទៃក្នុងរបស់ប្រទេសដទៃ។
លោកបន្ថែមថា កម្ពុជាបាននិងកំពុងតែរងគ្រោះម្តងហើយម្តងទៀត ដោយសារសកម្មភាពរបស់ស្ថានទូតសហរដ្ឋអាមេរិកប្រចាំកម្ពុជា ដើរខុសពីបន្ទាត់នយោបាយរបស់លោក ដូណាល់ ត្រាំ ដែលបានចែងថា មិនជ្រៀតជ្រែកចូលកិច្ចការផ្ទៃក្នុងរបស់ប្រទេសដទៃ។
លោកនាយករដ្ឋមន្រ្តី ហ៊ុន សែន បានស្នើចំៗទៅកាន់លោក ដូណាល់ ត្រាំ នៅចំពោះមុខមេដឹកនាំប្រទេសជាច្រើនក្នុងកិច្ចប្រជុំកំពូលអាស៊ាននោះថា៖
«នយោបាយរបស់ឯកឧត្តម (ដូណាល់ ត្រាំ) កំពុងតែធ្វើការកែប្រែ ប៉ុន្តែស្ថានទូត [អាមេរិក] នៅទីក្រុងភ្នំពេញមិនទាន់បានធ្វើការកែប្រែទេ។ យើងខ្ញុំត្រូវការកសាងច្បាប់គេមករារាំងការកសាងច្បាប់ យើងខ្ញុំអនុវត្តនូវការអនុវត្តច្បាប់របស់ប្រទេសត្រូវបានគេរារាំង។ ចំណុចនេះខ្ញុំគិតថាប្រហែលជាឯកឧត្តមត្រូវមានភារកិច្ច ដើម្បីដាស់តឿនជាមួយនឹងមន្ត្រីទាំងឡាយ ព្រោះរឿងនេះជាគោលការណ៍ធំណាស់ទាក់ទងការមិនជ្រៀតជ្រែកចូលកិច្ចការផ្ទៃក្នុងគេ»។
លោកប្រធានាធិបតីអាមេរិក ដូណាល់ ត្រាំ ថ្លែងនៅក្នុងកិច្ចប្រជុំកំពូលមួយ នៅទីក្រុងម៉ានីល ប្រទេសហ្វីលីពីន កាលពីថ្ងៃអង្គារ ទី១៤ ខែវិច្ឆិកា ឆ្នាំ២០១៧។
ក្រោយបញ្ចប់ការថ្លែងរបស់លោក ហ៊ុន សែន រហូតមកដល់ពេលនេះ គេមិនទាន់ឃើញមានការឆ្លើយតបជាផ្លូវការណាមួយពីលោកប្រធានាធិបតី ដូណាល់ ត្រាំ នៅឡើយ។ ចំណែកអ្នកនាំពាក្យស្ថានទូតអាមេរិកប្រចាំកម្ពុជា លោក David Josar សុំមិនធ្វើអត្ថាធិប្បាយជុំវិញករណីនេះនៅថ្ងៃអង្គារនេះ។
ការថ្លែងរបស់លោក ហ៊ុន សែន ទៅកាន់លោកប្រធានាធិបតី ដូណាល់ ត្រាំ ធ្វើឡើងក្រោយពេលស្ថានទូតអាមេរិកប្រចាំកម្ពុជាតែងតែចេញសេចក្តីថ្លែងការណ៍រិះគន់ផ្សេងៗ ទៅលើសកម្មភាពរបស់រដ្ឋាភិបាលកម្ពុជា ដែលបានកែប្រែច្បាប់មួយចំនួនពាក់ព័ន្ធនឹងការធ្វើនយោបាយ ការចាប់ខ្លួនលោក កឹម សុខា ប្រធានគណបក្សប្រឆាំង ព្រមទាំងការត្រៀមរំលាយគណបក្សសង្គ្រោះជាតិ ដែលមានអ្នកគាំទ្រជាង៤០ភាគរយនៅទូទាំងប្រទេសជាដើម។ ស្ថានទូតអាមេរិកប្រចាំកម្ពុជាបានហៅសកម្មភាពរបស់រដ្ឋាភិបាលលោក ហ៊ុន សែន ទាំងនោះ ថាជាការធ្វើទុក្ខបុកម្នេញលើគណបក្សប្រឆាំង ដែលផ្ទុយពីលទ្ធិប្រជាធិបតេយ្យ។
ទាំងលោកនាយករដ្ឋមន្រ្តី ហ៊ុន សែន និងមន្រ្តីជាន់ខ្ពស់រដ្ឋាភិបាលតែងលើកឡើងថា សកម្មភាពនៃការចាប់ខ្លួនលោក កឹម សុខា និងការត្រៀមរំលាយគណបក្សប្រឆាំង គឺដោយសារពួកគេមានជាប់ពាក់ព័ន្ធនឹងអំពើក្បត់ជាតិ ហើយថា សហរដ្ឋអាមេរិកជាអ្នកនៅពីក្រោយសកម្មភាពរបស់ពួកគេទាំងនោះ។
មិនមែនតែស្ថានទូតអាមេរិកប្រចាំកម្ពុជាទេដែលរិះគន់សកម្មភាពរបស់រដ្ឋាភិបាលកម្ពុជា ទៅលើការចាប់ខ្លួនលោក កឹម សុខា ប្រធានគណបក្សសង្គ្រោះជាតិ និងការប៉ុនប៉ងរំលាយគណបក្សជំទាស់ដ៏ធំនៅកម្ពុជា។ សហគមន៍អន្តរជាតិ រួមមានសមាជិកព្រឹទ្ធសភាអាមេរិក សហភាពអឺរ៉ុប អ.ស.ប. អូស្ត្រាលី កាណាដា អង់គ្លេស និងអង្គការអន្តរជាតិធំៗជាច្រើន ក៏បានបង្ហាញពីការបារម្ភថា ដំណើរការលទ្ធិប្រជាធិបតេយ្យនៅកម្ពុជាឈានទៅរកភាពខ្ទេចខ្ទី ហើយថា ការរំលាយគណបក្សប្រឆាំងនឹងជះឥទ្ធិពលដល់ដំណើរការបោះឆ្នោតក្នុងឆ្នាំ២០១៨ ខាងមុខ។
ក្នុងវេទិកាកិច្ចប្រជុំអាស៊ានដែលមានក្រុមប្រទេសជាច្រើនចូលរួម កាលពីថ្ងៃច័ន្ទ លោក ហ៊ុន សែន ក៏បានព្យាយាមបញ្ជោរលោក ដូណាល់ ត្រាំ ហើយវាយប្រហារលើគូបក្ខដិបក្ខរបស់លោកគឺលោកលោក សម រង្ស៊ី អតីតប្រធានគណបក្សសង្រ្គោះជាតិ។
លោក ហ៊ុន សែន ដែលកាន់អំណាចជាងបីទសវត្សរ៍បានប្រាប់ទៅប្រធានាធិបតី ដូណាល់ ត្រាំ ក្នុងវេទិកាអន្តរជាតិយ៉ាងដូច្នេះ៖
«ខ្ញុំជាមនុស្សម្នាក់ក្នុងចំណោមមនុស្ស ១០០នាក់ ដែលពេលនោះនៅកម្ពុជា គេចាត់ទុកថា ឯកឧត្តមមានលទ្ធភាពឈ្នះឆ្នោតត្រឹមតែ ១ភាគរយប៉ុណ្ណោះ ៩៩ភាគរយ ឯកឧត្តមគឺជាអ្នកចាញ់។ ក៏ប៉ុន្តែខ្លួនខ្ញុំ ស្ថិតនៅក្នុងចំណោម ១ភាគរយ។ មុនពេលបោះឆ្នោតខ្ញុំបានប្រកាសពីរលើកថា ឯកឧត្តម ជាអ្នកឈ្នះឆ្នោត។ ប៉ុន្តែខ្ញុំបែរជាទទួលនូវការវាយប្រហារ ពីប្រធានបក្សប្រឆាំងថា ជាសត្វដែលមានរោមដូចគ្នា វានៅក្នុងសំបុកជាមួយគ្នាបាន។ ដូណាល់ ត្រាំ គឺជាអ្នកផ្តាច់ការដោយសារលុយ ឯ ហ៊ុន សែន ជាអ្នកផ្តាច់ការ ដោយសារលុយនិងអាវុធ»។
លោក Sebastian Strangio អ្នកវិភាគនយោបាយកម្ពុជា និងជាអ្នកនិពន្ធសៀវភៅ «ប្រទេសកម្ពុជារបស់លោក ហ៊ុន សែន» (Hun Sen's Cambodia) ប្រាប់ VOA ថា ការថ្លែងរបស់លោក ហ៊ុន សែន ទៅកាន់លោកប្រធានាធិបតីអាមេរិក ដូណាល់ ត្រាំ គឺជារឿងដែលគួរឲ្យចាប់អារម្មណ៍ និងថាជាការទាញបញ្ហានយោបាយក្នុងស្រុកនៅកម្ពុជា។ លោកបន្ថែមថា លោក ហ៊ុន សែន មានគោលបំណងយ៉ាងពិតប្រាកដក្នុងការព្យាយាមបង្កើនទំនាក់ទំនងរវាងកម្ពុជា-អាមេរិក។
លោក Sebastian Strangio បញ្ជាក់ថា៖
«ខ្ញុំគិតថា គោលបំណងរបស់គាត់ គឺហាក់ដូចជាអំពាវនាវសុំ និងព្យាយាមបង្កើតឲ្យមានទំនាក់ទំនងល្អជាមួយប្រធានាធិបតី ដោយរំលងក្រសួងការបរទេស និងព្រឹទ្ធសភាអាមេរិក ហើយសង្ឃឹមថា គាត់នឹងអាចជួយស្ថាបនាឡើងវិញនៅចំណងមិត្តភាពរវាងអាមេរិក និងកម្ពុជា លើមូលដ្ឋានដែលមានការគាំទ្រលោក ហ៊ុន សែន ជាង»។
ក្រៅពីព្យាយាមបង្កើតទំនាក់ទំនងល្អជាងមួយប្រធានាធិបតីអាមេរិកក្នុងកិច្ចប្រជុំអាស៊ាននៅប្រទេសហ្វីលីពីន លោក ហ៊ុន សែន ក៏បានស្នើទៅលោក ដូណាល់ ត្រាំ បង្វែរបំណុលដែលរដ្ឋាភិបាលកម្ពុជាខ្ចីអាមេរិកក្នុងអំឡុងទស្សវត្សឆ្នាំ១៩៦០ មកជាជំនួយសម្រាប់កម្ពុជាវិញ ដោយលោកបញ្ជាក់ថា បំណុលនោះត្រូវបានជំពាក់ដោយសាររដ្ឋប្រហារមួយដែលគាំទ្រដោយសហរដ្ឋអាមេរិកផងដែរ៕